નિર્ણય / નોકરીયાતો માટે GPFને લઇને મોટા સમાચારઃ PF ખાતામાં વધુ પૈસા ઉમેરવા મોંઘા પડશે, ગુજરાત નાણા વિભાગે જાહેર કર્યો પરિપત્ર

• 5 લાખથી વધારે GPF કપાત પર ટેક્સ લાગુ થશે
• નાણાં વિભાગ દ્વારા પરિપત્ર કરાયો
• કેન્દ્રના રેવન્યૂ વિભાગ દ્વારા ટેક્સ લાગુ કરાશે

હવે PF ખાતામાં વધુ પૈસા ઉમેરવા મોંઘા પડી શકે છે. ખાતામાં વધારાની રકમ કાપવા પર આવકવેરા વિભાગ ટેક્સ વસૂલશે. 5 લાખથી વધારે GPF કપાત પર ટેક્સ લાગુ પડશે. નાણાં વિભાગ દ્વારા GPF કપાત અંગે પરિપત્ર કરાયો છે.  ન્યૂ ઈન્કમટેક્સ રૂલના 2021ના સુધારા અંગે નાણાં વિભાગે પરિપત્ર જાહેર કર્યો છે. ભારત સરકારના રેવન્યૂ ડિપાર્ટમેન્ટ દ્વારા GPF કપાત પર ટેક્સ લાગુ કરાશે.

નાણાં વિભાગનો પરિપત્ર

નવા આદેશ અનુસાર 5 લાખ રૂપિયાથી વધુનું GPF કાપનારા સરકારી કર્મચારીઓના વ્યાજ પર ટેક્સ લાગશે. સરકારે આવકવેરાના નિયમો, 2021 લાગુ કર્યા છે. GPFમાં મહત્તમ કરમુક્ત યોગદાન મર્યાદા 5 લાખ સુધી લાગુ કરવામાં આવી છે. જો કર્મચારીએ આના પર કપાત કરી હોય, તો વ્યાજની આવકને આવક તરીકે ગણવામાં આવશે.

અત્રે ઉલ્લેખનીય છે કે, નાણાં પ્રધાન નિર્મલા સીતારમણે બજેટમાં ખાનગી નોકરીદાતાઓના પીએફ ખાતામાં રૂ. 2.5 લાખ સુધીના કરમુક્ત યોગદાન પર મર્યાદા લાદી હતી. ત્યાર બાદ જનરલ પ્રોવિડન્ટ ફંડમાં સરકારી કર્મચારીઓ પર ટેક્સ ફ્રી લિમિટ લાદવામાં આવી હતી. આ મર્યાદા વાર્ષિક 5 લાખ રૂપિયા છે. આ કપાત 1લી એપ્રિલ 2022થી શરૂ થશે.