ગુજરાતમાં 25 બેઠકો પર 7 મેના રોજ મતદાન થશે. આ વખતે ચૂંટણીમાં કેન્દ્રીય મંત્રી પરષોત્તમ રૂપાલાએ ક્ષત્રિય સમાજ માટે આપેલું નિવેદન ચર્ચામાં રહ્યું હતું. આપણા દેશમાં રાજકારણ હંમેશા જ્ઞાતિ અને જાતિલક્ષી રહ્યું છે. વાત ટિકિટ આપવાની હોય કે પછી મંત્રી મંડળ બનાવવાની દરેક પક્ષ જ્ઞાતિ સમીકરણ બેલેન્સ કરવાનો પ્રયત્ન કરે છે. એમાંય ઈતિહાસ સાક્ષી છે કે એકાદ સમાજ પ્રત્યે આપેલા નિવેદને મોટા નેતાઓને પણ ચૂંટણી હારવી છે. આ વખતની લોકસભાની ચૂંટણીનો પ્રચાર શરૂ થયો ત્યારથી લઈને અત્યાર સુધી ક્ષત્રિય સમાજ અને રૂપાલાનું નિવેદન સતત ચર્ચામાં રહ્યું છે. એક તરફ ભાજપ ડેમેજ કંટ્રોલ કરવ પ્રયત્નશીલ છે, કેટલાક રાજવી પરિવારો ભાજપને ટેકો પણ જાહેર કરી ચૂક્યા છે, બીજી તરફ ઘણા ઠેકાણે ક્ષત્રિય સમાજમાં હજી પણ રોષ જોવા મળી રહ્યો છે. રૂપાલાએ એક વખત નહીં પરંતુ ત્રણથી ચાર વખત માફી માગી હતી, પરંતુ વિરોધનો ક્યાંક ક્યાંક યથાવત્ છે.
રૂપાલાનો વિરોધ, મોદીને સમર્થન
ગુજરાતમાં 2014 અને 2019ની એકતરફી લોકસભા ચૂંટણીમાં ભાજપે ગુજરાતની તમામ 26 બેઠકો જીતી હતી, પરંતુ આ વખતે ક્ષત્રિયો અને રાજપૂતો પર રૂપાલાની ટિપ્પણી બાદ મામલો થોડો રસપ્રદ બન્યો છે. ક્ષત્રિય સમાજની માગ હતી કે રૂપાલા ચૂંટણી ન લડે, પરંતુ પરષોત્તમ રૂપાલાએ શક્તિ પ્રદર્શન સાથે ફોર્મ ભર્યું અને ભાજપે પણ તેમની ટિકિટ પાછી ન ખેંચી. જો કે, ક્ષત્રિય સમાજે ભાજપ અને વડાપ્રધાન નરેન્દ્ર મોદી સામે કોઈ રોષ ન હોવાનું કહ્યું છે. બીજી તરફ, રૂપાલાની માફી અને પક્ષ દ્વારા માફીની અપીલ છતાં પણ ક્ષત્રિય સમાજ તેમની ટિકિટ પાછી ખેંચવાની માગ પર અડગ હતો. શરૂઆતમાં ચિંતિત, રૂપાલા નવી દિલ્હી ગયા અને પછી આશ્વાસન સાથે પાછા ફર્યા. આ પછી તેમણે પ્રચાર શરૂ કર્યો. જેમતેમ તેમણે ઉમેદવારી નોંધાવી હતી.
ભાજપનું અડગ વલણ
હવે પ્રશ્ન એ થાય છે કે ભાજપે એક સમાજને નારાજ કરવાની કિંમતે રૂપાલાને સમર્થન કેમ આપ્યું? આનો જવાબ રાજકોટમાં બિન ક્ષત્રિય મતોની સંખ્યા છે. તેમણે ભાજપને સંગઠિત કરીને પોતાના પક્ષમાં લીધો. ગુજરાતની કોઈપણ લોકસભા સીટ પર ક્ષત્રિય મત સંપૂર્ણ બહુમતીમાં નથી. તેઓ ફક્ત ભાજપનો વોટ શેર ઘટાડી શકે છે, ઉમેદવારની હાર જીત નક્કી કરી શકે તેટલા મતદારો કોઈ એક બેઠક પર નથી. જેને કારણે પણ ભાજપે રૂપાલાને બદલીને અન્ય ઉમેદવારને ઉભા રાખવાનું મન ન બનાવ્યું.
વધુ વાંચોઃ આવતીકાલ સાંજથી ગુજરાતમાં પ્રચાર પડઘમ થશે શાંત, જાણો કોણ ક્યાં સભાઓ ગજવશે?
ક્ષત્રિય સમાજ કેટલી અસર કરી શકે?
2017માં ગુજરાત વિધાનસભાની ચૂંટણી પહેલા પાટીદાર અનામત આંદોલન થયું. અને વિધાનસભાની ચૂંટણીના પરિણામમાં તેની અસર પણ વર્તાઈ. જો કે હાલ ક્ષત્રિયોનો વિરોધ માત્ર પરષોત્તમ રૂપાલા પૂરતો છે. શરૂઆતમાં એવું લાગતું હતું કે આ વિરોધની અસર અન્ય સીટો પર પણ પડી શકે છે. જો કે હાલ તો ક્ષત્રિય સમાજના કેટલાક આગેવાનો જ ભાજપના સમર્થનમાં છે, એટલે ગુજરાતની 26 બેઠકો પર તેમના વિરોધની ખાસ અસર પડે તેવું નિષ્ણાતો માનતા નથી. આ પણ એક કારણ હોઈ શકે છે કે ભાજપે પરષોત્તમ રૂપાલાને કેમ ન બદલ્યા.
