એક્શન / હવેથી મહેસાણાના આ વિસ્તારોમાં રાત્રે 11 વાગ્યા બાદ બહાર નીકળ્યાં તો તમારી ખેર નહીં, પોલીસ કરશે કાર્યવાહી, જાણો કેમ

• મહેસાણા એ-ડિવિઝન પોલીસનો મહત્વનો નિર્ણય
• રાત્રે 11 વાગ્યા બાદ ફરતા લોકો સામે કરાશે કાર્યવાહી
• આઝાદ ચોકમાં 5 દુકાનમાં ચોરી થતા પોલીસ એકશનમાં 

મહેસાણામાં ચોરીની ઘટનામાં સતત વધારો થતાં પોલીસ એક્શનમાં આવી છે. મહેસાણા પોલીસે મોડી રાત સુધી ફરતા લોકો સામે કાર્યવાહી કરવાનો નિર્ણય લીધો છે. હવેથી શહેરના કેટલાક વિસ્તારમાં રાત્રીના 11 વાગ્યા બાદ ફરતા લોકો સામે કાર્યવાહી કરવામાં આવશે.  

ચોરીના બનાવો વધતા પોલીસે લીધો નિર્ણય
મહેસાણા એ-ડિવિઝન પોલીસ દ્વારા મહત્વનો નિર્ણય લેવામાં આવ્યો છે. જો કોઈ વ્યક્તિ રાત્રે 11 વાગ્યા પછી શહેર હૈદરી ચોક, આઝાદ ચોક, પટવા પોળ વિસ્તારમાં ફરતા દેખાશે તો તેમની સામે પોલીસ દ્વારા કાર્યવાહી કરવામાં આવશે. એટલું જ નહીં કોઈ વ્યક્તિ રાત્રે 11 વાગ્યા પછી કારણ વગર ફરતા કે બેઠેલા જોવા મળશે તો પણ કાર્યવાહી કરવામાં આવશે. મહેસાણા એ-ડિવિઝન વિસ્તારમાં ચોરીનું પ્રમાણ વધતાં આ નિર્ણય લેવામાં આવ્યો છે. 

કોઈની ભલામણ માન્ય રખાશે નહીંઃ પોલીસ
એ-ડિવિઝન પોલીસે સ્પષ્ટ કર્યું છે કે, આ વિસ્તારોમાં મોડી રાત સુધી જાહેર માર્ગ પર બેસી રહેતા લોકો સામે જો પોલીસ કાર્યવાહી કરે તો કોઈની પણ ભલામણ માન્ય રાખવામાં આવશે નહીં. પોલીસ દ્વારા આગેવાનોને પણ આ મામલે ભલામણ કરવા ન આવવાની અપીલ કરી છે.  

5 દુકાનમાં ચોરી થતા પોલીસ એક્શનમાં 
અત્રે ઉલ્લેખનીય છે કે, મહેસાણા શહેરના આઝાદચોક વિસ્તાર એક જ અઠવાડિયામાં તસ્કરોએ પાંચ દુકાનોમાં ચોરીને અંજામ આપ્યો હતો. જે બાદ હવે એ-ડિવિઝન પોલીસ એક્શનમાં આવી ગઈ છે.