પ્રતિક્રિયા / 'સમાધાન ન કર્યું તેથી મારી સામે ખોટી કાર્યવાહી કરાઈ' અટકાયત બાદ રાજુ સોલંકીનું નિવેદન

જુનાગઢમાં ગણેશ જાડેજા સામે ફરીયાદ નોંધાવનાર રાજુ સોલંકી હવે ખુદ આરોપી બની ગયા છે ત્યારે રાજુ સોલંકીએ આક્ષેપ કર્યો છે કે તેમને અને તેમના પરિવારજનોને ખોટી રીતે હેરાન કરવામાં આવી રહ્યા છે. તેમણે કહ્યું કે જયરાજસિંહે તેમને સમાધાન કરવા માટે દબાણ કર્યુ હતું પરંતુ પોતે સમાધાન કરવાની ના પાડતા પોતાને હેરાન કરવામાં આવી રહ્યા છે, અને ખોટી કાર્યવાહી કરવામાં આવી રહી છે.

મહત્વપૂર્ણ છે કે રાજુ સોલંકી સામે ગુજસીકોટ હેઠળ કાર્યવાહી કરવામાં આવી રહી છે. રાજુ સોલંકી પર મારામારીનો આરોપ છે. રાજુસોલંકી સામે કાર્યવાહીને આ કેસનો મોટો વળાંક માનવામાં આવે છે કારણ કે અત્યાર સુધી રાજુ સોલંકી ફરીયાદીની ભૂમિકામાં હતા પરંતું હવે તેમની સામે જ આરોપ લાગ્યા છે.

કોણ છે રાજુ સોલંકી ?

રાજુ સોલંકી સંજય સોલંકીના પિતા છે. સંજય સોલંકી એ વ્યક્તિ છે જેનું અપહરણ કરીને નગ્ન કરી માર મારતો વીડિયો ઉતારવાનો ગણેશ જાડેજા પર આરોપ છે..અને ગણેશ જાડેજા પૂર્વ ધારાસભ્ય જયરાજસિંહ જાડેજા અને વર્તમાન ધારાસભ્ય ગીતાબા જાડેજાના પુત્ર છે.

ગણેશ જાડેજા( પૂર્વ ધારાસભ્ય જયરાજસિંહ જાડેજાના પુત્ર ) સામે ફરીયાદ નોંધાવેલી છે

રાજુ સોલંકીએ જ પોતાના પુત્ર સાથે જે કંઇ થયું તેને લઇને ગણેશ જાડેજા સામે ફરીયાદ નોંધાવી હતી અને રાજુ સોલંકી જ એ ફરીયાદી છે જેણે જયરાજસિંહ જાડેજાની પણ ધરપકડની માંગ કરી હતી.

એટલું જ નહીં થોડા સમય પહેલા આ સમગ્ર મામલામાં યોગ્ય કાર્યવાહી ન થઇ રહી હોવાના આક્ષેપ સાથે તેમણે મુસ્લીમ ધર્મ અંગીકાર કરવાની ચીમકી પણ આપી હતી.આ કેસમાં હવે ફરીયાદી સામેજ ગુજસીટોક હેઠળ કાર્યવાહી થતા મોટો વળાંક આવ્યો છે.