- મે 2024ની સાલમાં યોજાવાની છે લોકસભાની ચૂંટણી
- નીતિશ કુમારે રાજનીતિમાં મચાવ્યો ખળભળાટ
- બોલ્યાં-2024ની જરુર નથી, ગમે ત્યારે થઈ શકે લોકસભાની ચૂંટણી
આગામી વર્ષે યોજાનારી લોકસભાની ચૂંટણીને ધ્યાનમાં રાખીને તમામ રાજકીય પક્ષો પુરજોશમાં તૈયારીમાં લાગી ગયા છે. એક તરફ ભાજપ સત્તામાં હેટ્રિક લેવાનો દાવો કરી રહી છે, તો વિરોધ પક્ષો ફરી એકવાર મહાગઠબંધનની કવાયતમાં લાગી ગયા છે. 23 જૂને પટનામાં વિપક્ષી પાર્ટીઓની બેઠક બોલાવવામાં આવી છે. આ બધાની વચ્ચે બિહારના મુખ્યમંત્રી નીતિશ કુમાર તરફથી એક મોટું નિવેદન સામે આવ્યું છે, જેમાં તેમણે નિર્ધારિત સમય પહેલા લોકસભા ચૂંટણીની સંભાવના વ્યક્ત કરી છે.
ગમે ત્યારે ચૂંટણી થઈ શકે, તમારુ કામ ઝડપથી પૂરો કરો-નીતિશનો અધિકારીઓને આદેશ
ગ્રામીણ નિર્માણ વિભાગની યોજનાઓના શિલાન્યાસ અને ઉદ્ઘાટન સમારોહમાં બોલતા નીતિશ કુમારે હતું કે, લોકસભાની ચૂંટણી ક્યારે યોજાશે તેની મને ખબર નથી. આવતા વર્ષે, કદાચ આ વર્ષના અંતે ચૂંટણીઓ યોજાઈ શકે છે. અધિકારીઓને નિર્દેશ આપતાં તેમણે કહ્યું હતું કે, "અમે શરૂઆતથી જ કહેતા આવ્યા છીએ કે ઉતાવળ કરો. જેટલું જલદી તમે તેને પૂર્ણ કરશો, તેટલું સારું. ચૂંટણી ક્યારે યોજાશે, તે કોઈને ખબર છે? આવતા વર્ષે ચૂંટણી થાય તે જરૂરી નથી, વહેલા પણ થઈ જાય. છે. તેથી તમારુ કામ ઝડપથી પૂરુ કરો.
ચૂંટણી સમયસર યોજાશે-ભાજપે નીતિશનો દાવો નકારી કાઢ્યો
ભાજપે નીતિશ કુમારના દાવાને નકારી કાઢ્યો છે અને કહ્યું છે કે ચૂંટણી સમયસર યોજાશે. ભાજપના નેતા અરવિંદ કુમાર સિંહે કહ્યું કે ચૂંટણી સમયસર થશે. નીતિશ કુમાર ડરી ગયા છે, એટલે જ તેઓ આવા નિવેદનો આપી રહ્યા છે.
23 જૂને પટનામાં વિપક્ષની મોટી બેઠક
23 જૂને પટણામાં નીતિશ કુમારના આહવાન પર વિપક્ષી પાર્ટીઓની બેઠક થવાની છે. તેમાં કોંગ્રેસ નેતા રાહુલ ગાંધી પણ હાજરી આપશે. આ ઉપરાંત કોંગ્રેસ અધ્યક્ષ મલ્લિકાર્જુન ખડગે, મમતા બેનર્જી, ઉદ્ધવ ઠાકરે, શરદ પવાર, કેજરીવાલ, હેમંત સોરેન, સ્ટાલિન, અખિલેશ યાદવ, સીતારામ યેચુરી, ડી રાજા, દીપાંકર ભટ્ટાચાર્ય સહિતના ડાબેરી નેતાઓ પણ આ બેઠકમાં હાજરી આપશે.
