મનોરંજન / પહેલા સલમાન, રોહિત શેટ્ટી, પછી રણવીર અને હવે...! વધુ એકને બિશ્નોઈ ગેંગની ધમકી

બોલિવૂડના સિતારાઓને મળી રહેલી ધમકી અને વસૂલીના વધતાં કેસથી ચિંતા વધી રહી છે. એક સમયે અખબારોના ક્રાઇમ પેજ દેખાતા નામો હવે સીધા બોલિવૂડના મોટા નામોને નિશાન બનાવી રહ્યા છે. લોરેન્સ બિશ્નોઈ અને ગોલ્ડી બ્રાર જેવા ગુંડાઓ હવે ફક્ત ગુનાહિત દુનિયા સુધી મર્યાદિત નથી રહ્યા, પરંતુ મનોરંજન ઉદ્યોગમાં પણ ભય ફેલાવી રહ્યા છે. રોહિત શેટ્ટીના ઘરે ફાયરિંગની ઘટના પછી હવે ઘણા બોલિવૂડ સ્ટાર્સના નામ સામે આવી રહ્યા છે, જેમાં રણવીર સિંહ અને હવે સલમાન ખાનના એક નજીકના સંબંધીનું નામ પણ આવી રહ્યું છે.

એવા અહેવાલો આવ્યા છે કે સલમાન ખાનના એક નજીકના સંબંધી જે પણ ફિલ્મ ઇન્ડસ્ટ્રીમાં અભિનેતા તરીકે કામ કરે છે, તેમને ઇમેલ દ્વારા ધમકી મળી છે અને કરોડો રૂપિયાની માંગ કરવામાં આવી છે. ધમકી આપનાર વ્યક્તિએ પોતાને લોરેન્સ બિશ્નોઈ ગેંગ સાથે જોડાયેલો હોવાનું જણાવ્યું છે. જો કે આ મામલે હજુ સુધી સલમાન ખાન કે તેમના સંબંધીએ પોલીસમાં કોઈ ઔપચારિક ફરિયાદ નોંધાવી નથી. તેમ છતાં પોલીસ સતર્ક છે અને આખા મામલા પર નજર રાખી રહી છે.

બોલિવૂડમાં ગેંગસ્ટરથી મળેલી ધમકીઓની શરૂઆત સલમાન ખાનથી થઈ હતી. પહેલા એવું માનવામાં આવી રહ્યું હતું કે ગેંગસ્ટરોની નારાજગી કે દુશ્મનાવટ ફક્ત સલમાન ખાન સુધી મર્યાદિત છે. સલમાન ખાનના ઘરે ગોળીબાર થયો, તેને સતત ધમકીઓ મળી રહી હતી. પણ સમય જતાં સ્પષ્ટ થયું કે આ મુદ્દો કોઈ એક અભિનેતા પૂરતો મર્યાદિત નથી. રોહિત શેટ્ટી, કપિલ શર્મા અને દિશા પટણી જેવા જાણીતા નામો પછી, બોલીવુડ અભિનેતા રણવીર સિંહનું નામ પણ આ લિસ્ટમાં સામેલ થઈ ગયું છે. તાજેતરની ઘટનાઓ પછી એવું માનવામાં આવી રહ્યું છે કે ગેંગસ્ટરો હવે ફક્ત અમુક પસંદગીના લોકોને નહીં, પણ સમગ્ર ઇન્ડસ્ટ્રી ઇકોસિસ્ટમને પોતાના હાથ નીચે લાવવા ઇચ્છી રહ્યા છે.

રોહિત શેટ્ટીના ઘર પર ગોળીબાર

થોડા દિવસ પહેલા, મુંબઈના જુહુ વિસ્તારમાં રોહિત શેટ્ટીના ઘરની બહાર ફાયરિંગ થયું હતું. આ ઘટનાથી ફિલ્મ ઇન્ડસ્ટ્રી હચમચી ઉઠી હતી. આ ઘટનાના કલાકો પછી, લોરેન્સ બિશ્નોઈ ગેંગે સોશિયલ મીડિયા દ્વારા હુમલાની જવાબદારી સ્વીકારી હતી. શુભમ લોનકર, આરજે બિશ્નોઈ અને હરિ બોક્સરના નામથી પોસ્ટ લખવામાં આવી. સોશિયલ મીડિયા પર કરવામાં આવેલી આ પોસ્ટ કોઈ સામાન્ય ધમકી નહોતી, પરંતુ સીધું બોલિવૂડને ટાર્ગેટ કરીને એક મેસેજ મોકલ્યો હતો.

આ પોસ્ટમાં લખ્યું હતું - અમે ઘણી વખત મેસેજ કર્યો કે અમારા કામમાં દખલ ન કરો, પણ અમારી વાત સમજમાં ન આવી. આ તો છોટાનું ટ્રેલર છે. જો અમારી વાત ન માણી તો અમે ઘરની બહાર નહીં, બેડરૂમમાં ગોળીબાર કરીશું. આખા બોલિવૂડને ચેતવણી છે કે સમય છે, સુધરી જાઓ, નહિંતર વધુ ખરાબ થશે. જે લોકોને અમે અત્યાર સુધી ફોન કર્યો છે, તે બધા લાઇન પર આવી જાઓ.

તપાસમાં એ પણ સામે આવ્યું કે રોહિત શેટ્ટીને લાંબા સમયથી અજાણ્યા નંબરો પરથી ફોન અને મેસેજ આવી રહ્યા હતા. જ્યારે આ કોલ્સ અને મેસેજનો જવાબ ન મળ્યો, ત્યારે ગેંગે ગોળીબાર કર્યો. આ પેટર્ન અગાઉ પણ ઘણા કેસમાં જોવા મળી છે કે જ્યાં ધમકીઓને અવગણ્યા પછી ગોળીબાર અથવા હુમલા થયા.

આ પણ વાંચો: એક્ટર રણવીર સિંહને મળી ધમકી, વોઈસ નોટ મોકલીને માગ્યા કરોડો રુપિયા, ઘરની સુરક્ષા વધારાઈ

રણવીર સિંહને ધમકીભર્યો મેસેજ અને કરોડોની માંગ

ફિલ્મ અભિનેતા રણવીર સિંહને વોટ્સએપ વોઇસ નોટ દ્વારા ધમકી મળી છે, જેમાં કરોડો રૂપિયાની માંગણી કરવામાં આવી છે. ધમકી બાદ, અભિનેતાએ મુંબઈ પોલીસને આ બાબતની જાણ કરી છે. મામલાની ગંભીરતાને ધ્યાનમાં રાખીને, મુંબઈ પોલીસે રણવીર સિંહ અને દીપિકા પાદુકોણના ઘરની સુરક્ષા વધારી દીધી છે. સાથે જ પોલીસ આરોપીઓની શોધખોળ પણ કરી રહી છે. લોરેન્સ ગેંગે ધમકીની જવાબદારી સ્વીકારી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ