વિકાસદર / દેશનો GDP વૃદ્ધિ દર 2019-20માં રહેશે 6.7 ટકા, ઈન્ડિયા રેટિંગ્સે લગાવ્યું અનુમાન

રેટિંગ એજન્સીએ અગાઉ વિકાસદર (Growth rate) ૭.૩ ટકા રહેવાની આશા વ્યક્ત કરી હતી, પરંતુ હવે વપરાશ અને માગમાં ઘટાડો, નબળું ચોમાસું અને મેન્યુફેક્ચરિંગ સેક્ટરના વૃદ્ધિદરમાં આવેલ ઘટાડાના કારણે દેશનો વિકાસદર ઘટી શકે છે. થોડા દિવસ પૂર્વે વિદેશી રેટિંગ એજન્સી મૂડીઝ ઇન્વેસ્ટર સર્વિસે પણ કેલેન્ડર વર્ષ ૨૦૧૯ માટે દેશના વિકાસ અનુમાનને ૬.૮ ટકાથી ઘટાડીને ૬.૨ ટકા કર્યું હતું. ફિક્કીએ પણ પોતાના રિપોર્ટમાં જણાવ્યું હતું કે ચાલુ નાણાંકીય વર્ષના પ્રથમ ક્વાર્ટરમાં ભારતનો વૃદ્ધિદર છ ટકા રહેશે.

એપ્રિલ-જૂન-૨૦૧૮-૧૯માં દેશનો આર્થિક વૃદ્ધિદર ૮.૨ ટકા જોવા મળ્યો હતો. ઇન્ડિયા રેટિંગ્સે વધુમાં જણાવ્યું કે આંતરરાષ્ટ્રીય ટ્રેડ વોરના કારણે દેશની નિકાસ પ્રભાવિત થશે. આ ઉપરાંત ઇન્સોલવન્સી એન્ડ બેન્કરપ્સી કોડ (આઇબીસી) લોન બાબતે કોઇ સ્થિતિ સુધારવામાં નિષ્ફળ જતાં વિકાસદરના અનુમાનને ઘટાડવામાં આવ્યું છે. ઇન્ડિયા રેટિંગ્સે પોતાના રિપોર્ટમાં એમ પણ જણાવ્યું છે કે ચાલુ નાણાકીય વર્ષના પ્રથમ ક્વાર્ટર એટલે કે જૂન ક્વાર્ટરમાં વિકાસદર ૫.૭ ટકા રહી શકે છે. વિકાસદરમાં આ સતત પાંચમા ક્વાર્ટરમાં ઘટાડો જોવા મળશે. બીજા છ માસમાં બેઝ ઇફેક્ટના કારણે વિકાસદર વધીને ૭.૬ ટકા પર પણ પહોંચી શકે છે.