મોટા સમાચાર / બ્રિટન જવાનું પ્લાન કરતાં લોકો માટે ઝટકો, ઋષિ સુનકે વિઝા માટે લીધો મોટો નિર્ણય

• બ્રિટને વિઝા ફીમાં 15થી 20 ટકાનો થશે વધારો 
• બ્રિટનના PMએ વિઝા ફીમાં વધારાની જાહેરાત કરી 
• અરજદારે 13 હજાર જેટલી રકમ વધુ ચૂકવવી પડશે

બ્રિટન જવા ઈચ્છતા લોકો માટે મહત્વના સમાચાર સામે આવ્યા છે. બ્રિટનના વડાપ્રધાન ઋષિ સુનકે જાહેરાત કરી છે કે ભારતીયો સહિત વિઝા અરજદારો દ્વારા નેશનલ હેલ્થ સર્વિસ (NHS)ને ચૂકવવામાં આવતી ફી અને હેલ્થ સરચાર્જમાં નોંધપાત્ર વધારો થશે. આ વધારો લગભગ 15 ટકાથી 20 ટકા હોઈ શકે છે, જોકે હજુ સુધી કોઈ સત્તાવાર પુષ્ટિ કરવામાં આવી નથી. જો આ વધારો લાગુ કરવામાં આવશે તો ભારતીયોએ વિઝા માટે વધુ ફી ચૂકવવી પડશે.

વિઝા ફી વધારવા પાછળ ઋષિ સુનકનું આ છે લક્ષ્ય
ઋષિ સુનકનું લક્ષ્ય વિઝા ફીમાં વધારાના મધ્યમથી બ્રિટનના જાહેર ક્ષેત્રના કર્મચારીઓ માટે વેતનમાં વૃદ્ધિ કરવાનું છે. આમાં શિક્ષકો, પોલીસ, જુનિયર ડોકટરો અને અન્ય જાહેર ક્ષેત્રના કર્મચારીઓનો સમાવેશ થાય છે, તેમણે કહ્યું કે સમગ્ર બોર્ડમાં સામાન્ય રીતે પાંચથી સાત ટકાનો વધારો થયો છે. ઋષિ સુનકે કહ્યું કે બ્રિટન સરકાર ફુગાવાને કારણે વધી રહેલા ખર્ચને પહોંચી વળવા માટે વધી રહેલા દેવા પર નિર્ભર નહીં રહે. 

હું લોકો પર ટેક્સ લગાવવા તૈયાર નથીઃ ઋષિ સુનક
ઋષિ સુનકે કહ્યું કે, જો અમે જાહેર ક્ષેત્રના કર્મચારીઓ માટે પગાર વધારાને પ્રાથમિકતા આપવા જઈ રહ્યા છીએ, તો તે પૈસા બીજે ક્યાંકથી લાવવા પડશે કારણ કે હું લોકો પર ટેક્સ લગાવવા માટે તૈયાર નથી. તેમણે આગળ કહ્યું કે, તેથી અમે આ નાણાંની વ્યવસ્થા કરવા માટે બે બાબતો નક્કી કરી છે. પ્રથમ અમે આ દેશમાં આવતા પ્રવાસીઓ દ્વારા વિઝા માટે અરજી કરવા પર ચૂકવવામાં આવતી ફીને વધારવા જઈ રહ્યા છે. વાસ્તવમાં તેને ઇમિગ્રેશન હેલ્થ સરચાર્જ (IHS) કહેવામાં આવે છે. આ તે ફી છે જે NHS સુધી પહોંચવા માટે પ્રવાસીઓએ ચૂકવવાની હોય છે. તેમણે જણાવ્યું કે, તે તમામ ફીમાં વધારો થવા જઈ રહ્યો છે અને તેનાથી એક અબજ બ્રિટિશ પાઉન્ડથી વધુનો વધારો થશે, તેથી સમગ્ર બોર્ડમાં વિઝા અરજી ફીમાં નોંધપાત્ર વધારો થવા જઈ રહ્યો છે અને આ રીતે IHS પર પણ લાગુ થશે.

હવે કેટલી રકમ ચૂકવવી પડશે?
સરકારે પુષ્ટિ કરી છે વિઝા ફીમાં 15 ટકાનો વધારો થશે. અન્ય તમામ વિઝા ફીમાં ઓછામાં ઓછો 20 ટકાનો વધારો થશે. ઇમિગ્રેશન હેલ્થ સરચાર્જ (IHS) જેને પહેલીવાર 2015માં લાગુ કરવામાં આવી હતી, અરજી દીઠ 200 પાઉન્ડ ચૂકવવા પડતા હતા. 2018માં તે ડબલ થઈને 400 પાઉન્ડ થઈ ગયા અને 2020માં વધીને 624 પાઉન્ડ (લગભગ 67 હજાર રૂપિયા) થઈ ગયા. આવી સ્થિતિમાં જો તેમાં 20 ટકાનો વધારો થાય છે તો ભારતીયોને વધારાના 13 હજાર રૂપિયા ચૂકવવા પડશે.