દુખદ / બનાસકાંઠાના આર્મી જવાન જમ્મુ-કાશ્મીરમાં શહીદ, ગાર્ડ ઓફ ઓનર સાથે વતનમાં અંતિમ વિદાય

Bhavesh Chaudhary Martyred : ગુજરાતના બનાસકાંઠા જિલ્લાના લાખણી તાલુકાના નાદલા ગામના યુવક ભાવેશ ચૌધરી જમ્મુ કાશ્મીરમાં થયેલા ગ્રેનેડ વિસ્ફોટમાં દરમિયાન શહીદ થયા છે. તેમનું આ બલિદાન માત્ર તેમના પરિવારજનો માટે નહીં પરંતુ સમગ્ર રાજ્ય અને રાષ્ટ્ર માટે ગૌરવનું અને સાથે સાથે ગમગીનીનું કારણ બની રહ્યું છે. આ તરફ આજે તેમનો પાર્થિવ દેહ વતનમાં પહોંચતા હજારોની સંખ્યામાં લોકો તેમને શ્રદ્ધાંજલિ અર્પણ કરવા પહોંચ્યા હતા.

શહીદ ભાવેશ ચૌધરી 18 મેડિકલ અસિસ્ટન્ટ કોપ્સમાં ફરજ બજાવતા હતા. શહીદના શહીદીના સમાચાર જ્યારે તેમના વતન નાદલા પહોંચ્યા ત્યારે આખું ગામ શોકમગ્ન થઈ ગયું.

લોકો ગર્વ અને દુઃખના ભીના ભાવ સાથે શહીદના પરિવારને મળવા ઉમટી પડ્યા. ગામના વડીલ, યુવાનો અને બાળાઓએ શ્રદ્ધાંજલિ અર્પણ કરી. સમગ્ર લાખણી તાલુકામાં દેશભક્તિની લાગણી સાથે એક અવિસ્મરણીય શોકમય માહોલ જોવા મળ્યો.

આ પણ વાંચો : નવમાં નોરતે સરદાર સરોવર ડેમ છલોછલ, ભૂપેન્દ્ર પટેલે નર્મદા મૈયાના કર્યા વધામણાં

ગાર્ડ ઓફ ઓનર સાથે શહીદને અંતિમ વિદાય

શહીદ ભાવેશ ચૌધરીના પાર્થિવ દેહને તેમના વતન લાવવામાં આવ્યો અને સમગ્ર સૈનિક પરંપરા પ્રમાણે તેમને રાજકીય સન્માન સાથે અંતિમ વિદાય અપાઈ. લશ્કરી જવાનો દ્વારા ‘ગાર્ડ ઓફ ઓનર’ આપવામાં આવ્યું અને હજારો લોકોની હાજરીમાં શહીદને ભીની આંખોથી વિદાય આપવામાં આવી.

ધાનેરાથી નાદલા સુધી નીકળેલી અંતિમ યાત્રા એ માત્ર એક વિદાય નહોતી પણ એ રાષ્ટ્રભક્તિની ભાવના, એક યુવકના બલિદાન અને આખા સમાજના સમ્માનની યાત્રા હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ