જાણવા જેવું / ખુલ્લામાં સિગારેટ ફૂંકનારાઓ દંડાશે, કઈ કઈ જગ્યાએ સ્મોકીંગ પર પાબંધી? શું છે કાયદામાં જોગવાઈ

• જાહેરમાં સિગારેટ પીતા લોકો માટે જાણવા જેવા સમાચાર 
• તમે સાર્વજનિક સ્થળે ધૂમ્રપાન કરી શકતા નથી
• IPCની કલમ 278 હેઠળ કોઈપણ જાહેર સ્થળે સિગારેટ પીવી એ ગુનો

Cigarette Smokers : આપણે કેટલીય વાર જોયું હશે કે લોકો જાહેરમાં ક્યાંકને ક્યાંક સિગારેટ પીતા હોય છે. આ સાથે ઘણા લોકોને ચા સાથે સિગારેટ પીવાની આદત હોય છે. ઘણીવાર તમે રસ્તા પર લોકોને એક હાથમાં ચા અને બીજા હાથમાં સિગારેટ જોતાં હશો. પરંતુ હવે આમ કરવા બદલ તમારે દંડ ભરવો પડી શકે છે. જો તમે સિગારેટ પ્રગટાવો અને રસ્તા પર અથવા ભીડવાળી જગ્યાએ પીવાનું શરૂ કરો તો તમારે સાવચેત રહેવાની જરૂર છે. જો તમે આમ કરશો તો તમને દંડ અને જેલ પણ થઈ શકે છે.  

તમે સાર્વજનિક સ્થળે ધૂમ્રપાન કરી શકતા નથી
IPCની કલમ 278 હેઠળ કોઈપણ જાહેર સ્થળે સિગારેટ પીવી એ ગુનો છે, જેના માટે દંડની જોગવાઈ છે. ભીડવાળા રસ્તા પર અથવા જાહેર સ્થળેસિગારેટ પીવા બદલ તમને ચલણ થઈ શકે છે અને જો તમે દંડ ન ભરો તો તમારે જેલ જવું પડી શકે છે. સામાન્ય રીતે આવા કેસમાં 200 રૂપિયાનો દંડ વસૂલવામાં આવે છે, જે લોકો સ્થળ પર જ ચૂકવે છે. ઘણી જગ્યાએ 1000 રૂપિયા સુધીનો દંડ વસૂલવામાં આવી શકે છે. જોકે જો તમે એવી જગ્યાએ ધૂમ્રપાન કરો છો જે ખુલ્લી જગ્યા છે અને તમારા ધૂમ્રપાનથી કોઈને કોઈ સમસ્યા નથી તો તમારી સામે કોઈ પગલાં લેવામાં આવશે નહીં.

કઈ જગ્યા પર તમે સિગારેટ નહિ પી શકો 
તમને જણાવી દઈએ કે, તમે કઈ જગ્યાએ  સિગારેટ પી શકતા નથી. તમે હોસ્પિટલ પરિસર, આરોગ્ય સંસ્થા, મનોરંજન કેન્દ્ર, રેસ્ટોરાં, હોટેલ, જાહેર કાર્યાલય, કોર્ટ બિલ્ડીંગ, શાળા-કોલેજ, પુસ્તકાલય, જાહેર પરિવહન, સ્ટેડિયમ, સિનેમા હોલ, શોપિંગ મોલ, બસ સ્ટોપ, એરપોર્ટ, રેલવે જેવી કોઈપણ જગ્યાએ સિગારેટ પી શકતા નથી. આને કારણે ઘણી સાર્વજનિક જગ્યાઓ પર અલગ સ્મોકિંગ ઝોન બનાવવામાં આવે છે, જેમ કે તમે એરપોર્ટ, રેસ્ટોરન્ટ અને બારમાં જોયા હશે. આ સ્મોકિંગ રૂમ માટે પણ નિયમો બનાવવામાં આવ્યા છે. આમાં વેન્ટિલેશન હોવું જરૂરી છે, આ સિવાય તે એવી જગ્યાએ હોવું જોઈએ જ્યાંથી ધુમાડો ન નીકળે અને કોઈને કોઈ સમસ્યા ન થાય.