જો તમે નાની નાની રકમની લોન ઓનલાઇન લેવાનું વિચારી રહ્યા છો અથવા તો આ પ્રકારે લોન લીધી હોય તો તમે ચેતી જજો. કારણ કે આ પ્રકારે મળતી ઇન્સ્ટન્ટ લોન તમને મોટા ખાડામાં ઉતારી શકે છે. અમદાવાદમાં ઈન્સ્ટન્ટ લોનમાં ઠગાઈના કિસ્સાઓ વધ્યા છે. દરરોજ 5થી વધુ લોકો આ ઠગાઇનો ભોગ બની રહ્યા છે.
સાયબર ક્રાઈમમાં ફરિયાદો વધી રહી છે
ઇન્સ્ટન્ટ લોનના નામે નાણાકીય મદદ લેવી ક્યારેક મુસીબત ને આમંત્રણ આપવા જેવો ઘાટ સર્જે છે. કેટલાક સમયથી આ પ્રકારે છેતરપિંડીના અસંખ્ય કિસ્સાઓ બની રહ્યા છે. સાયબર ક્રાઈમ કરતાં ગઠિયાઓ જે વ્યક્તિને ઓછા રૂપિયાની જરૂરિયાત હોય તેવા લોકોને માત્ર આધાર કાર્ડ અને ફોટો જેવા પુરાવા આપીને લોન આપવાની લાલચ આપે છે. ત્યારબાદ તેઓ તેમને બ્લેકમેલિંગ કરીને અથવા તો અન્ય કોઈ રીતે રૂપિયા પડાવે છે. સાયબર ક્રાઇમમાં દરરોજ 5થી વધુ લોકો ઇન્સ્ટન્ટ લોનની ઠગાઈનો ભોગ બનેલા લોકો ફરિયાદ નોંધવવા આવે છે. અને આ ઠગ ટોળકીથી છુટકારો મેળવવાની અપીલ કરે છે.
ધાક ધમકી આપે છે
અગાઉ સાયબર ગઠિયાઓ play store મારફતે ઇન્સ્ટન્ટ લોન માટેની એપ્લિકેશન ડાઉનલોડ કરાવતા હતા. પરંતુ આવી અનેક એપ્લિકેશન બંધ કરાવ્યા બાદ હવે તેઓ સોશિયલ મીડિયા મારફતે લોકોનો સંપર્ક કરતા હોવાનું સામે આવ્યું છે. એટલું જ નહીં આ ગઠિયાઓ એપ્લિકેશન ડાઉનલોડ કરાવ્યા બાદ તેમના મોબાઈલની કેટલીક એપ્લિકેશન એક્સેસ કરવા માટેની મંજૂરી મેળવી લેતા હોય છે. ત્યારબાદ તેમના ફોટો મોર્ફ કરી સગા સંબંધીઓમાં વાયરલ કરવાની ધમકી પણ આપતા હોય છે. આ ઉપરાંત ભોગ બનનારાની રોજિંદીગ ગતિવિધિઓ ઉપર પણ તેમની નજર હોવાની ધમકી આપે છે.
વાંચવા જેવું: ઢોરના કારણે યુવકનું મોત થતાં રાજકોટ મનપા જવાબદાર, 13 લાખ ચૂકવવા આદેશ, સિવિલ કોર્ટનો ઐતિહાસિક ચુકાદો
અધિકૃત છે કે કેમ તેની ચકાસણી કરવી
સાયબર ક્રાઇમના અધિકારીનું કહેવું છે કે, જ્યારે કોઈપણ વ્યક્તિ આ પ્રકારે ઇન્સ્ટન્ટ લોન એપ્લિકેશન પરથી નાણાકીય મદદ લઈ રહ્યા છે ત્યારે તે એપ્લિકેશન NBFC દ્વારા અધિકૃત છે કે કેમ તેની ચકાસણી કરવી હિતાવાહ બને છે. હાલમાં તો સાયબર ક્રાઇમે આ લોન ઠગાઈ કેસમાં સંડોવાયેલા આરોપીની શોધખોળ શરૂ કરી છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
