સાવધાન / Ransomware એટેકથી બચીને રહેજો! નહીં તો તમામ ડેટા આંખના પલકારામાં થઇ જશે ચોરી, જાણો બચવાના ઉપાય

• વિન્ડોઝ અને લિનક્સ સિસ્ટમને નિશાન બનાવી રહ્યું છે રેન્સમવેર
• યુઝર્સને જો ડેટા પાછો જોઈતો હોય તો ખંડણી માગે છે
• રેન્સમવેર એટેક હાલના સમયમાં બે રીતે કરવામાં આવી રહ્યો છે

ઈન્ડિયન કોમ્પ્યુટર ઈમરજન્સી રિસ્પોન્સ ટીમ (CERT-In)એ તાજેતરમાં નવા ઈન્ટરનેટ રેન્સમવેર અકીરા નામના ખતરનાક રેન્સમવેર સામે ચેતવણી આપી હતી. જે વિન્ડોઝ અને લિનક્સ સિસ્ટમને નિશાન બનાવી રહ્યું છે. અકીરા પાછળનું રેન્સમવેર જૂથ યુઝર્સના અગત્યના ડેટાની ચોરી કરે છે અને ડેટાને એન્ક્રિપ્ટ એટલે કે લોક કરે છે, અને યુઝર્સને જો ડેટા પાછો જોઈતો હોય તો ખંડણી માગે છે, જો યુઝર્સ ખંડણીના ચૂકવે તો જૂથ ડાર્ક વેબ પર ડેટા પ્રકાશિત કરવાની ધમકી આપે છે.

2022 માં ગુજરાતમાં 79 રેન્સમવેર  એટેક નોંધાયા
સાઈબર એન્ડ ફોરેન્સિક એક્સપર્ટ  મયુર ભુસાવળકર જણાવ્યા મુજબ વર્ષ 2022 માં ગુજરાતમાં 79 રેન્સમવેર  એટેક નોંધાયા હતા, જ્યારે 2021 માં 53 રેન્સમવેર  એટેક કેસ નોંધાયા હતા, એમાં અમદાવાદ, સુરત, રાજકોટ અને વડોદરા પ્રમુખ સ્થાન પર હતા. રેન્સમવેર એટેકમાં ખાસ કરીને યુઝરના કમ્પ્યુટરમાં રહેલા અગત્યના ડેટા ચોરવામાં આવે છે, અને તે ડેટાને ચોક્કસ પ્રકારની કીની મદદથી લોક કરી દેવામાં આવે છે, એ ડેટા પાછા આપવા માટે એક ચોક્કસ પ્રકારની  મસમોટી રકમ માંગવામાં આવે છે, અને જો ભોગ બનનાર દ્વારા રકમ ચૂકવવામાં  આવે તો ડેટાથી હાથ ધોવાનો વારો આવે છે. જે યુઝર દ્વારા અથવા સંસ્થા દ્વારા સલામતીના નિયમોનું પાલન કરવામાં નથી આવતું તે જ યુઝર આવા રેન્સમવેર  એટેકનો ભોગ બને છે.

યુઝર ઉપર રેન્સમવેર એટેક હાલના સમયમાં બે રીતે કરવામાં આવી રહ્યો છે
1) યુઝર ના ઈમેઈલ એકાઉન્ટમાં મલેશિયસ લિંક થકી.
2) લાઇસન્સ સોફ્ટવેર મફતમાં ડાઉનલોડ કરવાની લાલચ આપીને.

રેન્સમવેર પ્રકારના એટેકથી બચવા આટલું ધ્યાન રાખો
-પોતાના અગત્યના ડેટાનો એક કરતા વધારે માધ્યમ પર સંગ્રહ કરે, શક્ય હોય તો કલાઉડ ઉપર ડેટા સંગ્રહનો આગ્રહ રાખે
-પોતાના દરેક ડેટાનો નિયમિત રીતે બેકઅપ લેવા
-લાયસન્સ પ્રકારના એન્ટિવાયરસ અને નેટવર્ક ફાયરવોલનો ઉપયોગ કરવામાં આવે.
- નેટવર્ક ના પોર્ટ નંબર હંમેશા ડિફોલ્ટ ન રાખવા જોઈએ.
- હંમેશા કમ્પ્યુટરમાં લાઇસન્સ પ્રકારના સોફ્ટવેર વાપરવાનો આગ્રહ રાખવો જોઈએ.
- નિયમિત રીતે હાર્ડવેર અને સોફ્ટવેરનું ઓડિટ કરાવું અત્યંત જરૂરી છે.
- કોઈ સોફ્ટવેર ડાઉનલોડ કરતી વેળાએ સલામતીને ડિસેબલ કરવાનું કહેવામાં આવે ત્યારે તે ન કરવું જોઈએ.