વંદે ભારત / દેશને મળશે એક સાથે 5 વંદે ભારત ટ્રેનની સૌગાત, પ્રથમ વખત 15 મિનિટની અંદર તમામ ટ્રેનને PM મોદી આપશે લીલીઝંડી

• એક સાથે 5 વંદે ભારત ટ્રેનને મળશે લીલીઝંડી
• વડાપ્રધાન મોદી આપશે તમામ ટ્રેનોને લીલીઝંડી
• વડાપ્રધાન પોતે ભોપાલમાં હાજર રહેશે
• અહીંથી બે વંદે ભારત ટ્રેનનું ઉદ્ઘાટન થશે

દેશમાં પ્રથમ વખત 27 જૂન મંગળવારના રોજ પાંચ વંદે ભારત ટ્રેનોને લીલી ઝંડી બતાવી રવાના થશે. વિવિધ ભાગોમાં દોડતી આ પાંચ ટ્રેનોને 15 મિનિટમાં ફ્લેગ ઓફ કરવામાં આવશે. વડાપ્રધાન પોતે તેમને ફ્લેગ ઓફ કરશે. આમાં વડાપ્રધાન પોતે એક જગ્યાએ હાજર રહેશે, જ્યારે અન્ય સ્થળોએ તેઓ વર્ચ્યુઅલ ફ્લેગ બતાવશે. રેલ્વે મંત્રાલયના જણાવ્યા અનુસાર પાંચ વંદે ભારત ટ્રેનોમાંથી બે મધ્યપ્રદેશથી દોડશે. વડાપ્રધાન અહીં સ્વયં હાજર રહીને લીલીઝંડી આપશે. મધ્યપ્રદેશમાં ભોપાલ અને દિલ્હી વચ્ચે વંદે ભારત ટ્રેન પહેલેથી જ ચાલી રહી છે. આ બે વંદે ભારત ટ્રેનને જોડીને અહીંથી ત્રણ વંદે ભારત ટ્રેન દોડશે. પાંચેય વંદે ભારત ટ્રેનો શરૂ થયા બાદ દેશમાં વંદે ભારત ટ્રેનોની કુલ સંખ્યા 23 પર પહોંચી જશે.

હાલમાં દેશના વિવિધ રાજ્યો અને કેન્દ્રશાસિત પ્રદેશોમાં 18 વંદે ભારત ટ્રેનો સફળતાપૂર્વક ચાલી રહી છે. જે ત્રણ મોટા રાજ્યોમાં વંદે ભારત કાર્યરત નથી તેમાં ગોવા, ઝારખંડ અને બિહારનો સમાવેશ થાય છે. ઉત્તર-પૂર્વના રાજ્યોમાં આસામ સિવાય બાકીના તમામ રાજ્યોમાં હજુ સુધી ટ્રેકનું વીજળીકરણ થયું નથી. આસામમાં વંદે ભારત અભિયાન શરૂ થઈ ગયું છે.

આ રૂટ પર નવી વંદે ભારત દોડશે

• ભોપાલથી જબલપુર

વંદે ભારત ટ્રેન મધ્યપ્રદેશના બે મોટા શહેરોને ભોપાલથી જબલપુર સુધી જોડવા માટે શરૂ થવાની છે. આનાથી બંને શહેરો વચ્ચે મુસાફરી કરનારાઓનો સમય બચશે.

• ભોપાલથી ઈન્દોર

મધ્યપ્રદેશમાં બીજી વંદે ભારત ભોપાલ અને ઈન્દોર વચ્ચે ચાલશે. વેપારમાં ઉન્નતિ થવાની સંભાવના છે.

• રાંચીથી પટના

ઝારખંડ અને બિહાર રાજ્યો માટે આ પહેલી વંદે ભારત ટ્રેન હશે. બંને રાજધાનીઓને જોડવા માટે રાંચીથી પટના સુધી ટ્રેન ચલાવવામાં આવી રહી છે. અહીં લોકોને વાહનવ્યવહારમાં સગવડ મળશે.

• બેંગલુરુ-હુબલી-ધારવાડ

કર્ણાટક માટે આ બીજી વંદે ભારત હશે. આ પહેલા ચેન્નાઈ-બેંગલુરુ-મૈસુર વચ્ચે ટ્રેન દોડી રહી છે. આ ટ્રેન સાથે વેપારને પ્રોત્સાહન આપવાની દરેક શક્યતા છે.

• ગોવાથી મુંબઈ 

ઓડિશા ટ્રેન દુર્ઘટનાને કારણે ગોવા-મુંબઈ વંદે ભારત ટ્રેનનું ઉદ્ઘાટન મોકૂફ રાખવામાં આવ્યું હતું. હવે તેનું ઉદ્ઘાટન કરવામાં આવશે. આનાથી પ્રવાસનને વેગ મળવાની સંભાવના છે.

18 વંદે ભારત ટ્રેનો સફળતાપૂર્વક ચાલી રહી છે

દેશની પ્રથમ વંદે ભારત ટ્રેન નવી દિલ્હીથી ભગવાન શિવની નગરી કાશી સુધી દોડી હતી. આ ટ્રેન ફેબ્રુઆરી 2019માં ચલાવવામાં આવી હતી. બીજી ટ્રેન પણ ધાર્મિક શહેર સાથે જોડાયેલી હતી અને આ ટ્રેન નવી દિલ્હીથી શ્રી વૈષ્ણોદેવી કટરા વચ્ચે દોડી હતી. ત્રીજી ગાંધીનગરથી મુંબઈ વચ્ચે શરૂ કરવામાં આવી હતી. ચોથી નવી દિલ્હી અને અંદૌરા સ્ટેશન હિમાચલ વચ્ચે શરૂ થઈ હતી. પાંચમી વંદે ભારત ચેન્નાઈથી મૈસુર સુધી ચલાવવામાં આવી હતી. છઠ્ઠી વંદે ભારત નાગપુરથી બિલાસપુર વચ્ચે ચાલી. એ જ રીતે સાતમી વંદે ભારત ટ્રેન હાવડાથી ન્યૂ જલપાઈગુડી, આઠમી વંદે ભારત સિકંદરાબાદથી વિશાખાપટ્ટનમ, નવમી મુંબઈથી સોલાપુર, 10મી મુંબઈથી શિરડી, 11મી રાણી કમલાપતિ સ્ટેશન (ભોપાલ)થી નિઝામુદ્દીન, 12મી સિકંદરાબાદથી તિરુપતિ, 13મીએ સિકંદરાબાદથી ચાલશે અને 14મી ચેન્નાઈથી કોઈમ્બતુર, 15મી તિરુવનંતપુરમથી કાસરગોડ, 16મી ભુવનેશ્વરથી હાવડા, 17મી દિલ્હીથી દહેરાદૂન, 18મી ન્યૂ જલપાઈગુડીથી ગુવાહાટી.