ગુજરાત ઇલેક્શન 2022 / વિધાનસભા ચૂંટણીને લઇ ભાજપ એક્શન મોડમાં, આવતીકાલે જાહેર કરશે વાઇઝ નિરીક્ષકોની યાદી

• વિધાનસભાની ચૂંટણીને લઇને ભાજપ એક્શન મોડમાં
• આવતીકાલે ભાજપ નિરીક્ષકોની યાદી જાહેર કરશે
• 3 દિવસ નિરીક્ષકો વિધાનસભામાં ક્ષેત્રમાં વિતાવશે

ટૂંક સમયમાં ગમે ત્યારે ગુજરાત વિધાનસભા ચૂંટણીની તારીખો જાહેર થઇ શકે છે. જેને લઇને તમામ રાજકીય પક્ષો તૈયારીમાં જોતરાઇ ગયા છે. દરેક પક્ષો પોતપોતાની રીતે રણનીતિ ખેલી રહ્યાં છે. પક્ષના કેન્દ્રીય નેતાઓ પણ ગુજરાત આવી મતદારોને રિઝવવાના સંપૂર્ણ પ્રયાસ કરી રહ્યાં છે. ત્યારે આવતીકાલે ભાજપ વિધાનસભા વાઇઝ નિરીક્ષકોની યાદી જાહેર કરવા જઇ રહ્યું છે. નિરીક્ષકોની જાહેરાત બાદ 3 દિવસનો સમય નિરીક્ષકો વિધાનસભામાં ક્ષેત્રમાં વિતાવશે.

ભાજપ 3-3 નિરીક્ષકોની પ્રત્યેક વિધાનસભા બેઠકમાં નિમણૂંક કરશે

ભાજપ 3-3 નિરીક્ષકોની પ્રત્યેક વિધાનસભા બેઠકમાં નિમણૂંક કરશે. તમને જણાવી દઇએ કે, સાંસદ સભ્યો, ધારાસભ્યો અને જિલ્લા પ્રમુખોમાંથી નિરીક્ષકો બનશે. 3 દિવસ સુધી નિરીક્ષકો ગ્રાઉન્ડમાં રહી ઉમેદવારની સેન્સ પ્રક્રિયા હાથ ધરશે. સેન્સ પ્રક્રિયા બાદ નિરીક્ષકો પ્રત્યેક વિધાનસભાના નામો પ્રદેશ ભાજપને સોંપશે.

ભાજપે હવે મુરતિયા ઉતારવા કમર કસી લીધી

નોંધનીય છે કે, ગુજરાત વિધાનસભા ચૂંટણીના (Gujarat Assembly Election) પડઘમ વાગી ચૂક્યા છે ત્યારે તમામ રાજકીય પાર્ટીઓએ પસંદગી પ્રક્રિયા શરૂ કરી દીધી છે. તો આ તરફ ભાજપે (BJP) પણ હવે મુરતિયા ઉતારવા કમર કસી લીધી છે. ત્યારે આવતીકાલે ભાજપ નિરીક્ષકોની યાદી જાહેર કરશે. 33 જિલ્લા અને 8 મહાનગરો માટેની યાદી ભાજપ જાહેર કરશે. આ નિરીક્ષકો ત્રણ દિવસ સુધી સમગ્ર ગુજરાતને ઘમરોળશે. ત્રણ-ત્રણ નિરીક્ષકોની (Observer) બનેલી આ ટીમ તારીખ 27થી 29 ઓક્ટોબર દરમિયાન દાવેદારોને સાંભળશે. જે-તે જિલ્લાના સ્થાનિક આગેવાનો સાથે પણ નિરીક્ષકો બેઠક કરશે. તમને જણાવી દઈએ કે મંત્રીઓ તેમજ પૂર્વ મંત્રીઓને નિરીક્ષક તરીકેની જવાબદારી સોંપવામાં આવી છે.

નિરીક્ષકો 3 દિવસના પ્રવાસ દરમિયાન દાવેદારોના બાયોડેટા સ્વીકારશે

મહત્વનું છે કે, નિરીક્ષકો 3 દિવસના પ્રવાસ દરમિયાન દાવેદારોના બાયોડેટા સ્વીકારશે. તદુપરાંત જિલ્લા સંગઠન સાથે દાવેદારોમાંથી યાદી બનાવી પાર્લામેન્ટરી બોર્ડમાં રજૂ કરવામાં આવશે. નવેમ્બરના પ્રથમ સપ્તાહમાં પાર્લામેન્ટરી બોર્ડની બેઠક મળશે. જ્યાર બાદ ઉમેદવારોની યાદી પર અંતિમ મહોર લાગશે. ત્યારે હવે જોવાનું એ રહ્યું કે શું ભાજપ રિપીટ થિયરી અપનાવશે કે પછી નવા ચહેરા પર વિશ્વાસ મૂકશે.