સ્પોર્ટ્સ / BCCI ઇચ્છે તો પણ ટીમ ઇન્ડિયામાં વૈભવ સૂર્યવંશીને મોકો ના આપી શકે, જુઓ ICCનો નિયમ

અંડર-19 વર્લ્ડ કપની ફાઇનલમાં વૈભવ સૂર્યવંશીએ જે જબરદસ્ત બેટિંગ કરી કે તેની ગૂંજ આખા ક્રિકેટ જગતમાં સંભળાઈ રહી છે. ઇંગ્લેન્ડ સામેની ફાઇનલમાં વૈભવે 80 બોલમાં 175 રન કર્યા. આ માત્ર એક ઇનિંગ ન હતી, પણ રેકોર્ડ બૂક પર સીધો કબજો હતો. 15 છગ્ગા, જબરદસ્ત સ્ટ્રાઇક રેટ અને એવી રમત કે જેને ફાઇનલ જેવી મોટી મેચ પણ એકતરફી બનાવી દીધી. બિહારના 14 વર્ષીય આ ખેલાડીને જોઈને ચાહકોને સવાલ ઉઠે છે કે જો વૈભવ ઇંગ્લેન્ડના બેસ્ટ યુવા બોલરોને ધોઈ શકે છે અને IPLમાં પણ જબરદસ્ત સેન્ચુરી ફટકારી શકે છે, તો તેને સિનિયર ઇન્ડિયન ટીમમાં કેમ સામેલ ન કરવામાં આવે? આનો જવાબ છે - ICCનો નિયમ.

કેમ ન રમી શકે સિનિયર ટીમમાં?

ભલે કેટલાય પણ રેકોર્ડ બનાવ્યા હોય કે જબરદસ્ત ઈનિંગ્સ રમી હોય, પણ વૈભવ સૂર્યવંશી સિનિયર ટીમમાં ન રમી શકે. વૈભવ સામે સૌથી મોટો અવરોધ ICCની લઘુત્તમ વયમર્યાદા છે. 2020માં લાગુ કરાયેલા નિયમ પ્રમાણે, આંતરરાષ્ટ્રીય ક્રિકેટ રમવા માટે ખેલાડીની ઉંમર ઓછામાં ઓછી 15 વર્ષ હોવી જરૂરી છે. આ નિયમ ખેલાડીઓની શારીરિક અને માનસિક સલામતીને ધ્યાનમાં રાખીને બનાવવામાં આવ્યો છે.

વૈભવનો જન્મ 27 માર્ચ 2011ના રોજ થયો હતો. ફેબ્રુઆરી 2026માં જ્યારે તેણે અંડર-19 વર્લ્ડ કપ જીત્યો ત્યારે તેની ઉંમર હજુ 14 વર્ષ જ છે. એટલે કે ભલે તે બિહાર માટે 36 બોલમાં સદી ફટકારે કે IPLમાં રાજસ્થાન રોયલ્સ માટે બોલરોને ધોઈ નાખે, પણ 27 માર્ચ 2026 પહેલા સિનિયર ટીમમાં તેની પસંદગી થવી શક્ય નથી.

વધુ એક રસપ્રદ વાત એ છે કે તે ભલે ઉંમરમાં નાનો હોય, પણ હવે તે ફરીવાર અંડર-19 ટીમ માટે વર્લ્ડ કપમાં રમી શકશે નહીં. સિનિયર ટીમમાં રમવા માટે ICCની લઘુત્તમ વયમર્યાદાનો નિયમ અવરોધ છે, ત્યારે હવે અંડર-19 વર્લ્ડ કપ રમવા માટે BCCIનો નિયમ અવરોધ બનશે. BCCIનો સખત નિયમ છે કે એક ખેલાડી અંડર-19 વર્લ્ડ કપમાં ફક્ત એક જ વાર રમી શકે. આ નિયમનો હેતુ એ સુનિશ્ચિત કરવાનો છે કે દરેક ટુર્નામેન્ટમાં નવા ખેલાડીઓને તક મળે અને કોઈ પણ ખેલાડી એ ઉંમરની ટીમનો 'સ્પેશિયાલિસ્ટ' ન બની જાય. અંડર-19 વર્લ્ડ કપ 2026માં પ્લેયર ઓફ ધ ટુર્નામેન્ટ બન્યા પછી હવે વૈભવ 2028 અથવા 2030ના અંડર-19 વર્લ્ડ કપમાં રમી શકશે નહીં, ભલે તે ઉંમરની દ્રષ્ટિએ હજુ પણ અંડર-19 જ હોય.

આ પણ વાંચો: U19 વર્લ્ડ કપ ચેમ્પિયન ટીમ ઇન્ડિયા માટે BCCI વતી કરોડોનું ઇનામ જાહેર, ICCએ તો...!

છેલ્લા 12 મહિનામાં વૈભવ સૂર્યવંશીએ બનાવ્યા જબરદસ્ત રેકોર્ડ -

• અંડર-19 વર્લ્ડ કપ 2026 ફાઇનલમાં 80 બોલમાં 175 રન
• વર્લ્ડ કપ 2026માં 30 છગ્ગા - ટુર્નામેન્ટનો એક નવો રેકોર્ડ
• 14 વર્ષ અને 272 દિવસની ઉંમરમાં લિસ્ટ-એ સદી - વિશ્વનો સૌથી યુવા ખેલાડી
• વિજય હજારે ટ્રોફીમાં 59 બોલમાં 150 રન - એબી ડી વિલિયર્સનો રેકોર્ડ તોડ્યો
• 35 બોલમાં IPL સદી - સૌથી યુવા IPL સદી ફટકારના ખેલાડી
• ભારત A માટે T20 સદી ફટકારનાર પ્રથમ ખેલાડી
• ઇંગ્લેન્ડ U19 સામે 52 બોલમાં સદી - સૌથી ઝડપી યુવા ODI સદી
• યુવા ટેસ્ટમાં 58 બોલમાં સદી - ભારત માટે સૌથી ઝડપી
• સૈયદ મુશ્તાક અલી ટ્રોફીમાં 108 નોટઆઉટ - સૌથી યુવા સદી

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ