- સુરત જિલ્લામાં રખડતાં શ્વાનનો આતંક
- સુરતમાં શ્વાને બાળકો ઉપર કર્યો જીવલેણ હુમલો
- ગ્રામજનોએ શ્વાનને ઉતાર્યો મોતને ઘાટ
સુરત જિલ્લામાં રખડતાં શ્વાનનો આતંક યથાવત જોવા મળી રહ્યો છે. જેમાં વધુ એક વાર ઓલપાડના કન્યાસી ગામે શ્વાને ૩ બાળકો ઉપર હુમલો કર્યાનું સામે આવ્યું છે, જે ઘટનાના સીસીટીવી ફૂટેજ પણ સામે આવ્યા છે અને રોષએ ભરાયેલા ગ્રામજનોએ શ્વાનને મોતને ઘાટ ઉતારી દેતા ચકચાર મચી છે.
રખડતા શ્વાને જીવલેણ હુમલો કર્યો
સુરત જિલ્લાના ઓલપાડ તાલુકાના ટાંકી ફળિયું અને પટેલ ફળિયુ ખાતે એમ બે અલગ અલગ જગ્યાએ રખડતા શ્વાને ત્રણ બાળકોને બચકાં ભર્યા હોવાની ઘટના સામે આવી છે. ઈજાગ્રસ્ત બાળકોને સારવાર અર્થે હોસ્પિટલ ખસેડવામાં આવ્યા છે બીજી તરફ આ સમગ્ર ઘટનાના સીસીટીવી ફૂટેજ પણ સામે આવ્યા છે,કન્યાસી ગામે આવેલ ટાંકી ફળિયા અને પટેલ ફળિયામાં બાળકો ઘર આંગણે રમી રહ્યા હતા તે દરમ્યાન ૩ જેટલા બાળકો પર રખડતા શ્વાને જીવલેણ હુમલો કર્યો હતો. બે બાળકીઓ અને એક બાળક પર શ્વાને હુમલો કરતા ગામમાં ચકચાર મચી જવા પામી છે. બીજી તરફ બાળકોને ઈજા પહોચતા તેઓને સારવાર અર્થે હોસ્પિટલ ખસેડવામાં આવ્યા છે. જ્યારે બીજા બે બાળકોને સારવાર અર્થે સુરતની સિવિલ હોસ્પિટલ ખાતે ખસેડવામાં આવ્યા છે.
શ્વાનોને લઈને નક્કર કામગીરીની લોકમાંગ
બાળકી કાર પાસે રમી રહી હતી તે દરમ્યાન એક શ્વાન આવીને બાળકી પર તૂટી પડ્યો હતો. જેથી બાળકી બુમાબુમ કરી રહી હતી. અને ત્યાં રહેલી દુકાનમાંથી એક મહિલા દોડી આવી હતી. બીજી તરફ ત્યાં ગામજનો પણ એકઠા થઇ ગયા હતા અને શ્વાનને પત્થર મારી ત્યાંથી ભગાડ્યો હતો,રોષે ભરાયેલા લોકો શ્વાનની પાછળ પડી ગયા હતા અને અંતે તેને મોતને ઘાટ ઉતારી દીધો હતો,શ્વાનના હુમલાની આ ઘટનાને લઈને ગ્રામજનોમાં ભય જોવા મળી રહ્યો છે.મહતવનું છે કે સુરત શહેર સહિત જિલ્લામાં રખડતા શ્વાનોનો આતંક વધી રહ્યો છે.ખજોદ અને ભેસ્તાન વિસ્તારમાં બાળકોને શ્વાને બચકા ભરતા તેનું મોત થયું હતું. તેમજ આ અગાઉ પલસાણા ખાતે પણ બાળક પર શ્વાને હુમલો કરતા તેનું મોત થયું હતું. ત્યારે શ્વાને બચકા ભરવાની વધુ એક ઘટના સુરતના ઓલપાડ તાલુકાના કન્યાસી ગામે બની છે. ત્યારે શ્વાનોને લઈને નક્કર કામગીરી કરે તેવી લોકમાંગ ઉઠવા પામી છે.
