એક્શન / IT વિભાગનો સપાટો: ગુજરાતનાં 4 હજાર ટેક્સપેયર્સને એકસાથે નોટિસ, પોલિટિકલ પાર્ટીઓને ડોનેશન મામલે કાર્યવાહી

• રાજકીય પક્ષોને ડોનેશન આપી કર ચોરીની આશંકા
• IT વિભાગ સમગ્ર મામલે થયું સક્રિય 
• રાજ્યના 4 હજાર ટેક્સપેયર્સને IT વિભાગે ફટકારી નોટિસ

ઇન્કમ ટેક્સ એક્ટની કલમ 80GGC અને 80GGB હેઠળ વ્યક્તિઓ અને કંપનીઓ દ્વારા રાજકીય પક્ષને દાનમાં આપેલી રકમના 100% પર કપાતનો દાવો કરી શકે છે. જો તે પાત્ર કરદાતાની કરપાત્ર આવક કરતાં વધુ ન હોય તો સમગ્ર યોગદાનને કર કપાત માટે મંજૂરી આપવામાં આવે છે. આ કલમનો ફાયદો ઉઠાવીને ઘણી કંપનીઓ અને વ્યક્તિઓ ઇન્કમ ટેક્સ ભરવામાંથી છટકબારી શોધતી હોય છે. જેની સામે ગુજરાત રાજ્ય ઇન્કમ ટેક્સ ડીપાર્ટમેન્ટ તરફથી લાલ આંખ કરવામાં આવી છે.

બોગસ ડોનેશન મુદ્દે IT વિભાગ એક્શનમાં 

ગુજરાતમાં આઇટી વિભાગે ફરી એકવાર સપાટો બોલાવ્યો છે.  રાજકીય પક્ષોને ડોનેશન આપી કર ચોરીની આશંકા જણાતા  IT વિભાગ સક્રિય થયું છે.બોગસ ડોનેશન મુદ્દે IT વિભાગે રાજ્યના 4 હજાર ટેક્સપેયર્સને નોટિસ ફટકારી છે. ઇન્કમટેક્સ બચાવવા રાજકીય પક્ષોને ડોનેશન અપાતા હોય છે. વળી જે પાર્ટી સક્રિય ન હોય તેવી પાર્ટીમાં ડોનેશન દર્શાવીને કરચોરી કરતા હોય છે. વળી ટેક્સ પે ન કરવો પડે તે માટે  પાર્ટીનું રજિસ્ટ્રેશન કરાવીને ડોનેશનના નામે કરચોરી થતી હોય તેવી આશંકા સેવવામાં આવી છે જેને લઇને આઇટી વિભાગ દ્વારા નોટિસ ફટાકારીને તપાસનો ધમધમાટ શરૂ કરાયો છે. મહત્વનું છે કે અગાઉ પણ અનેક સંસ્થાઓ, કરદાતા અને ટ્રસ્ટો દ્વારા કરચોરી કરી હોવાનું સામે આવ્યું હતું. ત્યારે આઇટી વિભાગ દ્વારા  4 હજાર ટેક્સપેયર્સને નોટિસ ફટકારીને બોગસ ડોનેશનની ખરાઇ શરૂ કરી છે.