શરમજનક / ગુજરાતની દીકરીઓની સુરક્ષા પર ફરી સવાલ: મહેસાણામાં ખેતરમાં લઈ જઈ બે ભાઈઓએ સગીરા પર દુષ્કર્મ આચર્યું

• પિતરાઇ ભાઇઓ બન્યા હેવાન
• સગીરા સાથે આચર્યું દુષ્કર્મ
• બંને ભાઇ સામે ફરિયાદ નોંધાઇ

રાજ્યમાં છેલ્લા ઘણા સમયથી દુષ્કર્મની ઘટનાઓમાં સતત વધારો થઈ રહ્યો છે. મહિલાઓ માટે ગુજરાત સલામત છે એવા દાવાઓ વચ્ચે ગોઝારી ઘટનાઓ દિવસેને દિવસે વધી રહી છે. દુષ્કર્મીઓને માટે સરકારે કડક કાયદો બનાવી ફાંસીના માંચડે લટકાવી દેવા સુધીની સજાની જોગવાઈ કરી હોવા છતાં કાયદાનો કોઈ ડર જ ન હોય તેમ દુષ્કર્મની ઘટનાઓ સતત વધી રહી છે. ત્યારે વધુ એક દુષ્કર્મનો બનાવ મહેસાણા જિલ્લામાં બન્યો છે.

સગીરાને ખેતરમાં લઈ જઈને દુષ્કર્મ આચર્યું
મહેસાણાના ખેરાલુ નજીક સગીરા સાથે પિતરાઈ ભાઈઓએ ખેતરમાં દુષ્કર્મ આચરતા હડકંપ મચી ગયો છે. બંને આરોપી ભાઈઓ સામે ખેરાલુ પોલીસ સ્ટેશનમાં ફરિયાદ નોંધાઈ છે. સગીરાની ફરિયાદ મુજબ, પહેલા અવાર નવાર ઠાકોર મેહુલજી નામના શખ્સે દુષ્કર્મ આચર્યું હતું. બાદમાં મેહુલના ભાઈ ઠાકોર કમલેશજીએ પણ દુષ્કર્મ આચર્યુ હતું. બંને પિતરાઈ ભાઈઓએ સગીરાને ખેતરમાં લઈ જઈને દુષ્કર્મ આચર્યું હતું. હાલ સગીરાની ફરિયાદના આધારે બંને આરોપીને ઝડપી પાડવા ખેરાલુ પોલીસે ચક્રો ગતિમાન કર્યા છે. 

દેવગઢ બારિયામાં 17 વર્ષની સગીરા પર દુષ્કર્મ
દેવગઢ બારિયામાં પણ દુષ્કર્મનો બનાવ બન્યો છે. અસાયડીના યુવકે દાહોદ તાલુકાની વતની અને પંચમહાલ જિલ્લાની 17 વર્ષીય સગીરાનું પત્ની તરીકે રાખવા અપહરણ કરી અલગ અલગ જગ્યાએ લઈ જઈ તેની મરજી વિરૂધ્ધ અવાર નવાર દુષ્કર્મ આચર્યુ હતું. નરાધમ યુવકની ચુંગલમાંથી ભાગવાનો મોકો મળતાં સગીરા ત્યાંથી ભાગીને પોતાના ઘરે આવી હતી. ત્યારબાદ તેની સાથે બનેલી ઘટનાની પરિવારને જાણ કરી હતી. જે સગીરા પરિવાર સાથે પોલીસ સ્ટેશન ખાતે પહોંચી હતી. સગીરાએ વિજય બાબુ કોળી પટેલ સામે પીપલોદ પોલીસ મથકમાં ફરિયાદ નોંધાવી હતી.

ફોટા બતાવી દેવાની ધમકી આપી દુષ્કર્મ
બાબરામાં રહેતી એક સગીરા સાથે બે મહિનાથી પરિચય કેળવી અહી જ રહેતા એક યુવકે તુ મારી સાથે નહીં આવે તો બધાને ફોટા બતાવી દેવાની ધમકી આપી ભગાડી જઇ દુષ્કર્મ ગુજારતા આ નરાધમ સામે બાબરા પોલીસ મથકમાં ફરિયાદ નોંધાઇ છે.