અમદાવાદ / ઉત્તરાયણ પર અબોલ પંખીઓ માટે કરુણા અભિયાન: CM ભૂપેન્દ્ર પટેલે કરાવી શરૂઆત, નોટ કરી લો હેલ્પલાઇન નંબર

• CM ભૂપેન્દ્ર પટેલે અમદાવાદથી કરાવ્યો કરૂણા અભિયાનનો પ્રારંભ 
• ઉત્તરાયણમાં ઘાયલ પક્ષીઓને બચાવવા 20 જાન્યુઆરી સુધી અભિયાન 
• 2017થી શરૂ કરાયેલા અભિયાનમાં 85 હજાર પક્ષીઓને સારવાર કરાઈ 

ઉત્તરાયણ પહેલા CM ભૂપેન્દ્ર પટેલે અમદાવાદથી કરૂણા અભિયાનનો પ્રારંભ કરાવ્યો છે. ઉત્તરાયણમાં ઘાયલ થયેલા પક્ષીઓને બચાવવા 20 જાન્યુઆરી સુધી અભિયાન ચાલશે. રાજ્ય સરકાર દ્વારા ઉત્તરાયણમાં ઘાયલ થનારા પક્ષીઓની સારવાર અને દવા માટે 2017થી અભિયાન શરૂ કર્યું છે. આ પહેલ હેઠળ હજી સુધી 6 વર્ષમાં 85 હજાર પક્ષીઓની સારવાર કરાઇ છે. 

ઉત્તરાયણ પર્વ દરમિયાન પતંગ દોરાથી પક્ષીઓને ઘાયલ થતા બચાવવા અને ઘાયલ પક્ષીઓની સારવાર માટે ચાલી રહેલા રાજ્યવ્યાપી કરૂણા અભિયાન અંતર્ગત અમદાવાદના બોડકદેવ વિસ્તારમાં કાર્યરત વાઇલ્ડ લાઇફ કેર સેન્ટરની મુલાકાત લીધી અને અબોલ જીવોની સારવાર માટે થતી વિવિધ કામગીરીનું નિરીક્ષણ કર્યું.

આ… pic.twitter.com/SwM3Te0ank

— Bhupendra Patel (@Bhupendrapbjp) January 13, 2024

હેલ્પલાઇન નંબર
આ 85 હજારમાંથી 75 હજાર પક્ષીઓને બચાવી લેવામાં આવ્યા હતા. આમ પતંગની દોરીથી ઘાયલ થયેલા પક્ષીઓમાંથી મોટાભાગના પક્ષીઓને બચાવી લેવામાં આવ્યા છે. રાજ્ય સરકાર દ્વારા દર વર્ષે હેલ્પલાઇન નંબર પણ જાહેર કરે છે. જો તમારી આસપાસ પણ કોઇ ઘાયલ પંખી જણાય તો વન વિભાગની 1926 નંબર અને પશુપાલન વિભાગના 1962 નંબર પર કોલ કરી આ અંગે માહિતી આપી શકાય છે.

અમદાવાદમાં 20 સારવાર કેન્દ્રો 
આ હેલ્પલાઇન નંબર થકી સ્વયંસેવકો પક્ષી સુધી પહોંચી તેની તાત્કાલિક સારવાર શરૂ કરે છે. આ  વર્ષે અમદાવાદમાં 20 સારવાર કેન્દ્રો અને 118 કલેક્શન સેન્ટર્સ તૈયાર કરાયા છે. જેમાં 216 વેટરનિટી ડોક્ટર અને 2 હજાર 805 સ્વયંસેવકો પક્ષીઓની બચાવવા માટે ખડેપગે રહેશે. તો સમગ્ર રાજ્યમાં કરુણા અભિયાન હેઠળ 459 કલેક્શન સેન્ટર અને 488 સારવાર કેન્દ્રો પણ શરૂ કરાયા છે.