IPL 2024 / મુંબઈ સામેની ચાલુ મેચમાં ઋષભ પંતે ચગાવી પતંગ, જુઓ વાયરલ વીડિયો

દિલ્હી તરફથી લિઝાદ વિલિયમ્સ પ્રથમ ઓવર નાખવા આવ્યો હતો. આ જ ઓવરમાં એક પતંગ ક્યાંકથી ઉડીને મેદાનમાં આવી ગયો હતો. આ ઘટનાને લઈને મેદાનમાં હાજર લોકોએ ભારે હોબાળો પણ કર્યો હતો. પતંગને મેદાનમાંથી બહાર કાઢતા પહેલા ઋષભ પંતે તેને હવામાં ઉડાવવાનો પ્રયાસ પણ કર્યો હતો. વાસ્તવમાં આ ઘટના મુંબઈ ઈન્ડિયન્સની ઈનિંગની પ્રથમ ઓવરના ત્રીજા બોલ પછી બની હતી.

સોશિયલ મીડિયા પર આ ઘટનાને લઈને ફેન્સ ખૂબ જ મસ્તી કરી રહ્યા છે અને તેનો વીડિયો વાયરલ થઈ રહ્યો છે. પહેલા રોહિત શર્માએ પતંગ ઉપાડીને ઋષભ પંતને આપ્યો. અમ્પાયરને પતંગ આપતા પહેલા પંતે પણ તેને ઉડાવી હતી. એક પ્રશંસકે તો મજાકમાં કહ્યું કે ઋષભ પંતને મેદાન પર પતંગ ઉડાડવા બદલ દંડ થવો જોઈએ. કેટલાક લોકો રોહિત અને પંતની આ ક્ષણને 'મસ્તી' કહી રહ્યા છે.

દિલ્હી કેપિટલ્સે IPLમાં પોતાનો સૌથી મોટો સ્કોર બનાવ્યો

દિલ્હી કેપિટલ્સે હવે ઈન્ડિયન પ્રીમિયર લીગના ઈતિહાસમાં તેનો સર્વોચ્ચ સ્કોર બનાવ્યો છે. મુંબઈ ઈન્ડિયન્સ સામેની મેચમાં ટીમે 20 ઓવરમાં 4 વિકેટ ગુમાવીને 257 રન બનાવ્યા હતા. આઈપીએલમાં ડીસીનો આ સૌથી મોટો સ્કોર છે. આ પહેલા દિલ્હીનો સર્વોચ્ચ સ્કોર 231 રન હતો, જે તેણે 2011માં પંજાબ કિંગ્સ સામે બનાવ્યો હતો. આ મેચમાં જેક ફ્રેઝર મેકગર્ક IPLના ઈતિહાસમાં સૌથી ઝડપી સદી ફટકારવાનું ચૂકી ગયો હતો. તેણે મુંબઈ ઈન્ડિયન્સ સામેની મેચમાં 27 બોલમાં 84 રન બનાવ્યા હતા.