ચકચાર / મહેસાણાના વડસ્મા કોલેજની ગુમ વિદ્યાર્થિનીનો મૃતદેહ મળતા હડકંપ, PSIએ કારણ આપ્યું 'પ્રેમપ્રકરણ'

• ગુમ થયેલી વિદ્યાર્થિનીનો મૃતદેહ મળ્યો
• લેબોરેટરીમાંથી મળ્યો વિદ્યાર્થિનીનો મૃતદેહ
• વિદ્યાર્થિની સાથે ગુમ થયેલો યુવક ફરાર

મહેસાણાના વાડસ્માના શ્રી સત્સંગી સાકેતધામ રામઆશ્રમ શૈક્ષણિક સંકૂલમાં અભ્યાસ કરતી વિદ્યાર્થિનીનો મૃતદેહ મળી આવ્યો છે. કૉલેજની લેબોરેટરીમાંથી વિદ્યાર્થિનીનો મૃતદેહ મળી આવતા ખળભળાટ મચી ગયો છે. વિદ્યાર્થિનીનું લાંઘણજ આરોગ્ય કેન્દ્રમાં પોસ્ટમોર્ટમ કરવામાં આવ્યું છે. મહત્વનું છે કે મૃતક વિદ્યાર્થિની યુવક સાથે ગુમ થઈ ગઈ હતી. પોલીસ આ મામલે તપાસ કરી રહી હતી.

ગુમ થયેલી છાત્રાનો મૃતદેહ લેબોરેટરીથી મળ્યો
મળતી માહિતી અનુસાર, વલસાડના ઉમરગામ તાલુકાના કછી ગામની તિતિક્ષા પટેલ (ઉં.વ 21) વડસ્મા નજીક આવેલી શ્રી સત્સંગી સાકેતધામ રામઆશ્રમ શૈક્ષણિક સંકુલમાં અભ્યાસ કરતી હતી અને હોસ્ટેલમાં રહેતી હતી. આ યુવતી થોડા સમય પહેલા કોલેજમાંથી ગુમ થઈ ગઈ હતી. સાથે જ કોલેજનો એક યુવક પણ ગુમ થઈ ગયો હતો. જેની પોલીસ તપાસ કરી રહી હતી.

લાંઘણજ આરોગ્ય કેન્દ્રમાં કરાયું પોસ્ટમોર્ટમ
ત્યારે કોલેજના નવા બની રહેલા લેબોરેટરી બિલ્ડીંગમાંથી યુવતીનો મૃતદેહ મળી આવ્યો હતો. આ અંગેની જાણ થતાં ઉચ્ચ પોલીસ અધિકારીઓનો કાફલો ઘટના સ્થળે દોડી આવ્યો હતો અને વિદ્યાર્થિનીના મૃતદેહને પોસ્ટ મોર્ટમ અર્થે લાંઘણજ આરોગ્ય કેન્દ્રમાં ખસેડવામાં આવ્યો હતો. લાંઘણજ આરોગ્ય કેન્દ્રમાં પેનલ ડોક્ટરોની મદદથી પોસ્ટમોર્ટમ કરવામાં આવ્યું છે.

પ્રેમ પ્રકરણમાં બનાવ બન્યો હોવાનું અનુમાન
મૃતદેહ મળવા મામલે લાંઘણજના PSI આર.જી.ચૌધરીએ જણાવ્યું કે, મૃતદેહ મળવા પાછળ અત્યારે પ્રેમ-પ્રકરણ જણાઈ રહ્યું છે. વિદ્યાર્થિની સાથે અભ્યાસ કરનારો યુવક ફરાર છે. અત્યારે યુવકની શોધખોળ ચાલી રહી છે. ટૂંક સમયમાં ઘટનાનો ભેદ ઉકેલાઈ જશે.