- ચેન્નઈ સુપર કિંગ્સ અને ગુજરાત ટાઇટન્સ વચ્ચે મહામુકાબલો
- અમદાવાદમાં IPL 2023 ના ફાઇનલ અગાઉ જ વરસાદનું વિઘ્ન
- ક્રિકેટનાં નિયમ મુજબ રિઝર્વ ડે ની જોગવાઈ
આજે અમદાવાદના નરેન્દ્ર મોદી ક્રિકેટ સ્ટેડિયમમાં ચેન્નઈ સુપર કિંગ્સ અને ગુજરાત ટાઇટન્સ વચ્ચે મહામુકાબલો યોજાવા જઈ રહ્યો છે. ત્યારે અમદાવાદમાં IPL 2023 ના ફાઇનલ અગાઉ જ વરસાદે વિઘ્ન નાખતા હવે અમદાવાદમાં જો આજની મેચ વરસાદને કારણે નહીં યોજાય તો ક્રિકેટનાં નિયમ મુજબ રિઝર્વ ડે ની જોગવાઈને લઈને 29 મેના રોજ ક્રિકેટ રમાશે.IPL ની મેચને લઇ મહત્વની અપડેટ સામે આવી રહી છે. જેમાં વરસાદને લીધે મેચ હાલ રોકાઈ છે. જો 9:40 સુધીમાં વરસાદ રોકાયો તો પુરી 20 ઓવરની ફાઇનલ મેચ રમાડવામાં આવશે. અને જો 11:56 સુધીમાં વરસાદ રોકાયો તો 5-5 ઓવરની ફાઇનલ મેચ રમાશે. તે જ રીતે વરસાદ નહિ રોકાય તો રિઝર્વ ડે ને લઈને આવતીકાલે એટલે કે 29 મે ના રોજ ફાઇનલ મેચ રમાશે.
ક્રિકેટ મેચ યોજાશે કે કેમ?
આઇપીએલની ફાઇનલમાં ચેન્નઈ સુપર કિંગ્સ પોતાનો પાંચમી વખત જીતનો તાજ હાંસલ કરશે કે ગુજરાત સતત બીજી વખત ચેમ્પિયન બનશે. તે આજે બળાબળના પરખા થયા બાદ મેચમાં નક્કી થશે. પરંતુ આ મેચ અગાઉ હવામાનનો મોટો સંકટ તોળાઈ રહ્યો છે. એક બાજુ અમદાવાદના વસ્ત્રાપુર સહિતના વિસ્તારોમાં કરા સાથે કમોસમી વરસાદ ત્રાટકી રહ્યો છે ત્યારે ચાહકોના મનમાં પણ એક જ સવાલ છે કે ક્રિકેટ મેચ યોજાશે કે કેમ?
વરસાદ વેરી બનતા જો આજની ફાઇનલ મેચ રમાવવામાં તકલીફ પડે તો રિઝર્વ ડેની જોગવાઈ છે જે મુજબ અનામત દિવસ એટલે કે સોમવાર 29 મીના રોજ રાત્રે 8:00 વાગ્યાથી આ ફાઈનલનો મુકાબલો શરૂ થઈ શકે છે. વરસાદને લઈને ટોસ મોડો થશે. ત્યારે જો મેચમાં એક બોલ ફેકયા બાદ વરસાદને લઈને મેચ બંધ રાખવામાં આવે છે તો નિયમ મુજબ રિઝર્વ ડેમાં ફરી ત્યારથી જ શરૂઆત થઈ શકે છે. ઉપરાંત જો ટોસ થયા બાદ મેચ શરૂ ન થાય તો રિઝર્વ ડેના દિવસે ફરી ટોસ કરવામાં આવે છે.
...તો ગુજરાત ટાઇટન્સ ટાઇટલ મેળવશે
20- 20 ઓવરના મેચમાં જો ખેલ 7:40 વાગ્યે શરૂ થવાનો હોય તો રાત્રે 10:10 વાગ્યા સુધી રાહ જોવામાં આવે છે. જેનો મતલબ એ છે કે આ સમયગાળા સુધીમાં મેચ શરૂ થઈ શકવાની પરિસ્થિતિ હોય તો કોઈ ઓવર ઘટાડવામાં આવતી નથી. બાદમાં જો આ શક્ય ન હોય તો ઓછામાં ઓછી 5-5 ઓવરની મેચનો પ્રયાસ કરવામાં આવશે. તેમજ આ મેચ શક્ય ન બને તો સુપર ઓવર નક્કી કરવાનો પ્રયાસ કરાઈ છે અને જો રિઝર્વ ડે પર પણ સુપર ઓવર શક્ય ન હોય, તો ટ્રોફી આપવા માટે આ માટે લીગ તબક્કાનું પોઈન્ટ ટેબલ લેવામાં આવશે, જ્યાં પ્રથમ સ્થાન મેળવનારી ટીમને વિજેતા જાહેર કરવામાં આવશે. આ સ્થિતિમાં ગુજરાત ટાઇટન્સ ટાઇટલ મેળવશે.
