બિહાર / કોણ છે રમીઝ નેમત? જેની પર લાલુની પુત્રી રોહિણીએ લગાવ્યાં ગંભીર આરોપ, પરિવારમાં બબાલ

Who is Rameez Nemat in RJD: બિહાર વિધાનસભા ચૂંટણીના પરિણામમાં આરજેડીના નેતૃત્વ હેઠળના મહાગઠબંધનની કારમી હાર બાદ, લાલુ પ્રસાદ યાદવના પરિવારમાં આંતરિક ઝઘડો ફાટી નીકળ્યો છે. લાલુ પ્રસાદ યાદવની દીકરી રોહિણી આચાર્યએ પાર્ટીની ખરાબ હાર માટે તેના ભાઈ તેજસ્વી યાદવના નજીકના સાથીઓ સંજય યાદવ અને રમીઝને જવાબદાર ઠેરવ્યા છે. સાથે જ રોહિણીએ પાર્ટી અને પરિવારથી અલગ થવાની જાહેરાત કરી દીધી.

શનિવાર 15 નવેમ્બરના રોજ રોહિણી આચાર્યએ સોશિયલ મીડિયા પર આરજેડી છોડવાની અને લાલુ પરિવારથી દૂર થવાની જે પોસ્ટ કરી, તેમાં ભાઈ તેજસ્વી યાદવના નજીકના સાથીઓ સંજય યાદવ અને રમીઝના નામનો ઉલ્લેખ કર્યો હતો. રોહિણીના બળવાને કારણે એવું અનુમાન છે કે આવનાર સમયમાં લાલુ પરિવારમાં મોટો વિવાદ જોવા મળી શકે છે.

આરજેડીમાં રમીઝ કોણ છે?

આરજેડીને નજીકથી જાણતા લોકોએ છેલ્લા દોઢ વર્ષમાં સંજય યાદવનું નામ વારંવાર સાંભળ્યું છે, જે મૂળ હરિયાણાના છે પરંતુ તેજસ્વી યાદવના ખૂબ નજીકના માનવામાં આવે છે. તે રાજ્યસભાના સાંસદ પણ છે. રોહિણી આચાર્યની પોસ્ટ બાદ લોકોના મનમાં સવાલ છે કે આખરે સંજય યાદવ સિવાય રમીઝ કોણ છે, જેના પર લાલુની દીકરી આટલું ભડકી ગઈ છે.

બહુબલી સપા સાંસદનો પુત્ર છે રમીઝ

આરજેડીમાં તેજસ્વી યાદવનો નજીકનો સાથી અને પરિવારમાં વિવાદાસ્પદ બની ચૂકેલી વ્યક્તિ રમીઝની વાત કરીએ તો તે ઉત્તર પ્રદેશમાં નેપાળ સરહદને અડીને આવેલા જિલ્લા બલરામપુરનો રહેવાસી છે. બલરામપુરના ભંગહા કલા વિસ્તારનો રહેવાસી રમીઝ હાલમાં બિહારમાં વસ્યો છે. ખાસ વાત એ છે કે તે સપાના પૂર્વ સાંસદ રિઝવાન ઝહીરનો જમાઈ છે.

આ પણ વાંચો: VIDEO : દિલ્હી બ્લાસ્ટના આતંકીનો નવો વીડિયો સામે આવ્યો, જુઓ બ્લાસ્ટ પહેલાં શું કર્યું

રમીઝ પર ફિરોઝ પપ્પુની હત્યાના ગંભીર આરોપ

રમીઝનું આખું નામ રમીઝ નેમત ખાન છે અને તેના પિતાનું નામ નિયમતુલ્લાહ ખાન છે. તેના પર બલરામપુરમાં તુલસીપુર નગર પંચાયતના અધ્યક્ષ ફિરોઝ પપ્પુની 4 જાન્યુઆરી, 2022ના રોજ હત્યાના કરવાના ગંભીર આરોપ છે. તેના લગ્ન રિઝવાન ઝહીરની દીકરી ઝેબા રિઝવાન સાથે થયા છે અને હાલમાં તે પટનામાં રહે છે અને તેજસ્વી યાદવ સાથે તેના ઘણા ગાઢ સંબંધ હોવાનું માનવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ