સ્ત્રીઓને રાહત / બીજા વિભાગના કર્મચારીઓના યૌન શૌષણનો ભોગ બનતી મહિલાઓને POSH હેઠળ ફરિયાદનો હક- HC

• મહિલા યૌન શૌષણ પર હાઈકોર્ટનો મહત્વનો ચુકાદો
• પીડિતા-આરોપી અલગ વિભાગમાં કામ કરતા હોય તો પણ લાગુ પડે POSH
• મહિલાઓને બીજા વિભાગમાં કામ કરતા કર્મચારી સામે યૌન શૌષણની ફરિયાદનો હક 

દિલ્હી હાઈકોર્ટે એવો ચુકાદો આપ્યો છે કે વર્કપ્લેસ (પ્રિવેન્શન, પ્રોહિબિશન એન્ડ રિડ્રેસલ) એક્ટ, 2013 અથવા POSH એક્ટ કાયદા હેઠળ મહિલાઓને તેમના વિભાગની સાથે બીજા વિભાગના કર્મચારીઓના યૌન શૌષણની ફરિયાદ કરવાનો પણ હક છે. કોર્ટે કહ્યું કે મહિલા કર્મચારીની તેની જ ઓફિસમાં કામ કરતા અન્ય કર્મચારી દ્વારા જાતીય સતામણી કરવામાં આવે અને આવો કર્મચારી બીજે ક્યાંય નોકરી કરતો હોય તો તેવા કિસ્સામાં પણ મહિલાને આરોપી સામે ફરિયાદનો હક છે. 

કયા કેસમાં હાઈકોર્ટે આપ્યો ચુકાદો 
કોર્ટ 2010ની બેચના આઈઆરએસ અધિકારી દ્વારા દાખલ કરવામાં આવેલી અરજી પર સુનાવણી કરી રહી હતી, જેમાં કેન્દ્રીય ગ્રાહક બાબતો અને જાહેર વિતરણ મંત્રાલયના ખાદ્ય અને જાહેર વિતરણ વિભાગના એક અધિકારી દ્વારા જાતીય સતામણીનો આરોપ મૂકવામાં આવ્યો હતો.
આ મહિલા કર્મચારીએ પોતાના જ વિભાગની આંતરિક ફરિયાદ સમિતિ સમક્ષ ફરિયાદ નોંધાવી હતી, જેના પગલે અધિકારીને આઇસીસી તરફથી મિટિંગ નોટિસ મળી હતી, જેમાં તેને હાજર થવા જણાવ્યું હતું. જોકે આઇઆરએસ ઓફિસરે સેન્ટ્રલ એડમિનિસ્ટ્રેટિવ ટ્રિબ્યુનલનો સંપર્ક સાધ્યો હતો અને મહિલા કર્મચારીની ફરિયાદની તપાસ માટે આઇસીસીના અધિકારક્ષેત્રની પૂછપરછ કરી હતી. ટ્રિબ્યુનલે અધિકારીનો કેસ ફગાવી દેતા તેને હાઇકોર્ટ સમક્ષ જવાની ફરજ પડી હતી. અરજદાર અધિકારી તરફથી હાજર રહેલા સિનિયર એડવોકેટ અરુણ ભારદ્વાજે એવી દલીલ કરી હતી કે કામના સ્થળે મહિલાઓની જાતીય સતામણીનો કાયદો લાગુ કરવા માટે પોતાના જ વિભાગના સહકર્મી દ્વારા જાતીય સતામણી કરવી પડે છે.

આરોપીએ શું દલીલ કરી 
અરજદાર અધિકારીનો મત એવો હતો કે, એક વિભાગની આઇસીસી તેના અધિકારીની ફરિયાદ પર આ કાયદા હેઠળ બીજા વિભાગના કર્મચારી સામે તપાસ કરી શકે નહીં. કોર્ટે કહ્યું હતું કે અરજદાર અધિકારીની દલીલ કામના સ્થળે જાતીય સતામણીના કાયદા અને તેની નૈતિકતા અને ફિલસૂફીના મૂળ પર પ્રહાર કરવા સમાન છે તેથી આરોપી ભલે બીજે નોકરી કરતો હોય તો પણ તેની સામે યૌન શૌષણનો કેસ ચાલું રહે છે. આ દલીલને આધારે હાઈકોર્ટે આરોપી અધિકારીની અરજી ફગાવી દઈને મહિલાને તેની સામે યૌન શૌષણનો કેસ દાખલ કરવાની મંજૂરી આપી.