ચિંતીત / ખેડૂતો માટે દુખના દ'હાડા.! બિપોરજોયના કમઠાણ બાદ હવે વરસાદની ખેંચ પડતાં ડબલ માર, સ્થિતિ દયજનક

• વરસાદ ખેંચાતા ખેડૂતો પરેશાન 
• ઉભાપાકને નુકસાન જવાની ભીતિ 
• મગફળી અને કપાસના પાકને નુકસાન 

 બનાસકાંઠા જીલ્લામાં વરસાદ ખેંચાતા ખેડૂતો મુશ્કેલીમાં મુકાયા છે. ત્યારે ઓગસ્ટ મહિનામાં એકંદરે નહિવત વરસાદ નોંધાવવા પામ્યો છે. તેમજ સપ્ટેમ્બર મહિનામાં પણ વરસાદ ખેંચાવાની શક્યતાઓ જોવા મળી રહી છે. મગફળી, કપાસ સહિતનાં પાકને પાણીની તાતી જરૂરીયાત હોઈ હવે જો વરસાદ ખેંચાશે તો ખેડૂતોને નુકશાન જવાની ભીંતી સેવાઈ રહી છે. 

ખેડૂતોએ ખેતરમાં શિયાળું પાકનું વાવેતર કર્યું
ચાલુ વર્ષે બનાસકાંઠા જીલ્લામાં સારા એવા પ્રમાણમાં વરસાદ ન પડતા ખેતરમાં ઉભા પાકને લઈ ખેડૂતો ચિંતાતુર બન્યા છે. ત્યારે તાજેતરમાં જ બિપોરજોય વાવાઝોડાનાં કારણે ખેતરમાં ઉભેલ પાક નિષ્ફળ ગયો હતો. જે બાદ ખેડૂતોએ ફરી ખેતરમાં શિયાળું પાકનું વાવેતર કર્યું હતું. પરંતું વરસાદ ખેંચાતા હાલ ખેતરમાં વાવેતર કરેલ શિયાળું પાક નિષ્ફળ જવાની ભીંતી ખેડૂતો સેવી રહ્યા છે. 

કુદરતી આફત, કમોસમી વરસાદ તેમજ વરસાદ ખેંચાતા પાક નિષ્ફળ
છેલ્લા ઘણા સમયથી બનાસકાંઠા જીલ્લાનાં ખેડૂતો કુદરતી આપત્તિઓનાં કારણે નુકશાન વેઠી રહ્યા છે. ખેડૂતો દ્વારા મોંઘા બિયારણની ખરીદી કરી ખેતર પાકનું વાવેતર કરવામાં આવી રહ્યું છે. પરંતું કમોસમી વરસાદ, કુદરતી આફત તેમજ વરસાદ ખેંચાતા પાક નિષ્ફળ જતા ખેડૂતોને ભારે નુકશાન વેઠવાનો વારો આવ્યો છે. 
બિપોરજોય વાવાઝોડાએ ભારે તારાજી સર્જી હતી
ચોમાસાની ઋતુમાં ખેડૂતોને ફરી એકવાર સારા ઉત્પાદનની આશા જાગી હતી. પરંતું તે સમયે ચોમાસાની શરૂઆતનાં દિવસોમાં જ બનાસકાંઠા જીલ્લામાં બિપોરજોય વાવાઝોડાએ ભારે તારાજી સર્જતા ખેડૂતોની આશાઓ પર પાણી ફરી વળ્યું હતું. જેથી મોટા પ્રમાણમાં ખેડૂતોને બાજરી, કપાસ, એરંડા, મગફળી સહિતનાં પાકમાં નુકશાન સહન કરવું પડ્યું હતું. 

બનાસકાંઠા જીલ્લામાં વરસાદ ખેંચાતા પાક સુકાઈ જવાની ચિંતા
ઓગસ્ટ મહિનામાં બનાસકાંઠા જીલ્લામાં વરસાદ  આવતા ખેડૂતોની ચિંતામાં વધારો થયો છે. કારણ કે એક તરફ બનાસકાંઠા જીલ્લામાં છેલ્લા ઘણા સમયથી પાણીની તંગી સર્જાઈ હતી. આ વર્ષે ફરી એકવાર વરસાદ આધારિત વિસ્તારોમાં વરસાદ સારા એવા પ્રમાણમાં ન પડતા ખેડૂતો પોતાનાં પાકને લઈ ચિંતામાં મુકાયા છે. હાલ મોટાભાગનાં ખેતરોમાં મગફળી, બાજરી, એરંડા તેમજ કપાસ સહિતનાં પાકનું વાવેતર ખેડૂત દ્વારા કરવામાં આવ્યું છે. પરંતું વરસાદ ખેંચાતા હવે પાક સુકાઈ જવાની ચિંતાથી ખેડૂતો ચિંતાતુર બન્યા છે.