તમારા કામનું / બેંક ઓફ બરોડામાં ઊંચા પગારની નોકરી મેળવવાની તક, 17 નવેમ્બર છેલ્લી તારીખ

સરકારી બેંકમાં નોકરીની તક શોધી રહેલા અનુભવી ઉમેદવારો માટે આ ભરતી ખાસ છે. આ વખતે સામાન્ય ક્લાર્ક કે ઓફિસરની જગ્યાએ ટેક્નોલોજી વિભાગમાં સિનિયર લેવલની પોસ્ટ ભરવામાં આવશે. ડેપ્યુટી ચીફ ટેક્નોલોજી ઓફિસર, હેડ AI, ડેપ્યુટી હેડ ક્લાઉડ અને ડેપ્યુટી હેડ પ્લેટફોર્મ એન્જિનિયરિંગ જેવા પદો માટે અરજીઓ મંગાવવામાં આવી છે. આ તમામ જગ્યાઓ કોન્ટ્રાક્ટના આધારે ભરવામાં આવશે. ઉમેદવારોને તેમની પોસ્ટ પ્રમાણે શૈક્ષણિક લાયકાત અને કામનો અનુભવ હોવો જરૂરી છે. અરજી કરવાની છેલ્લી તારીખ 17 નવેમ્બર 2026 છે. ખાસ વાત એ છે કે આ ભરતી માટે કોઈ અરજી ફી રાખવામાં આવી નથી.

બેંક ઓફ બરોડામાં કુલ 4 જગ્યાઓ પર ભરતી

બેંક ઓફ બરોડાની આ ભરતીમાં કુલ 4 જગ્યાઓ ભરવામાં આવશે. તેમાં ડેપ્યુટી ચીફ ટેક્નોલોજી ઓફિસરની 1, હેડ AIની 1, ડેપ્યુટી હેડ ક્લાઉડની 1 અને ડેપ્યુટી હેડ પ્લેટફોર્મ એન્જિનિયરિંગની 1 જગ્યા સામેલ છે. આ તમામ પદો IT વિભાગ સાથે જોડાયેલાં છે.આ ભરતી કોન્ટ્રાક્ટના આધારે કરવામાં આવશે. શરૂઆતમાં કોન્ટ્રાક્ટ 3 વર્ષનો રહેશે. ઉમેદવારના કામ અને પરફોર્મન્સના આધારે તેને આગળ વધારી શકાય છે. આ તમામ પદો માટે પોસ્ટિંગ મુંબઈમાં આપવામાં આવશે.

ડેપ્યુટી ચીફ ટેક્નોલોજી ઓફિસર માટે શું લાયકાત જોઈએ?

ડેપ્યુટી ચીફ ટેક્નોલોજી ઓફિસરની પોસ્ટ સિનિયર વાઇસ પ્રેસિડેન્ટ ગ્રેડની છે. આ પોસ્ટ માટે ઉમેદવારે માન્ય યુનિવર્સિટીમાંથી એન્જિનિયરિંગમાં ગ્રેજ્યુએશન અથવા MCAની ડિગ્રી મેળવેલી હોવી જોઈએ. આ સાથે સંબંધિત ક્ષેત્રમાં ઓછામાં ઓછો 15 વર્ષનો કામનો અનુભવ હોવો જરૂરી છે. આ પોસ્ટ માટે મહત્તમ ઉંમર 50 વર્ષ નક્કી કરવામાં આવી છે.

હેડ AI માટે કેટલી લાયકાત જરૂરી?

હેડ AIની પોસ્ટ વાઇસ પ્રેસિડેન્ટ ગ્રેડની છે. આ પદ માટે ઉમેદવાર પાસે કમ્પ્યુટર સાયન્સ અથવા ઇન્ફોર્મેશન ટેક્નોલોજીમાં BE/BTech કે MCAની ડિગ્રી હોવી જોઈએ. ઉમેદવાર પાસે કુલ 12 વર્ષનો કામનો અનુભવ હોવો જરૂરી છે. આમાંથી ઓછામાં ઓછો 6 વર્ષનો અનુભવ AI, NLP અને કન્ટેન્ટ એનાલિસિસ જેવા ક્ષેત્રોમાં હોવો જોઈએ. આ પોસ્ટ માટે ઉંમર 35થી 45 વર્ષની વચ્ચે હોવી જોઈએ.

ડેપ્યુટી હેડ ક્લાઉડ માટેની લાયકાત

ડેપ્યુટી હેડ ક્લાઉડ (COE)ની પોસ્ટ માટે કમ્પ્યુટર સાયન્સ, IT, ઇલેક્ટ્રોનિક્સ એન્ડ ટેલિકોમ્યુનિકેશન અથવા ઇલેક્ટ્રિકલ એન્ડ ઇલેક્ટ્રોનિક્સમાં BE/BTechની ડિગ્રી હોવી જરૂરી છે. આ ઉપરાંત MCA કરેલા ઉમેદવારો પણ અરજી કરી શકે છે. ઉમેદવાર પાસે સંબંધિત ક્ષેત્રમાં ઓછામાં ઓછો 10 વર્ષનો અનુભવ હોવો જોઈએ. જેમાંથી 5 વર્ષનો અનુભવ ક્લાઉડ કમ્પ્યુટિંગ ક્ષેત્રમાં હોવો જરૂરી છે.

આ પણ વાંચોઃખેડૂતો માટે ખુશખબર! દિવાળીએ આ 6 ટ્રેક્ટર ખરીદો ઓછા બજેટમાં, જાણો કિંમત અને ખાસિયતો

ડેપ્યુટી હેડ પ્લેટફોર્મ એન્જિનિયરિંગ માટેની લાયકાત

આ પોસ્ટ માટે પણ કમ્પ્યુટર સાયન્સ, ઇન્ફોર્મેશન ટેક્નોલોજી, ઇલેક્ટ્રોનિક્સ એન્ડ ટેલિકોમ્યુનિકેશન અથવા ઇલેક્ટ્રિકલ એન્ડ ઇલેક્ટ્રોનિક્સમાં BE/BTech અથવા MCAની ડિગ્રી જરૂરી છે. ઉમેદવાર પાસે સંબંધિત ક્ષેત્રમાં 10 વર્ષનો કામનો અનુભવ હોવો જોઈએ. ક્લાઉડ કમ્પ્યુટિંગ ક્ષેત્રમાં 5 વર્ષનો અનુભવ ધરાવતા ઉમેદવારોને પ્રાથમિકતા આપવામાં આવશે. આ પદ માટે ઉંમર 35થી 45 વર્ષની વચ્ચે હોવી જોઈએ.

કેટલો પગાર મળશે અને અરજી ફી કેટલી છે?

આ ચારેય પોસ્ટ માટે બેંકે કોઈ નિશ્ચિત પગાર જાહેર કર્યો નથી. ઉમેદવારની શૈક્ષણિક લાયકાત, કામનો અનુભવ, અગાઉ મળતો પગાર અને તેની યોગ્યતાને ધ્યાનમાં રાખીને પગાર નક્કી કરવામાં આવશે. આ તમામ પોસ્ટ સિનિયર લેવલની હોવાથી પગાર અંગે પસંદગી પામેલા ઉમેદવાર સાથે ચર્ચા કરવામાં આવશે.ખાસ વાત એ છે કે આ ભરતી માટે કોઈ અરજી ફી રાખવામાં આવી નથી. એટલે ઉમેદવારો કોઈ પણ ફી ચૂકવ્યા વગર ઓનલાઈન અરજી કરી શકશે.

પસંદગી કેવી રીતે થશે?

સૌથી પહેલાં ઉમેદવારોની અરજી અને તેમની લાયકાતની તપાસ કરવામાં આવશે. કામનો અનુભવ અને પોસ્ટ પ્રમાણે જરૂરી યોગ્યતા ધરાવતા ઉમેદવારોને શોર્ટલિસ્ટ કરવામાં આવશે. ત્યારબાદ જરૂરિયાત પ્રમાણે સાયકૉમેટ્રિક ટેસ્ટ અથવા અન્ય ટેસ્ટ લેવામાં આવી શકે છે.આ પ્રક્રિયા બાદ ઉમેદવારોને પર્સનલ ઇન્ટરવ્યૂ માટે બોલાવવામાં આવશે. ઇન્ટરવ્યૂમાં ઉમેદવારની ટેક્નિકલ જાણકારી, અનુભવ અને કામ કરવાની ક્ષમતા તપાસવામાં આવશે. આ સાથે પગાર અંગે પણ ચર્ચા થઈ શકે છે. પસંદગીની પ્રક્રિયાના અંતે ઉમેદવારના શૈક્ષણિક અને અનુભવના દસ્તાવેજોની ચકાસણી કરવામાં આવશે.

અરજી કેવી રીતે કરવી?

બેંક ઓફ બરોડાની આ ભરતી માટે ઓનલાઈન અરજી કરવાની રહેશે. ઉમેદવારોએ બેંકની સત્તાવાર વેબસાઇટ પર જઈને Careers વિભાગમાં Current Opportunitiesનો વિકલ્પ પસંદ કરવાનો રહેશે. ત્યારબાદ જાહેરાત નંબર BOB/HRM/REC/ADVT/2026/18 હેઠળ ભરતીની વિગતો ખોલવાની રહેશે.અરજી ફોર્મમાં જરૂરી માહિતી ભરવાની સાથે ફોટો, સહી, બાયોડેટા અને શૈક્ષણિક લાયકાતના દસ્તાવેજો અપલોડ કરવાના રહેશે. ફોર્મ સબમિટ કર્યા બાદ તેની પ્રિન્ટ અથવા કન્ફર્મેશન સાચવી રાખવું. અરજી કરવાની છેલ્લી તારીખ 17 નવેમ્બર 2026 છે. આથી લાયકાત ધરાવતા ઉમેદવારોએ છેલ્લી તારીખ પહેલાં અરજી કરી દેવી જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ