ટેક્નોલોજી / હવે 'બેબી માઈન્ડ' એપ કહેશે, તમારું બાળક શું વિચારી રહ્યું છે

સંશોધકોએ આ એપને 'બેબી માઇન્ડ' નામ આપ્યું છે. આ એપ માતા-પિતાને પોતાનાં બાળકોના દૃષ્ટિકોણથી વિચારવા અને સમજવાની સુવિધા આપે છે. તે દ્વારા માતા-પિતા સમજી શકશે કે રોજ તેમના બાળકના મગજમાં શું ચાલતું હોય છે. આ એપ માતા-પિતાને તેમના બાળકના મનોવૈજ્ઞાનિક વિકાસની સ્પષ્ટ જાણકારી પણ આપશે. 

યાર્ક યુનિવર્સિટીનાં પ્રોફેસર એલિઝાબેથ મીન્સે જણાવ્યું કે આ એપનો ઉપયોગ કરવાના ઘણા ફાયદા છે. તે ઓછી કિંમતની છે અને ઉપયોગમાં પણ સરળ છે. તેમણે જણાવ્યું કે અમે એ જણાવવા ઇચ્છીએ છીએ કે નવી ટેકનિકથી એક સ્માર્ટ ફોન એપ માતા-પિતા અને તેમનાં બાળકો વચ્ચે સંબંધોની ગુણવત્તા વધારે સુધારી શકે છે.  સંશોધકોએ આ એપની ઉપયોગિતા પર અભ્યાસ માટે માતાઓનું એક ગ્રૂપ બનાવ્યું અને તેમને બાળકના જન્મ બાદ આ એપનો ઉપયોગ કરવાનું કહેવાયું.
 
તેમણે આ એપનો ઉપયોગ બાળકના જન્મવાથી લઇને છ મહિના સુધી કર્યો. સંશોધકોએ પોતાનાં બાળકોની સાથે રમી રહેલાં માતા-પિતાનો બારીકાઇથી અભ્યાસ કર્યો અને પોતાનાં બાળકોના વિચારો અને ભાવનાઓને સમજવામાં તેઓ કેટલાં વ્યસ્ત છે તે જાણ્યું. આ લોકોની તુલના એ માતા-પિતા સાથે કરવામાં આવી, જેમનાં બાળકો છ મહિનાનાં થઇ ગયાં હતાં અને તેમણે આ એપનો ઉપયોગ કર્યો ન હતો. સંશોધનમાં જાણવા મળ્યું કે જેમણે આ એપનો ઉપયોગ કર્યો તે અન્યની તુલનામાં પોતાનાં બાળકોની ભાવનાઓ અને વિચારોને વધુ સારી રીતે સમજતાં હતાં.