જરુરી જાણકારી / 'સૌથી પહેલા કહી દઉં'ની લ્હાયમાં ખોટે ખોટા ન્યૂઝ ફેલાવનારનું આવી બન્યું, સરકારનો પ્લાન આવ્યો સામે

• અમિત શાહે રજૂ કર્યું ઈન્ડિયન કોડ ઓફ જસ્ટિસ બિલ 2023 
• બીલની કલમ 195 હેઠળ ફેક ન્યૂઝ ફેલાવનારને થશે સજા અને દંડ 
• બીલને સમિક્ષા માટે સંસદની સ્થાયી સમિતિ પાસે મોકલવામાં આવ્યું 

સોશિયલ મીડિયાના જમાનામાં ફેક ન્યૂઝ સૌથી ઝડપથી ફેલાઈ જતા હોય છે અને તેને કારણે ખૂબ ખરાબ અસર પડતી હોય છે. આવું થતું અટકાવવા માટે સરકારે કમર કસી છે અને ફેક ન્યૂઝ ફેલાતા અટકાવવા એક ખાસ કાયદો બનાવાની તૈયારી ચાલી રહી છે. 

ઈન્ડિયન કોડ ઓફ જસ્ટિસ બિલ 2023 રજૂ

હવે ફેક ન્યૂઝ ફેલાવનારની ખૈર નથી. તાજેતરમાં લોકસભામાં રજૂ કરવામાં આવેલા નવા બિલના કારણે ફેક ન્યૂઝ ફેલાવનારા લોકો માટે કડક જોગવાઈઓ નક્કી કરવામાં આવી છે. કેન્દ્રીય ગૃહમંત્રી અમિત શાહે શુક્રવારે લોકસભામાં ઈન્ડિયન કોડ ઓફ જસ્ટિસ બિલ 2023 રજૂ કર્યું હતું. આ બીલને સમિક્ષા માટે સંસદની 
સ્થાયી સમિતિને મોકલવામાં આવ્યું છે. આ બીલની કલમ 195 હેઠળ એક જોગવાઈ છે, જે ભારતની સાર્વભૌમત્વ અને સુરક્ષાને જોખમમાં મૂકતા "બનાવટી સમાચાર અથવા ગેરમાર્ગે દોરતી માહિતી" ફેલાવનારાઓ સાથે સંબંધિત છે. આવું કરનારને ત્રણ વર્ષ સુધીની કેદની સજા થશે.

બીલમાં શું છે જોગવાઈ 
બીલની કલમ 195માં જણાવાયું છે કે કોઈ પણ વ્યક્તિ ભારતની સાર્વભૌમત્વ, એકતા અને અખંડિતતા અથવા સુરક્ષાને જોખમમાં મૂકે તેવી ખોટી કે ગેરમાર્ગે દોરનારી માહિતી ઊભી કરશે કે પ્રકાશિત કરશે તો તેને ત્રણ વર્ષ સુધીની કેદની સજા અથવા દંડ અથવા બંનેની સજા થશે. 

લોકો માટે ત્રણ મહત્વના બીલ રજૂ થયા 
ગૃહમંત્રી અમિત શાહે શુક્રવારે લોકસભામાં ત્રણ બિલ રજૂ કર્યા હતા જેનો ઉદ્દેશ્ય ભારતીય નાગરિકોને ન્યાય આપવાનો અને બંધારણ દ્વારા આપવામાં આવેલા અધિકારોની રક્ષા કરવાનો છે. બિલ રજૂ કરતી વખતે અમિત શાહે કહ્યું હતું કે, આ ત્રણ નવા કાયદાઓનો મૂળ હેતુ નાગરિકોને બંધારણે આપેલા તમામ અધિકારોની રક્ષા કરવાની રહેશે.