અરેરાટી / પંચમહાલથી મજૂરી કરવા આવેલા મુકેશના 3 બાળકોના હોજમાં ડૂબી જવાથી મોત, ત્રણેય સગા ભાઇઓ હોવાથી પરિવારમાં રોકકળાટ

• વાડીના હોજમાં ડૂબી જવાથી ત્રણ બાળકોના મોત 
• પંચમહાલના વતની મુકેશભાઈના 3 પુત્રોના મોત 
• એક જ પરિવારના ત્રણ સંતાનોના મોતથી શોકનો માહોલ

Kutch News: કચ્છમાંથી આજે ખૂબ જ દુઃખદ સમાચાર સામે આવ્યા છે. જેમા કચ્છના વડઝરની વાડીના હોજમાં ડૂબી જવાથી ત્રણ સગાભાઈઓના દુઃખદ અવસાન થયા છે. એક જ પરિવારના ત્રણ બાળકોના મોતથી પરિવારમાં શોક છવાયો છે. ‘બુટ ભવાની ફાર્મ’માં બનેલી ગોઝારી ઘટનાથી ભારે ચકચાર ફેલાઈ છે. પોલીસે સમગ્ર મામલે વધુ તપાસ હાથ ધરી છે. 

હોજમાં ન્હાવા પડ્યા હતા ત્રણ બાળકો
મળતી માહિતી અનુસાર, ભુજના વડઝર ખાતે આવેલા બુટભવાની ફાર્મ પર પંચમહાલ જિલ્લાના હાલોલના મુકેશ નાયક છેલ્લા 6 વર્ષથી ખેતમજૂરી કરીને પોતાના પરિવારનું ગુજરાન ચલાવે છે. ગઈકાલે મુકેશભાઈના ત્રણ દીકરા કરણ, મનીષ અને શૈલેષ વાડીમાં આવેલા હોજમાં ન્હાવા પડ્યા હતા. આ દરમિયાન તેઓ અચાનક હોજના ઊંડા પાણીમાં ડૂબી ગયા હતા.

હોજમાંથી કાઢી હોસ્પિટલમાં ખસેડાયા
આ અંગેની જાણ થતાં જ ત્રણેય બાળકોને હોજમાંથી બહાર કાઢવામાં આવ્યા હતા. જે બાદ તેઓને તાત્કાલિક ભુજની જી.કે જનરલ હોસ્પિટલ ખાતે ખસેડવામાં આવ્યા હતા. જ્યાં ફરજ પર હાજર તબીબોએ ત્રણેયને મૃત જાહેર કરતા પરિવાર પર આભ તૂટી પડ્યું હતું. એક સાથે ત્રણ દીકરાના મોત નિપજતાં માતા-પિતા ધ્રુસકેને ધ્રુસકે રડી પડ્યા હતા. 
 
પરિવારમાં ગમગીની છવાઈ
તો આ અંગેની જાણ થતાંની સાથે જ માનકુવા પોલીસની ટીમ પણ હોસ્પિટલ ખાતે દોડી આવી હતી. વડઝર ખાતે બનેલી ગોઝારી ઘટનાથી મૃતકોના પરિવારમાં ગમગીની છવાઈ છે. હાલ આ મામલે પોલીસે વધુ તપાસ હાથ ધરી છે. 

મૃતકોના નામ
- મનીષ મુકેશ નાયક  (ઉં.વ 7)
- કરણ મુકેશ નાયક (ઉં.વ 5)
- શૈલેષ મુકેશ નાયક (ઉં.વ 10)