રાજકારણ / લોકસભાની ચૂંટણી પૂર્વે સૌરાષ્ટ્ર ભાજપ સંગઠનમાં થઈ શકે છે મોટા ફેરફાર, જાણો કારણ

 

• પ્રદેશ ભાજપ સંગઠનમાં થઇ શકે ફેરફાર
• લોકસભાની ચૂંટણી પૂર્વે થઈ શકે ફેરફાર
• 3 જિલ્લાના નવા ભાજપ પ્રમુખની નિમણૂક

આવતા વર્ષે એટલે કે વર્ષ 2024માં લોકસભાની ચૂંટણી યોજાવાની છે. ગુજરાત વિધાનસભાની ચૂંટણીમાં ભવ્ય જીત મેળવ્યા બાદ હવે ભાજપે લોકસભાની ચૂંટણીની તૈયારીઓ શરૂ કરી દીધી છે. ભારતીય જનતા પાર્ટી આ લોકસભાની ચૂંટણીમાં કોઈ રિસ્ક લેવા માંગતી નથી. લોકસભાની ચૂંટણી પૂર્વે ભાજપ સંગઠનમાં ફેરફાર કરી શકે છે.

લોકસભાની ચૂંટણી પૂર્વે સૌરાષ્ટ્રમાં થઈ શકે છે ફેરફાર
એવું કહેવામાં આવી રહ્યું છે કે, લોકસભાની ચૂંટણી પૂર્વે સૌરાષ્ટ્રના કેટલાક જિલ્લા અને મહાનગરમાં ફેરફાર થઈ શકે છે. વિધાનસભાના પરિણામના લેખાજોખા અને પ્રમુખો સામે ફરિયાદને લઈને ફેરફાર થઈ શકે છે. આપને જણાવી દઈએ કે, તાજેતરમાં જ ગીર સોમનાથ, પોરબંદર અને ડાંગ જિલ્લા ભાજપના પ્રમુખો બદલાયા છે. હજુ કેટલાક જિલ્લા ભાજપ અને મહાનગરમાં ફેરફારની શક્યતા છે.

ભાજપ સંગઠન દ્વારા નવા પ્રમુખોની વરણી કરાઈ
ભાજપે તાજેતરમાં જ ત્રણ જિલ્લાના નવા પ્રમુખોની નિમણૂક કરી છે. જેમાં ગીર સોમનાથમાં મહેન્દ્રભાઈ પિઠીયા, પોરબંદરમાં રમેશભાઈ ઓડેદરા અને ડાંગમાં કિશોરભાઈ ગાવીત જિલ્લા પ્રમુખ તરીકે નિમાયા છે. તાજેતરમાં જ ત્રણેય જિલ્લાના પ્રમુખોના રાજીનામા લેવાઈ ગયા હતા. જેની બાદ પ્રદેશ પ્રમુખે ત્રણેય જિલ્લામાં નવા પ્રમુખની વરણી કરી છે. આ પહેલા દેવભૂમિ દ્વારકા અને સુરેદ્રનગરમાં પણ ફેરફાર થયા હતા.

પ્રદેશ અધ્યક્ષ શ્રી @CRPaatil દ્વારા ડાંગ, ગીર સોમનાથ અને પોરબંદર જિલ્લાના જિલ્લા પ્રમુખશ્રીઓની નિમણૂક કરવામાં આવી.

નવનિયુક્ત જિલ્લા પ્રમુખશ્રીઓને અભિનંદન સહ શુભેચ્છાઓ pic.twitter.com/kfEjAAt3HF

— BJP Gujarat (@BJP4Gujarat) April 5, 2023

ભાજપે તમામ બેઠક જીતવા લક્ષ્યાંક નિર્ધારિત કર્યો
ગુજરાત વિધાનસભા ચૂંટણી 2022માં ભાજપે રેકોર્ડ બ્રેક 156 બેઠકો જીતને રાજકારણમાં નવો ઇતિહાસ બનાવ્યો છે. હવે ભાજપે લોકસભા મિશન-2024 માટે તૈયારીઓ શરૂ કરી દીધી છે. પ્રદેશ ભાજપ દ્વારા લોકસભાની 26માંથી 26 બેઠક મેળવવાનો લક્ષ્યાંક નિર્ધારીત કરાયો છે. લોકસભા ચૂંટણીમાં વિપક્ષની ડિપોઝિટ જપ્ત કરવાનો લક્ષ્યાંક નિર્ધારીત કરવામાં આવ્યો છે. 

તમામ ધારાસભ્યોને આપી દીધી છે સૂચના
લોકસભાની ચૂંટણી વર્ષ 2024માં આવશે અને હજુ તેને એક વર્ષ કરતા વધુનો સમય બાકી છે, પરંતુ અત્યારથી જ ભાજપ દ્વારા પોતાના ધારાસભ્યોને સ્પેશિયલ ટાસ્ક આપીને મહત્વની સૂચના આપી દેવામાં આવી છે. ધારાસભ્યોને ચૂંટણીલક્ષી કામગીરીનો પ્રારંભ કરવા માટેની સૂચના આપી દેવામાં આવી છે. ધારાસભ્યોને મોબાઈલ એપ્લિકેશન દ્વારા મતદારોનો સંપર્ક કરવાની સૂચના આપી દેવામાં આવી છે.