મર્જર પ્રોસેસ / સુરતથી દિલ્હી જનારી આ ફ્લાઇટ માર્ચ મહિનાથી થઇ જશે બંધ, જાણો કારણ

 

• સુરતમાં એર ઇન્ડિયાની સાંજની દિલ્હીની ફ્લાઈટ માર્ચથી બંધ થશે
• A-1 489-490 સુરત-દિલ્હીનું બુકિંગ 8 માર્ચથી બંધ કરાયું
• શિડયુલ અને મર્જરની પ્રક્રિયા પૂરી થયા બાદ ફરી શરૂ કરાશે ફ્લાઈટ 

સુરતીઓ માટે નિરાશાજનક સમાચાર સામે આવ્યા છે. એવું કહેવામાં આવી રહ્યું છે કે દરરોજ સાંજે સુરતથી દિલ્હી માટે ઉડાન ભરતી એર ઇન્ડિયાની ફ્લાઇટ માર્ચ મહિનાથી બંધ થવા જઈ રહી છે. વર્ષ 2015થી રોજિંદા ધોરણે સાંજે ઓપરેટ થતી એર ઇન્ડિયાની સુરત-દિલ્હી ફ્લાઇટ A-1 489-490નું બુકિંગ 8 માર્ચથી બંધ કરાયું છે. એર ઇન્ડિયાની આ ફ્લાઇટને શિડયુલ અને મર્જરના કારણે બંધ કરવાનો નિર્ણય લેવામાં આવ્યો છે. મહત્વનું છે કે, ગત ડિસેમ્બર મહિનામાં સુરતથી દિલ્હી માટે દરરોજ સવારે ઉડાન ભરતી ફ્લાઇટ બંધ થઈ ગઈ છે. 

શિડયુલ અને મર્જરના કારણે લેવાયો નિર્ણય
એવું કહેવામાં આવી રહ્યું છે, શિડયુલ અને મર્જરના કારણે ફ્લાઈટ બંધ કરવાનો નિર્ણય લેવામાં આવ્યો છે. શિડયુલ અને મર્જરની પ્રક્રિયા પૂરી થયા બાદ ફ્લાઈટ ફરી શરૂ કરાશે. સુરતમાં એર ઇન્ડિયાની સાંજની દિલ્હીની ફ્લાઈટ માર્ચથી થોડા મહિનાઓ માટે જ બંધ કરાશે. નોંધનીય છે કે, હાલ એર ઇન્ડિયા, એર એશિયા ઇન્ડિયા, વિસ્તારા અને એર ઇન્ડિયા એક્સપ્રેસનું મર્જર થયું છે. 

ઘણા લોકોને મુશ્કેલી પડશે
ફ્લાઇટના બંધ થયા બાદ ઘણા લોકોને મુશ્કેલી પડશે. કારણ કે આ બંને ફ્લાઈટ સવારે અને રાતે દિલ્હીથી સિંગલ પીએનઆર ટિકિટ પર ઇન્ટરનેશનલ કનેક્ટિવિટી મેળવવા માટે મહત્વની હતી. સુરતનાં જે પ્રવાસી દિલ્હી પહોંચી ઇન્ટરનેશનલ ડેસ્ટિનેશનની ફ્લાઈટ પકડવા માંગતા હતાં, એમને હવે દિલ્હી વહેલા પહોંચી ઇન્ટરનેશનલ ફ્લાઈટ પકડવાની ઝંઝટમાંથી પસાર થવું પડશે.

ઓક્ટોબર 2015 કરાઈ હતી શરૂ
સુરતીઓને દેશના અન્ય રાજ્યોના શહેરો સાથે કનેક્ટિવિટીની માંગે જોર પકડતા ઓક્ટોબર 2015માં એર ઇન્ડિયાની દિલ્હી-સુરત-દિલ્હી ફ્લાઇટ શરૂ કરવામાં આવી હતી. આ ફ્લાઇટ રોજિંદા ધોરણે સાંજે ઓપરેટ થાય છે. 2015માં ફ્લાઈટ શરૂ કરવા માટે સી.આર.પાટીલે રૂ.3 કરોડની બેંક ગેરેન્ટી જમા કરાવી હતી.

સુરત એરપોર્ટ પર મુસાફરોનો ધરખમ ઘટાડો
સુરત એરપોર્ટથી મુસાફરી કરનારા પેસેન્જરોનો આંકડો બહાર પાડવામાં આવતા ચોંકાવનારી વિગતો બહાર આવી છે. વર્ષ-2021ની સરખામણીમાં 2022માં પેસેન્જરોની સંખ્યામાં 23 ટકાનો ઘટાડો નોંધાયો છે. વર્ષ-2021માં નવેમ્બર મહિનામાં સુરત એરપોર્ટ ઉપરથી 1,23,346 લોકોએ મુસાફરી કરી હતી. જ્યારે વર્ષ 2022માં નવેમ્બર મહિનામાં માત્ર 94,008 લોકોએ જ મુસાફરી કરી છે. એટલે કે 2021ની સરખામણીમાં 2022માં  મુસાફરોની સંખ્યામાં 23.8 ટકાનો ઘટાડો નોંધાયો છે.