ગુજરાત / જામનગરમાં BMWની તેજ રફ્તાર, અમદાવાદનો સિંધુભવન રોડ બન્યો રેસિંગ ટ્રેક, રાજકોટમાં લુખ્ખાગીરી: ગુજરાતમાં વધ્યો નબીરાઓનો આતંક

• રાજ્યમાં નબીરાઓનો આતંક યથાવત
• અમદાવાદ, જામનગર અને રાજકોટમાં બની ઘટના
• બેફામ કારચાલકોનાં ત્રાસે નિર્દોષો જીવ ગુમાવે

 ઘટનાને પગલે પોલીસે બેફામ કારચાલકની કરી અટકાયત 
જામનગરમાં વધુ એક નબીરાએ BMW કારથી દંપતીને  ફંગોળ્યા હતા. બેફામ કાર ચલાવતા નબીરાએ બાઈક સવાર દંપતીને અડફેટે લીધું હતું. જીજે 10 ડીએન 0007 નંબરની BMW કાર ચલાવી નબીરાએ અકસ્માત કર્યો હતો. અકસ્માતમાં પતિ દેવરાજ મકવાણાનું મોત નિપજ્યું હતું. જ્યારે પત્નિ અનિતાબેન મકવાણાને માથાનાં ભાગે ગંભીર ઈજાઓ થતા સારવાર અર્થે ખસેડાયા હતા. ઘટનાને પગલે પોલીસે બેફામ કાર ચાલકની અટકાયત કરી હતી. ત્યારે કાર ગુલમામદ જુમાભાઈ સાટી નામનો નબીરો ચલાવી રહ્યો હતો. 

કિશોરને ટક્કર માર્યા બાદ કાર ખાડામાં ખાબકી
અમદાવાદનાં રામોલમાં બે દિવસ પહેલ બેફામ કાર ચાલકે કિશોરને અડફેટે લીધો હતો. ન્યુ આરટીઓ માર્ગ પર જતી કારે કિશોરને ટક્કર મારી હતી. ટક્કર માર્યા બાદ કાર ખાડામાં ખાબકી હતી. કાર ચાલકને સ્થાનિકોએ ઝડપી લીધો હતો. જ્યારે ઈજાગ્રસ્ત કિશોરને હોસ્પિટલમાં સારવાર માટે લઈ જવાયો હતો. 

સોશિયલ મીડિયામાં રેસના અનેક વીડિયો કર્યા છે અપલોડ
અમદાવાદના સિંધુભવન રોડ પર નબીરાઓ સુધરવાનું નામ નથી લઈ રહ્યા. વિગતો મુજબ અહી આ નબીરાઓ લોકોના જીવ જોખમમાં મુકી રેસ લગાવી રહ્યા છે. ગઈકાલે દિવાળીના દિવસે મોડીરાતે 3:26 વાગ્યે રેસિંગના ચક્કરમાં 2 કાર અથડાઈ હતી. જેમાં નબીરાઓએ પૂરપાટ ઝડપે કાર ચલાવી બે કારને અડફેટે લીધી હતી. પ્રાથમિક વિગતો મુજબ રિશીત પટેલ નામના નબીરાએ અકસ્માત કર્યો હોવાનું સામે આવ્યું છે. જોકે આ ઘટનાના CCTV પણ સામે આવ્યા છે. 

પોતાની સામે પોલીસ પણ કશું નહીં કરી લે તેવો બફાટ કર્યો હતો
રાજકોટનાં યાજ્ઞિક રોડ પર ખરીદી કરીને પરત જઈ રહેલ વૃદ્ધને કાર ચાલક યુવક અને યુવતી દ્વારા આધેડ સાથે તકરાર કરી હતી. તેમજ આધેડ સાથે વાહન ચલાવવા બાબતે સિનિયર સીટીઝન સાથે બફાટ કર્યો હતો. ત્યારે આ વીડિયો સોશિયલ મીડિયા પર વાયરલ થતા લોકોએ પોલીસની કામગીરી પર અનેક સવાલ ઉભા કર્યા હતા.