કહેર / હજાર દૂર નહીં.. : અમદાવાદ બાદ મહેસાણામાં કોરોનાની મોટી છલાંગ, આજના કેસને હલકામાં ન લેશો

• આજે 979 કોરોના પોઝિટીવ કેસ સામે આવ્યા 
• રાજ્યમાં એક્ટિવ કેસની સંખ્યા પણ 5781 એ પહોચી 
• કોરોનાથી ગંભીર અસરગ્રસ્ત 14 દર્દીની વેન્ટિલેટર પર સારવાર હેઠળ

કોરોનાની ચોથી લહેરના સંભવિત ખતરા સામે છેલ્લા કેટલાય દિવસથી કોરોના કેસોમાં ઉછાળો આવી રહ્યો છે. જેને લઈને લોકોમાં ચિંતા જન્મી છે. તેવામાં આજે 979 કોરોના પોઝિટીવ કેસ સામે આવ્યા છે. આજે છેલ્લા 24 કલાકમાં 979 નવા કોરોના વાયરસના કેસ નોંધાતા ચોથી લહેરના ભણકારા વાગી રહ્યા છે. જેની સામે 873 દર્દીઓ સાજા થઈ હેમખેમ ઘરે પરત ફર્યા છે. કેસમાં વધારો આવતા એક્ટિવ કેસની સંખ્યા પણ 5781 પહોચી ગઈ છે. કોરોનાથી ગંભીર અસરગ્રસ્ત 14 દર્દીની વેન્ટિલેટર પર સારવાર ચાલી રહી છે.તો બીજી તરફ રાહતની વાત એ છે કે આજે કોરોનાને લીધે કોઈ પણ દર્દીએ જીવ ગુમાવ્યો નથી. આજે 3,19,537 લોકોનું રસિકરણ કરવામાં આવ્યું હોવાનું સામે આવ્યું છે. 

મહાનગરોમાં કોરોના કેસ વધ્યા
મહાનગરોમાં આજે નોંધાયેલા કોરોના પોઝિટિવ કેસની સંખ્યાની વાત કરવામાં આવે તો અમદાવાદ કોર્પોરેશનમાં સૌથી વધુ 335 કેસ, સુરત કોર્પોરેશનમાં 49,  વડોદરા કોર્પોરેશનમાં 66, ભાવનગર કોર્પોરેશનમાં 31, જામનગર કોર્પોરેશનમાં 7, ગાંધીનગર કોર્પોરેશનમાં 24 અને રાજકોટ કોર્પોરેશનમાં પણ 33 અને જુનાગઢમાં 2 કેસ કોરોના પોઝિટિવ નોંધાયા છે.

મહેસાણામાં  સૌથી વધુ 103 કેસ ઉમેરાયા 
જો જિલ્લા પ્રમાણે કોરોના કેસની વાત કરીએ તો મહેસાણામાં 103, સુરતમાં 23, વડોદરામાં 8 કેસ, ભાવનગરમાં 7,ગાંધીનગરમાં 27,જામનગરમાં 7 કેસ, રાજકોટમાં 22, જૂનાગઢમાં 2 કેસ,વલસાડમાં 12, કચ્છમાં 46 કેસ, પાટણમાં 18, મોરબીમાં 20, સાબરકાંઠામાં 18 અને આણંદમાં 16 તથા નવસારીમાં 15, અમરેલીમાં 11 અને અમદાવાદમાં 9 કેસ સામે આવ્યો છે.