વિવાદ / સ્કૂલ બાળકોના હાથે આસારામની પૂજા કરાવનાર શાળા સામે તપાસ, આચાર્યએ કહ્યું-ગામના લોકો આવ્યા હતા અને...

• શાળામાં આસારામના ફોટા સાથે પૂજા કરવા બદલ તપાસના આદેશ
• જિલ્લા શિક્ષણાધિકારીએ TPEOને આપ્યા તપાસ ના આદેશ
• આસારામની પૂજા અંગે શાળાના આચાર્ય પ્રદીપ પટેલનુ નિવેદન

મહીસાગરના લુણાવાડાની જામાપગીના મુવાડાની પ્રાથમિક શાળા વિવાદમાં ઘેરાઈ છે. જામાપગીના મુવાડાની પ્રાથમિક શાળામાં દુષ્કર્મના આરોપી આસારામના ફોટાની પૂજા કરવામાં આવી હોવાની ઘટના સામે આવે છે. VTVના અહેવાલ બાદ જિલ્લા પ્રાથમિક શિક્ષણાધિકારીએ TPEOને તપાસના આદેશ આપ્યા છે. TPEO જમાપગીના મુવાડા પ્રાથમિક શાળા ખાતે પહોંચીને તપાસ હાથ ધરી છે. બીજી બાજુ આ મામલે જામાપગીના મુવાડા શાળાના આચાર્ય પ્રદીપ પટેલનું નિવેદન સામે આવ્યું છે. 

હવે પછી આ પ્રકારની પ્રવૃતિ અમે નહીં કરીએઃ આચાર્ય
આચાર્ય પ્રદીપ પટેલે જણાવ્યું કે, આશારામનું ટ્રસ્ટ ચલાવતા લોકો અહી આવ્યા હતા. આસારામનો ફોટો સાથે લઈને લોકો આવ્યા હતા. હવે પછી આ પ્રકારની પ્રવૃતિ અમે નહીં કરીએ. અમારાથી મોટી ભૂલ થઈ ગઈ છે. DEOએ TPEOને તપાસ સોપી છે, અત્યારે તપાસ ચાલુ છે. 

આસારામના ફોટાની કરાઈ હતી પૂજા
મહીસાગરના લુણાવાડામાં જામાંપગીના મુવાડાની પ્રાથમિક શાળામાં દુષ્કર્મના આરોપી આસારામના ફોટાની શિક્ષકો અને વિદ્યાર્થીઓએ પૂજા કરી હતી. પ્રાપ્ત માહિતી અનુસાર, 14થી 17 ફેબ્રુઆરી સુધી માતૃ-પિતૃ પૂજન દિવસની ઉજવણી કરાઈ હતી જે દરમિયાન આરોપી આસારામના ફોટાની પણ પૂજા કરાઈ હતી. બળાત્કારના આરોપી આસારામનું બેનર અને ફોટો સ્કૂલમાં લગાવાતા વિવાદ સર્જાયો છે. જે શાળાના કાર્યક્રમમાં વાલીઓને પણ બોલાવ્યા હતા. એટલું જ નહીં આસારામના પ્રવચનને પણ સંભળાવવામાં આવ્યા હતાં. શાળાની આ કરતૂતથી લુણાવાડા પંથકના કેટલાક લોકોમાં રોષ જોવા મળી રહ્યો છે. 

છેલ્લા 9 વર્ષથી જેલમાં છે આસારામ
અગાઉ જામીનની અરજીમાં આસારામે કહ્યું હતું કે છેલ્લાં 9 વર્ષથી તે જેલમાં બંધ છે. તેમની ઉંમર 80 વર્ષથી ઉપર થઇ ચૂકી છે. તે ગંભીર બિમારીઓથી પીડિત છે. સુપ્રીમ કોર્ટ તેમની જામીન અરજી પર સહાનુભૂતિ પૂર્વક વિચારી તેમની જામીનનો આદેશ જાહેર કરે જેથી તે પોતાનો યોગ્ય ઇલાજ કરાવી શકે.