બિઝનેસ / ક્રૂડ ઓઈલની કિંમતમાં ભડકો, 117 ડોલરે પહોંચ્યો ભાવ, સોમવારે શેરબજારમાં કેવી અસર થશે?

અમેરિકા અને ઈરાન વચ્ચે વધી રહેલા ભારે લશ્કરી તણાવ તથા મધ્ય પૂર્વમાં પુરવઠો ખોરવાઈ જવાની આશંકાઓને કારણે વૈશ્વિક બજારમાં ક્રૂડ ઓઇલ ના ભાવમાં જોરદાર ઉછાળો જોવા મળ્યો છે. આંતરરાષ્ટ્રીય બજારમાં બ્રેન્ટ ક્રૂડના ભાવ પ્રતિ બેરલ ૧૧૭ ડોલરની સપાટી વટાવી ગયા છે. આ ઘટનાક્રમથી વૈશ્વિક સ્તરે ફુગાવો વધવાની અને આગામી ટ્રેડિંગ સેશનમાં ભારતીય શેરબજાર પર ભારે દબાણ આવવાની આશંકા સર્જાઈ છે.

ગઈ કાલના કારોબારી સત્ર દરમિયાન બ્રેન્ટ ક્રૂડના ભાવમાં ૩.૫ ટકાનો તીવ્ર વધારો નોંધાયો હતો અને તે પ્રતિ બેરલ ૧૧૭.૧૪ ડોલર પર પહોંચી ગયું હતું. એપ્રિલ મહિના પછી પ્રથમ વખત ભાવ આટલી ઊંચી સપાટીએ પહોંચ્યા છે. સપ્ટેમ્બરના પ્રારંભથી અત્યાર સુધીમાં ક્રૂડ ઓઇલની કિંમતમાં આશરે ૨૦ ટકા જેટલો મોટો વધારો થયો છે. માર્કેટ એનાલિસ્ટ્સના મતે જો અમેરિકા અને ઇઝરાયેલ દ્વારા ઈરાન વિરુદ્ધ સૈન્ય કાર્યવાહી વધુ તેજ બનશે તો આગામી દિવસોમાં બ્રેન્ટ ક્રૂડ પ્રતિ બેરલ ૧૨૦ ડોલર સપાટી પણ વટાવી શકે છે.

આ પણ વાંચોઃ શેરમાં રૂપિયા ડૂબી જાય છે? તો અહીંયા કરો ઈન્વેસ્ટમેન્ટ, થશે 2 લાખ સુધીની કમાણી!

ક્રૂડ ઓઇલના ભાવમાં થયેલા આ ભડકા પાછળનું મુખ્ય કારણ સ્ટ્રેટ ઓફ હોર્મુઝમાં સર્જાયેલી અસ્થિરતા છે. વૈશ્વિક સ્તરે તેલના ભંડાર ઘટી રહ્યા હોવાની અને પુરવઠો ખોરવાઈ જવાની ચિંતા ઘેરી બની છે. ભારત પોતાની ક્રૂડ ઓઇલની કુલ જરૂરિયાતનો મોટો હિસ્સો આયાત કરે છે. પરિણામે ક્રૂડના ભાવમાં થતો પ્રત્યેક ડોલરનો વધારો દેશના આયાત બિલમાં જંગી વધારો કરે છે. સોમવારે જ્યારે ભારતીય શેરબજાર ખૂલશે ત્યારે તેની નકારાત્મક અસર જોવા મળી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ