હવામાન અપડેટ / કમોસમી વરસાદનો કહેર, છેલ્લા 24 કલાકમાં 72 તાલુકામાં વરસાદ, આજે પણ 10 જિલ્લામાં આગાહી

Gujarat Unseasonal Rain : ગુજરાતમાં ભરઉનાળે હવામાનમાં અચાનક મોટો ફેરફાર જોવા મળી રહ્યો છે. છેલ્લા 24 કલાક દરમિયાન રાજ્યના 72 તાલુકાઓમાં વરસાદ નોંધાયો છે, જેના કારણે સમગ્ર રાજ્યમાં વરસાદી માહોલ છવાઈ ગયો છે. એક તરફ લોકોને ગરમીમાંથી રાહત મળી છે, તો બીજી તરફ ખેડૂતો માટે ચિંતા વધી છે.

વરસાદના આંકડા પર નજર કરીએ તો અમરેલી જિલ્લાના બગસરામાં સૌથી વધુ 1.61 ઈંચ વરસાદ નોંધાયો છે. ચોટીલામાં 1.54 ઈંચ, રાજકોટ અને ભેસાણમાં 1.38 ઈંચ વરસાદ પડ્યો છે. ઉપલેટા, ધોરાજી અને ઓખા જેવા વિસ્તારોમાં આશરે 20 મીમી વરસાદ નોંધાયો છે. આ ઉપરાંત સાવરકુંડલા, ચુડા, મુંદ્રા, લોધિકા, લાલપુર અને વિસાવદર જેવા વિસ્તારોમાં પણ મધ્યમ પ્રમાણમાં વરસાદ નોંધાયો છે.

આજે 10 જિલ્લામાં વરસાદની આગાહી

હવામાન વિભાગની આગાહી મુજબ આજે પણ રાજ્યના લગભગ 10 જિલ્લાઓમાં કમોસમી વરસાદ ચાલુ રહી શકે છે. બનાસકાંઠા અને સાબરકાંઠા જિલ્લામાં હળવાથી મધ્યમ વરસાદની શક્યતા છે. અરવલ્લી, પંચમહાલ અને મહીસાગર જિલ્લામાં પણ વાદળછાયું વાતાવરણ સાથે વરસાદી ઝાપટાં પડી શકે છે.

આ પણ વાંચો : તોફાની પવનનો કહેર: મનપાનું બોર્ડ પડતા યુવકનું મોત, રાજ્યભરમાં વરસાદી માહોલ

આ ઉપરાંત દાહોદ, છોટા ઉદેપુર અને ભાવનગરમાં પણ વરસાદની આગાહી કરવામાં આવી છે. સૌરાષ્ટ્ર અને કચ્છ વિસ્તારમાં આવેલા અમરેલી અને કચ્છ જિલ્લામાં પણ છૂટાછવાયા સ્થળોએ વરસાદ પડી શકે છે. આ કમોસમી વરસાદને કારણે ખેડૂતો પર ખાસ અસર પડી રહી છે. ઘણા વિસ્તારોમાં લણણી માટે તૈયાર પાક ભીંજાઈ ગયા છે, જેના કારણે નુકસાન થવાની ભીતિ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ