એકસાથે ઉઠી 6 અર્થીઓ / એક જ કુટુંબના છ લોકોના નિધન, એકસાથે અર્થી ઉઠતાં ગામ આખું હિબકે ચડ્યું: બગોદરા અકસ્માતમાં ભરખી ગયો કાળ, પરિવારનું હૈયાફાટ રુદન

• અમદાવાદ જિલ્લાના બગોદર-બાવળા હાઇવે પર અકસ્માતનો મામલો
• સુણદા ગામના ઝાલા પરિવારના 6 વ્યક્તિઓને કાળ ભેટી જતા ગમગીની
• એકી સાથે 6 લોકોની આર્થી ઉઠતા ગામમાં સર્જાયા કરુણ દ્રશ્યો

અમદાવાદ જિલ્લાના બગોદર બાવળા હાઇવે પર ગઈકાલે અકસ્માતની ગોઝારી ઘટના સામે આવી હતી. બંધ ટ્રક પાછળ છોટાહાથી ઘુસી જતા અકસ્માત સર્જાયો હતો. જેમાં એકી સાથે 12-12 લોકોના મૃત્યુ નીપજતા માર્ગ મરણચીસોથી ગુંજયો હતો.જેમાં એક જ પરિવારના 6 લોકો હતા. અકસ્માતમાં મોતને ભેટનાર ઝાલા પરિવારના હતભાગીઓ ખેડા જિલ્લાના કપડવંજ તાલુકાના સુણદા ગામના વતની હતા.કુટુંબને કાળ ભરખી ગયા બાદ જાણે કોઈ આંસુ લુછનારું ન હોય તેવી સ્થિતિનું નિર્માણ થયું હતું. 

મધરાતે જ અંતિમવિધિ કરાતા રોક્કડ

જ્યારે અન્ય આજુ બાજુના વતની છે. અકસ્માત બાદ પોલીસે મૃતદેહનો કબજો સંભાળ્યો હતો. જેની જરૂરી કાર્યવાહી બાદ પરિવારજનોને સોંપતા મૃતદેહોને ગામમાં લાવવામાં આવ્યા હતા. ગામમાં મૃતદેહોના ખડકલાને લઈને હૈયું ચરાઈ જાય તેવા કરુણ દ્રશ્યો સર્જાયા હતા. મધરાતે જ અંતિમવિધિ કરાતા રોકકળાટ ફેલાયો હતો.

ગામમાં કોઈએ ચૂલો ન સળગાવ્યો

કપડવંજ તાલુકાના સુણદા ગામના પ્રવેશ કરવાના રસ્તે જ પીએસી સેન્ટર પાસે રામદેવપીર મંદિર નજીક રહેતા ઝાલા પરિવારના 6 વ્યક્તિઓને કાળ ભેટી ગયા બાદ નાના એવા ગામમાં કાળો કલ્પાત ફેલાયો હતો. આખું ગામ હિબકે ચડતા કરુણ દ્રશ્યો સર્જાયા હતા અને લગભગ 3200 જેટલી વસ્તી ધરાવતા આ ગામમાં કોઈએ ચૂલો ન સળગાવી દુઃખમાં ભાગીદાર બન્યા હતા.

3 હજાર જેટલા લોકો અંતિમયાત્રામાં જોડાયા
પોલીસની જરૂરી કાર્યવાહી બાદ મૃતદેહોને ગામમાં લાવવામાં આવ્યા હતા. જ્યાં પરિવારજનો દ્વારા રાત્રે જ તેની અંતિમવિધિ કરવામાં આવી હતી. જેમાં એકી સાથે છ લોકોની અર્થી ઉઠતા ગામના લોકોએ ભારે હૈયે કાંધ આપી અગ્નિસંસ્કાર કર્યા હતા. 3 હજાર જેટલા લોકો અંતિમયાત્રામાં જોડાયા હતા. જેને લઈને સમગ્ર ગામમાં ગમગીની છવાઈ હતી.