National / 50 વર્ષ બાદ આવી આવી દિવાળી! PM મોદી બોલ્યા- નક્સલવાદનો અંત, વિકાસની નવી લહેર શરૂ!

એક સમયે જ્યાં ગોળીઓના અવાજ અને નક્સલી આતંકનો ડર જોવા મળતો હતો, ત્યાં આજે સુરક્ષાદળોના જવાનો સાથે દેશના વડાપ્રધાન દિવાળીની ખુશીઓ વહેંચી રહ્યા છે. છત્તીસગઢના બસ્તરમાં દિવાળી મનાવવા પહોંચેલા વડાપ્રધાન નરેન્દ્ર મોદીએ નક્સલવાદને લઈને મોટું નિવેદન આપ્યું છે. તેમણે કહ્યું કે હથિયારધારી નક્સલીઓ હવે ચાલ્યા ગયા છે, પરંતુ હવે માનસિક નક્સલીઓ સામે લડવું પડશે. આવા લોકોને ઓળખવાની જરૂર છે. પીએમએ વધુમાં કહ્યું કે દેશની આંતરિક સુરક્ષા મજબૂત હોય ત્યારે બાહ્ય દુશ્મનો સફળ થઈ શકતા નથી, પરંતુ આંતરિક સુરક્ષા નબળી પડે ત્યારે બાહ્ય દુશ્મનો પણ માથું ઊંચકવા લાગે છે.

13મી વખત જવાનો સાથે દિવાળી મનાવવા પહોંચ્યા PM મોદી

વડાપ્રધાન નરેન્દ્ર મોદી રવિવારે છત્તીસગઢના બસ્તરમાં કોબરા ઓપરેશન્સ બેઝ ખાતે CRPFના જવાનો સાથે દિવાળી મનાવવા પહોંચ્યા હતા. આ દરમિયાન તેમણે જવાનોની સામે 42 મિનિટનું ભાષણ આપ્યું હતું. પીએમ મોદી સતત 13મી વખત સુરક્ષાદળોના જવાનો સાથે દિવાળી મનાવવા પહોંચ્યા હતા.

આ પહેલાં 12 વખત તેઓ દેશના અલગ-અલગ સરહદી વિસ્તારોમાં જવાનો સાથે તહેવારની ઉજવણી કરી ચૂક્યા છે. અત્યાર સુધી તેઓ સૌથી વધુ 3 વખત જમ્મુ-કાશ્મીર ગયા છે. જ્યારે હિમાચલ પ્રદેશ અને લદ્દાખની બે-બે વખત મુલાકાત લઈ ચૂક્યા છે.

જવાનોને સંબોધતા પીએમ મોદીએ કહ્યું કે વીર જવાનો સાથે મનાવવામાં આવેલી દરેક દિવાળી તેમના માટે યાદગાર રહી છે. આ વખતે તેઓ બસ્તરના જંગલોમાં જવાનોની વચ્ચે દિવાળી મનાવવા આવ્યા છે. તેમણે જવાનોને પોતાના પરિવારના સભ્યો ગણાવ્યા હતા અને તેમના સાહસ, ત્યાગ, તપસ્યા તથા સમર્પણની પ્રશંસા કરી હતી.

બસ્તરમાં હવે નક્સલી આતંકનો પ્રભાવ ઘટ્યો

PM મોદીએ કહ્યું કે બસ્તરની આ એ જ ભૂમિ છે, જ્યાં એક સમયે નક્સલી આતંકનો કહેર જોવા મળતો હતો. જોકે, સુરક્ષાદળોના જવાનોના સાહસ, બલિદાન અને સમર્પણને કારણે હવે આ વિસ્તારમાં નક્સલી હિંસાનો પ્રભાવ ઘણો ઓછો થયો છે. એક સમયે નક્સલવાદના ડરથી ઓળખાતા આ વિસ્તારમાં હવે વિકાસની નવી લહેર શરૂ થઈ છે. તેમણે વર્ષ 2026ની દિવાળીને વિશેષ ગણાવી હતી. પીએમના જણાવ્યા અનુસાર, 40થી 50 વર્ષ બાદ આવી દિવાળી આવી છે. આ પહેલી દિવાળી છે, જ્યારે દેશે નક્સલવાદ અને માઓવાદી આતંકવાદ સામે દાયકાઓથી ચાલી રહેલી લડાઈમાં નિર્ણાયક સફળતા મેળવી છે.

હવે માનસિક નક્સલીઓ સામે લડવાનું છે

PM મોદીએ પોતાના સંબોધનમાં સૌથી મહત્ત્વની વાત કરતાં કહ્યું કે જંગલોમાંથી હથિયારધારી નક્સલીઓનો સફાયો થયો છે, પરંતુ ખતરો સંપૂર્ણપણે ખતમ થયો નથી. હવે માનસિક નક્સલીઓ સામે લડવાની જરૂર છે. તેમણે કહ્યું કે અનેક સંગઠનોમાં આવા માનસિક નક્સલીઓએ જગ્યા બનાવી લીધી છે. તેઓ લોકોને બંધારણ અને લોકશાહીની વિરુદ્ધ ઉશ્કેરવાનો પ્રયાસ કરી રહ્યા છે. તેથી આવા તત્ત્વોને ઓળખવા અને તેમની સામે સાવચેત રહેવું જરૂરી છે.

PM મોદીના ભાષણની 5 મહત્ત્વની વાતો

1. દેશનો દરેક જિલ્લો નક્સલવાદથી મુક્ત

પીએમ મોદીએ કહ્યું કે વર્ષ 2026ની દિવાળી અત્યંત ખાસ છે. 40થી 50 વર્ષ બાદ પ્રથમ વખત દેશનો દરેક જિલ્લો નક્સલવાદથી મુક્ત થયો છે. હવે કરોડો લોકોના મનમાંથી નક્સલવાદનો ભય દૂર થયો છે.

એક વર્ષમાં CRPFનો એક પણ જવાન શહીદ થયો નથી

પીએમ મોદીએ સુરક્ષાદળોની સફળતાનો ઉલ્લેખ કરતાં કહ્યું કે છેલ્લા એક વર્ષમાં ફરજ દરમિયાન CRPFના કોઈ જવાને પોતાનો જીવ ગુમાવ્યો નથી. આ સુરક્ષાદળોના શૌર્ય, સાહસ અને સરકારની યોગ્ય નીતિઓની જીત છે.

અગાઉની સરકારો નક્સલવાદનો ઉકેલ લાવી શકી નહોતી

પીએમએ અગાઉની સરકારો પર નિશાન સાધતાં કહ્યું કે 2004થી 2013 દરમિયાન દર વર્ષે નક્સલવાદીઓની સરખામણીએ આપણા વધુ જવાનો શહીદ થયા હતા. અગાઉની સરકારોએ નક્સલવાદને એવી બીમારી માની લીધી હતી, જેનો કોઈ ઇલાજ જ નથી. જોકે, હવે સ્થિતિમાં મોટો બદલાવ આવ્યો છે.

માનસિક નક્સલીઓ હજુ પણ ખતરો

પીએમ મોદીએ કહ્યું કે હથિયારધારી નક્સલીઓનો પ્રભાવ ઓછો થયો છે, પરંતુ માનસિક નક્સલવાદીઓ હજુ પણ ખતરો છે. અનેક સંગઠનોમાં આવા લોકો પોતાની જગ્યા બનાવી રહ્યા છે અને લોકોને બંધારણ તથા લોકશાહી વિરુદ્ધ ઉશ્કેરી રહ્યા છે. તેથી તેમની ઓળખ કરવી જરૂરી છે.

આ પણ વાંચો : લાલકૃષ્ણ અડવાણીના જીવનના 10 એવા વળાંકો, જેણે બદલી ભારતીય રાજનીતિની દિશા!

50 કરોડ લોકો ગરીબીમાંથી બહાર આવ્યા

પીએમ મોદીએ વર્લ્ડ બેંકના અહેવાલનો ઉલ્લેખ કરતાં જણાવ્યું કે છેલ્લા 12 વર્ષમાં ભારતના 50 કરોડ લોકો અત્યંત ગરીબીમાંથી બહાર આવ્યા છે. તેમણે આ સિદ્ધિનો શ્રેય સરકારની કલ્યાણકારી યોજનાઓને આપ્યો હતો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ