મોટો આરોપ / સફેદ રણમાં કાળો કારોબાર: કચ્છમાં એગ્રોસેલ-સોલારિસ કંપની પર ગેરકાયદે મીઠું પકવવાનો આક્ષેપ, અગરિયાઓની આંદોલનની ચીમકી

• કચ્છના મોટા રણમાં મીઠુ પકવવાનો મામલો
• અગરિયાઓએ આપી આંદોલનની ચીમકી
• ગેરકાયદે મીઠાનું માઈનિંગ થવાનો આક્ષેપ

માફિયાઓ કચ્છના નાના રણમાં મોટી જાળ વિકસાવીને બેઠા છે. કચ્છમાં ચાલતા મીઠાના કાળા કારોબારને હવે મીઠું પકવતા અગરિયાઓ જ ઉજાગર કરી રહ્યા છે. અને આરોપ મૂકી રહ્યા છે કે એગ્રોસેલ અને સોલારિસ કંપની ગેર કાયદે માઇનીંગ કરી રહી છે છતાંય ન કચ્છનું તંત્ર રોક ટોક કરી રહ્યું છે ન તો સરકાર..

એગ્રોસેલ અને સોલારિસ કંપની ગેર કાયદે માઇનીંગ કરે છે: અગરીયા
કચ્છમાં લાખો એકર જમીનમાં ગેરકાયદે મીઠું પકવાય છે એટલું જ નહીં નેતાઓ અને અધિકારીની મીલી ભગતથી સફેદ મીઠાનો કાળો કારોબાર કરવામાં આવ્યો હોવાના અનેક વખત દાવા થઈ ચૂક્યા છે પણ પરિણામમાં માત્ર તપાસ તપાસને તપાસ કરી મામલો ભીનો સંકેલી દેવામાં આવે છે. પણ કચ્છ મોટા રણમાં મીઠું પકવતા અગરિયાઓ હવે બીડું ઝડપ્યું છે. અને એગ્રોસેલ અને સોલારિસ કંપની પર ગેર કાયદે માઇનીંગનો આરોપ મૂક્યો છે કે કંપનીઓને માત્ર બ્રોમીન બનાવવાની સરકારે પરમીશન આપી છે. પણ કંપનીઓ મીઠાનું ગેરકાયદેસર રીતે નજીવા ભાવે વેંચાણ કરી રહી છે જેથી અગરીયાઓને બહુ મોટું નુકસાન થઈ રહ્યું છે. 

કંપનીઓ દ્વારા થતા વેચાણથી પરંપરાગત અગરિયાઓને નુકશાન-અગરીયા
મહત્વનું છે કે અગરીયાઓના આરોપ મુજબ સરકારે એગ્રોસેલ-સોલારિસ કંપનીને જમીનો ભાડા પેટે આપી છે. કંપનીઓ પાસે મીઠાના વેંચાણ કરવાની કોઈ મંજુરી નથી. છતાંય આ બંને કંપનીઑ મીઠું પકવી તેને કાળા બજારના ભાવે એટલે સાવ સસ્તા ભાવે વેચાણ કરી રહી છે. કંપનીના ગેરકાયદે વલણને લીધે અને કંપનીઓ દ્વારા થતા વેચાણથી પરંપરાગત અગરિયાઓને સૌથી મોટું નુકશાન વેઠવાનો વારો આવ્યો છે. કંપનીના આ કાળા વલણને લીધે અગરીયાઓને પણ મીઠું નજીવા ભાવે વેચવાનો વારો આવ્યો છે જેથી  હાલત કફોડી બની ગઈ છે. 

ઉકેલ ન આવે તો મોટી સંખ્યામાં અગરિયાઓ ગાંધીનગર પહોંચશે
સરકારને પણ એગ્રોસેલ અને સોલારિસ કંપનીની મનમાની વિષે અનેક વખત રજૂઆતો કરવામાં આવી છે છતાંય હાલની તારીખ સુધી કોઈ ઉકેલ ન આવતા અગરિયાઓએ આંદોલનની ચીમકી ઉચ્ચારી છે. અને આવનાર સમયમાં મોટી સંખ્યામાં અગરિયાઓ ગાંધીનગર પહોંચશે તેવી હામ ભરી સરકારને આ સમસ્યાનો કાયમી ઉકેલ લાવવા અનુરોધ કર્યો છે.