- એનર્જી ડ્રિંક બાળકો માટે હાનિકારક
- શરીરનાં હેલ્થને સુધારવાની જગ્યાએ પહોંચાડે છે નુક્સાન
- હેલ્થ ડ્રિંક અને પાઉડરમાં હોય છે હાનિકારક તત્વો
બાળકોએ હેલ્ધી રહેવા માટે દૂધ પીવું જરૂરી છે. આવા સંજોગોમાં પેરેન્ટ્સ બાળકોને દૂધ પીવડાવવા માટે તેને ટેસ્ટી બનાવવાની કોશિશ કરે છે અને માર્કેટમાં મળતા હેલ્થ ડ્રિંક કે પાઉડર બાળકોને આપે છે. આજકાલ એનર્જી ડ્રિંક પણ ખૂબ માત્રામાં ચાલી રહ્યાં છે. તેને પીવાથી પાણીની કમી અને ડિહાઇડ્રેશન જેવી સમસ્યાઓ થાય છે. આવા ડ્રિંક બાળકોની હેલ્થને નફો નહીં, નુકસાન કરે છે, તેવુ એક સંશોધનમાં સાબિત થયું છે. જો તમે પણ તમારા બાળકને આવા ડ્રિંક પીવડાવતા હો તો ચેતી જજો. આવા ડ્રિંક્સમાં રહેલી આ વસ્તુઓ બાળકોની હેલ્થ બગાડે છે.
શુગર
બાળકોમાં થાક દૂર કરવા અને તેને એક્ટિવ બનાવવા માટે માર્કેટમાં એનર્જી ડ્રિંક મળે છે. જેને પીને બાળક ભલે એક્ટિવ દેખાય, પરંતુ બીજી મોટી બીમારીઓ તેને ઘેરી લે છે. આ ડ્રિંકમાં શુગર સારી એવી માત્રામાં હોય છે. તેનાથી બાળકોમાં મેદસ્વિતા, દાંતમાં સડન, ઊંઘની કમી જેવી ફરિયાદ થવા લાગે છે. એક અભ્યાસમાં સામે આવ્યું છે કે બાળકોને વધુ માત્રામાં ખાંડ ખવડાવવાથી તેમની શીખવા અને સમજવાની ક્ષમતા પર અસર પડે છે.
હાઇ ફ્રક્ટોઝ કોર્ન સિરપ
ઘણાં બધાં હેલ્થ ડ્રિંકમાં હાઇ ફ્રક્ટોઝ કોર્ન સિરપ મિક્સ કરેલું હોય છે. તેને વધુ માત્રામાં ખાવાથી હેલ્થ પ્રોબ્લેમ થવા લાગે છે. સામાન્ય રીતે કાર્બોહાઇડ્રેટ ફૂડ જેવા કે ભાત ખાવાથી શરીરને ગ્લુકોઝ મળે છે, જે સરળતાથી સેલ્સ દ્વારા આખા શરીરમાં પહોંચી જાય છે, પરંતુ હાઇ ફ્રક્ટોઝ કોર્ન સિરપ બાળકોને ખવડાવવાથી તે ફ્યુઅલ બનીને એનર્જી બનતાં પહેલાં ફેટ બનીને લિવરમાં જમા થવાનું શરૂ થઇ જાય છે.
સોડિયમ
ઘણાં બધાં હેલ્થ ડ્રિંક અને હેલ્ધી ફૂડ્સમાં સોડિયમની સારી એવી માત્રા હોય છે. પેકેઝ્ડ ફૂડમાં સોડિયમ વધુ પડતા માત્રામાં હોય છે. તેને ખાવાથી બાળકો મેદસ્વિતા સાથે તણાવ અને હાઇ બીપી જેવી સમસ્યાનો શિકાર બને છે. ૮થી ૧૭ વર્ષની ઉંમરનાં બાળકોને સોડિયમની વધુ માત્રા બીપી હાઇ કરી શકે છે. તેનાથી હાર્ટ એટેક થવાનો ખતરો પણ રહે છે.
કેફિન
શરીરને એક્ટિવ રાખવા માટે એનર્જી ડ્રિંક્સ કે હેલ્થ ડ્રિંક્સમાં કેફિનની માત્રા હોય છે. જે બ્લડ પ્રેશર અને ઊંઘ ન આવવાની સમસ્યાને વધારે છે. બાળકો આ પ્રકારના ડ્રિંક પીને મૂડ સ્વિંગ અને તણાવ જેવી સમસ્યાઓનો સામનો કરે છે. કેફિન વાળાં પીણાં બાળકોમાં માથાના દુઃખાવાની સમસ્યા પણ પેદા કરી શકે છે.
