મહામારી / કુંભ જેવી ભૂલ હવે નહીં : ઉત્તરાખંડ સરકારે ચાર ધામ યાત્રા માટે લીધો આ નિર્ણય

• ઉત્તરાખંડ સરકારે સ્થગિત કરી ચારધામ યાત્રા
• માત્ર પૂજારીને પૂજા કરવાની આપી મંજૂરી
• કોરોનાના કેસને ધ્યાનમાં રાખીને લેવાયો નિર્ણય

ચારધામ યાત્રા સ્થગિત

દેશમાં સતત વધતાં કોરોના વાયરસના સંક્રમણના કારણે ઉત્તરાખંડ સરકાર દ્વારા મોટો નિર્ણય લેવામાં આવ્યો છે. રાજ્યના મુખ્યમંત્રી તીરથ સિંહ રાવતે રાજ્યમાં ચાર ધામ યાત્રાને સ્થગિત કરવાનો નિર્ણય કર્યો છે, જોકે મંદિરોના કપાટ નિયત સમય પર ખોલવામાં આવશે. મે મહિનામાં જ ગંગોત્રી, યમુનોત્રી, કેદારનાથ અને બદ્રીનાથના કપાટ ખૂલવાના છે. 

દેશની જનતા માટે ચારધામ યાત્રા બંધ કરવામાં આવે છે-રાવત

નોંધનીય છે કે ઉત્તરાખંડમાં થતી ચાર ધામ યાત્રા ખૂબ જ પ્રસિદ્ધ છે અને દેશ-દુનિયાથી લોકો આ યાત્રામા સામેલ થવા માટે આવે છે. એવામાં યાત્રા મુદ્દે રાજ્યના મુખ્યમંત્રીએ બેઠક બોલાવી હતી જેમાં નિર્ણય લેવામાં આવ્યો કે આ વર્ષે યાત્રા કરવી નહીં. મંદિરમાં પૂજા અર્ચના થઈ શકશે પરંતુ કોઈ પણ શ્રદ્ધાળુને મંજૂરી મળશે નહીં. 

કુંભ મેળા બાદ સરકારના આયોજન પર ઉઠયા હતા સવાલ 

નોંધનીય છે કે હાલમાં જ ઉત્તરાખંડમાં મોટા પાયા પર કુંભ મેળાનું આયોજન કરવામાં આવ્યું હતું જેમાં લાખોની સંખ્યામાં લોકો સામેલ થયા હતા. આ યાત્રા પર ઘણા બધા લોકોએ સવાલ પણ ઊભા કર્યા હતા અને વિદેશી મીડિયામાં પણ આ મેળો ખૂબ ચર્ચાનો વિષય બન્યો હતો. એવામાં મેળા દરમિયાન કોરોના વાયરસના કેસ વધતાં અડધો મેળો પૂરો થઈ ગયા બાદ પીએમ મોદીએ અપીલ કરી હતી કે કોરોના વાયરસના કારણે લોકો સામેલ થાય નહીં. 

ભારતમાં કોરોના વાયરસની સુનામી 

માર્ચ મહિનાથી ભારતમાં કોરોના વાયરસના કેસમાં અચાનક જ ઉછાળો જોવાં મળ્યો હતો અને તે બાદ સતત કેસ વધી રહ્યા છે. દેશની હોસ્પિટલો ઉભરાઇ ગઈ છે અને લોકો સારવાર વિના જ દમ તોડી રહ્યા છે. ઈન્જેક્શનો અને ઑક્સીજન ખૂટી પડ્યું છે અને હાલત એ છે કે હવેથી સ્મશાનોમાં જગ્યા નથી અને લાકડાઓ ખૂટી રહ્યા છે. 

ભારતમાં કોરોના વાયરસ કેસ અપડેટ - 29મી એપ્રિલ, 2021 

ભારતમાં કોરોના વાયરસના કેસમાં સતત વધારો જોવા મળી રહ્યો છે ત્યારે આજે 3,79,257 નવા કેસ સામે આવ્યા છે. છેલ્લા 24 કલાકમાં દેશમાં 3645 લોકોએ કોરોના વાયરસના કારણે જીવ ગુમાવતાં હાહાકાર જેવી સ્થિતિ છે. જોકે રાહતની વાત કહી શકાય કે 2,69,507 દર્દીઓ કોરોનાને હરાવીને સાજા પણ થયા છે.