GST / સરકારી તિજોરીઓ રૂપિયાથી ઉભરાઇ, માર્ચમાં GST કલેક્શનનો બમ્પર આંકડો, બીજો આવો રેકોર્ડ

એપ્રિલ મહિનાની શરૂઆત સાથે જ નવું નાણાકીય વર્ષ પણ શરૂ થઈ ગયું છે. નાણાકીય વર્ષ 2024-25ના પહેલા દિવસે સરકાર માટે સારા સમાચાર આવ્યા, સરકારની તિજોરીમાં બમ્પર વધારો થયો છે. સરકારનું GST કલેક્શન રેકોર્ડ સ્તરે પહોંચી ગયું છે. નાણાકીય વર્ષ 2023-24ના માર્ચ મહિનામાં વાર્ષિક ધોરણે GST કલેક્શનમાં 11.5 ટકાનો વધારો થયો છે. માર્ચ 2024માં જીએસટી કલેક્શન વધીને રૂ. 1.78 લાખ કરોડ થયું છે.

બમ્પર GST કલેક્શન
નાણાકીય વર્ષ 2023-24ના માર્ચ મહિનામાં, ગુડ્સ એન્ડ સર્વિસ ટેક્સ (GST) કલેક્શન વાર્ષિક ધોરણે 11.5 ટકા વધીને રૂ. 1.78 લાખ કરોડ થયું છે. નાણા મંત્રાલયે સોમવારે જણાવ્યું હતું કે ઘરેલુ વ્યવહારોમાં વધારો થવાને કારણે માર્ચમાં GST કલેક્શન વધ્યું છે. આ અત્યાર સુધીનું બીજું સૌથી વધુ માસિક GST કલેક્શન છે. અત્યાર સુધીનું સૌથી વધુ GST કલેક્શન એપ્રિલ, 2023માં રૂ. 1.87 લાખ કરોડ નોંધાયું હતું. માર્ચમાં કલેક્શનમાં વધારા સાથે, સમગ્ર નાણાકીય વર્ષ 2023-24 માટે કુલ GST કલેક્શન 20.14 લાખ કરોડ રૂપિયા થયું, જે નાણાકીય વર્ષ 2022-23 કરતાં 11.7 ટકા વધુ છે. આ નાણાકીય વર્ષમાં સરેરાશ માસિક GST કલેક્શન રૂ. 1.68 લાખ કરોડ રહ્યું છે, જે એક વર્ષ અગાઉ રૂ. 1.5 લાખ કરોડ કરતાં વધુ હતું.

આ પણ વાંચોઃ હવેથી ડિજિટલ ફોર્મેટમાં જ મળશે વીમા, ઇન્શ્યોરન્સ પોલિસીના નિયમોમાં આજથી ફેરફાર, જાણો વિગત

નાણા મંત્રાલયે એક નિવેદનમાં જણાવ્યું હતું કે માર્ચ 2024 માટે GSTની કુલ આવકમાં વાર્ષિક ધોરણે 11.5 ટકાના વધારા સાથે રૂ. 1.78 લાખ કરોડનું બીજું સૌથી વધુ કલેક્શન જોવા મળ્યું હતું. સ્થાનિક વ્યવહારોમાં  17.6 ટકાનો વધારો થવાને કારણે આ કલેક્શન વધ્યું છે.   માર્ચ મહિનામાં રિફંડ બાદ GSTની ચોખ્ખી આવક રૂ. 1.65 લાખ કરોડ હતી, જે એક વર્ષ અગાઉના સમાન સમયગાળા કરતાં 18.4 ટકા વધુ છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો