ગાંધીનગર / ગુજરાતમાં 4.40 કરોડ મતદારો, ચૂંટણીપંચે જાહેર કરી ફાઈનલ યાદી, 5.60 લાખ મતદારો ઉમેરાયા

Gujarat Election News: ગુજરાત ચૂંટણીપંચ દ્વારા SIRની પ્રક્રિયા પૂર્ણ થયા બાદ ફાઇનલ મતદાર યાદી જાહેર કરી દેવામાં આવી છે. ચૂંટણીપંચ પ્રમાણે હાલમાં ગુજરાતમાં કુલ 4.40 કરોડ મતદારો નોંધાયેલા છે. ડ્રાફ્ટ મતદાર યાદી જાહેર થયા પછી 5.60 લાખ વધુ મતદારો ઉમેરાયા છે.

SIR (સ્પેશ્યલ ઈન્ટેન્સિવ રિવિઝન)ની પ્રક્રિયા પહેલાં ગુજરાતમાં 5.8 કરોડથી વધુ મતદારો નોંધાયા હતા. ત્યારબાદ ડ્રાફ્ટ મતદાર યાદીમાં 4.34 કરોડ મતદારો નોંધાયા હતા. હવે આખરી ફાઈનલ યાદીમાં 4,40,30,725 મતદારોના નામ સામેલ થયા છે. એટલે કે ડ્રાફ્ટ યાદી કરતાં 5.60 લાખ મતદારો ઉમેરાયા છે.

નામ ઉમેરવા અને કમી કરવા માટે શરૂ કરાયેલી આ પ્રક્રિયામાં મોટા પાયે ફેરફારો નોંધાયા છે. આખરી મતદાર યાદીમાં જે મતદારોના નામ ન આવ્યા હોય, તેઓ ફોર્મ નંબર 6 ભરીને ડિક્લેરેશન કરી શકે છે. આ ફોર્મ ભર્યા બાદ ચૂંટણીપંચ ચકાસણી કરી સંબંધિત વ્યક્તિનું નામ યાદીમાં ઉમેરશે.

સ્થાનિક સ્વરાજ ચૂંટણી નજીક આવી રહી હોવાથી આ ફાઈનલ મતદાર યાદી અત્યંત મહત્ત્વની ગણાઈ રહી છે. જે મતદારોના નામ ફાઈનલ યાદીમાં નહીં હોય, તેઓ ચૂંટણીમાં મત આપી નહીં શકે. આથી દરેક મતદારે પોતાનું નામ ફાઈનલ યાદીમાં છે કે નહીં, તે ચોક્કસ ચકાસી લેવું જોઈએ.

આ પણ વાંચો: મોટા સમાચાર: ગુજરાત સરકારે નોકરીના કલાકોમાં કર્યો વધારો, જાણો કેટલો? મહિલાઓને નાઇટ શિફ્ટની છૂટ

11.73 લાખ મતદારોની ડ્રાફ્ટ યાદી તૈયાર

ચૂંટણી પંચના સૂત્રો અનુસાર, મૃત્યુ, સ્થળાંતર અને લાંબા સમયથી ગેરહાજર રહેલા આશરે 2.65 લાખ મતદારોના નામ યાદીમાંથી કમી કરવામાં આવ્યા છે. બીજી તરફ નવા પાત્ર મતદારોના સમાવેશ સાથે 11.73 લાખ નામોની ડ્રાફ્ટ મતદાર યાદી તૈયાર કરવામાં આવી હતી. 2002ની મતદાર યાદી સાથે મેપિંગ ન થનારા 3.85 લાખ મતદારોને નોટિસ પાઠવવામાં આવી હતી. ઉપરાંત, નામ અને સરનામામાં તફાવત ધરાવતા મતદારોને પણ દસ્તાવેજી ચકાસણી માટે નોટિસ આપવામાં આવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ