અમદાવાદ / VIDEO : "અમારી સાથે પણ આવું બને છે", નિરમા યુનિ.માં પ્રોફેસર દ્વારા વિદ્યાર્થીનો કાંઠલો પકડવા પર બોલ્યાં હકાભા ગઢવી

ગત રોજ અમદાવાદની નિરમા યુનિવર્સિટીમાં પ્રોફેસરે વિદ્યાર્થીને સ્ટેજ પર બોલાવીને કાંઠલો પકડીને તેને ધમકાવ્યો હતો. હવે આ વિવાદ પર હાસ્ય કલાકાર હકાભા ગઢવીની પ્રતિક્રિયા સામે આવી છે. હકાભા ગઢવીએ કહ્યું કે અમારી સાથે પણ આવી ઘટના બને છે પરંતુ આક્રોશિત થવાની જરૂર રહેતી નથી. જાહેરમાં વિદ્યાર્થીને ધમકાવવાથી તેની ખૂબ મોટી અસર થતી હોય છે. તેમણે કહ્યું કે વિદ્યાર્થીને ઠપકો આપવો હોય તો ઓફિસમાં લઈ જઈને તેને સમજાવવું પડે. આ પ્રકારે જાહેરમાં કોલર પકડવાથી ધમકાવાથી તેની ખૂબ મોટી અસર થતી હોય છે અને આ માટે પ્રોફેસર માફી માંગવી જોઈએ.

શું બન્યો હતો બનાવ?

અમદાવાદની નિરમા યુનિવર્સિટીમાં કેમ્પસ કાર્યક્રમ દરમિયાન પ્રોફેસર અને વિદ્યાર્થી વચ્ચે થયેલી ઉગ્ર બોલાચાલી ચર્ચાનો વિષય બની છે. આ ઘટનાનો વીડિયો સોશિયલ મીડિયા પર વાયરલ થયા બાદ, વિદ્યાર્થી સંગઠન NSUI એ યુનિવર્સિટી પ્રશાસન પાસે હસ્તક્ષેપની માંગ કરી છે. એવો આરોપ છે કે કાર્યક્રમ દરમિયાન એક વિદ્યાર્થીની ટિપ્પણીને કારણે વિભાગના વડા, પ્રોફેસરે સ્ટેજ પર બોલાવીને તેને ઠપકો આપ્યો હતો. વિદ્યાર્થી સંગઠને આ ઘટનાને વિદ્યાર્થીના ગૌરવ અને સલામતી સાથે સંબંધિત ગણાવી છે અને તપાસ અને જાહેર માફી માંગવાની માંગ કરી છે.

પ્રોફેસરના ભાષણ વચ્ચે વિદ્યાર્થીએ કરી હતી કોમેન્ટ

અમદાવાદની નિરમા યુનિવર્સિટીમાં આયોજિત એક કાર્યક્રમમાં સ્ટેન્ડ-અપ કોમેડિયન રજત સૂદ હાજર હતા. ઇલેક્ટ્રોનિક્સ અને કોમ્યુનિકેશન વિભાગના વડા ડૉ. એચ.કે. પટેલ સભાને સંબોધિત કરી રહ્યા હતા. એવો આરોપ છે કે પ્રેક્ષકોમાંના એક વિદ્યાર્થીએ ફિલ્મની પ્રખ્યાત પંક્તિ "જલ્દી બોલ, પનવેલ નિકલા હૈ સુબહ" બોલી હતી.

વધુ વાંચો : રાજકોટની મારવાડી યુનિવર્સિટીમાં વિદ્યાર્થીનો આપઘાત, કેમ્પસમાંથી લગાવી છલાંગ, 7 દિવસમાં બીજો બનાવ

વિદ્યાર્થીને સ્ટેજ પર બોલાવીને કાંઠલો પકડ્યો

વાયરલ વીડિયો અને અન્ય માહિતી અનુસાર, ટિપ્પણી સાંભળ્યા પછી, પ્રોફેસરે વિદ્યાર્થીને સ્ટેજ પર બોલાવ્યો. એવો આરોપ છે કે તેમણે વિદ્યાર્થીનો કોલર પકડી લીધો અને ચેતવણી આપી કે જો તે કેમ્પસમાં કોઈપણ ફેકલ્ટી સભ્યનું અપમાન કરશે તો ગંભીર શિસ્તભંગના પગલાં લેવામાં આવશે. આ ઘટનાનો વીડિયો ઝડપથી સોશિયલ મીડિયા પર વાયરલ થયો, જેના કારણે વ્યાપક ચર્ચા શરૂ થઈ ગઈ હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ