- સિડનીમાં આગામી દિવસોએ યોજાનાર ક્વોડ મીટિંગ રદ્દ
- અમેરિકી રાષ્ટ્રપતિ જો બિડેન ક્વાડ સમિટમાં ભાગ નહીં લેવાનો નિર્ણય
- ઓસ્ટ્રેલિયાએ સિડનીમાં યોજાનારી ક્વોડ મીટિંગ રદ કરી દીધી
સિડનીમાં આગામી દિવસોએ યોજાનાર ક્વોડ મીટિંગ ( Quad Summit ) ને લઈ મોટા સમાચાર સામે આવ્યા છે. વિગતો મુજબ ઓસ્ટ્રેલિયાએ સિડનીમાં યોજાનારી ક્વોડ મીટિંગ રદ કરી દીધી છે. વાત જાણે એમ છે કે, અમેરિકા હાલ રાજકીય અને આર્થિક સંકટમાંથી પસાર થઈ રહ્યું છે. અમેરિકામાં પણ દેવું સંકટ વધી રહ્યું છે અને તેના પર ડિફોલ્ટનું જોખમ તોળાઈ રહ્યું છે. જેને લઈ અમેરિકી રાષ્ટ્રપતિ જો બિડેન ક્વાડ સમિટમાં ભાગ નહીં લેવાનો નિર્ણય કર્યા બાદ હવે ઓસ્ટ્રેલિયાએ સિડનીમાં યોજાનારી ક્વોડ મીટિંગ રદ કરી દીધી છે.
સિડનીમાં આગામી દિવસોએ યોજાનાર ક્વોડ મીટિંગમાં ભારત, ઓસ્ટ્રેલિયા, જાપાન અને અમેરિકા ભાગ લેવાના હતા. આ તરફ હવે અમેરિકાના રાષ્ટ્રપતિ બિડેને કહ્યું છે કે, તે જાપાનમાં યોજાનારી G-7 સમિટમાં ભાગ લેશે. આ પછી તેઓ Quad Summitની બેઠકમાં ભાગ લેવા જશે નહીં. તેના બદલે તે વોશિંગ્ટન પરત ફરશે. બિડેને પાપુઆ ન્યુ ગિનીનો પ્રવાસ પણ રદ કર્યો છે. જો તે પાપુઆ ગયા હોત તો તે ટાપુ રાષ્ટ્રની મુલાકાત લેનારા પ્રથમ યુએસ પ્રમુખ હોત.
Quad Summit ખૂબ જ મહત્વપૂર્ણ
ક્વાડ મીટિંગને ખૂબ જ મહત્વપૂર્ણ માનવામાં આવે છે, કારણ કે આ મીટિંગમાં એશિયા-પેસિફિક ક્ષેત્રમાં ચીન સાથે વ્યવહાર કરવાની રણનીતિ બનાવવામાં આવે છે. વ્હાઇટ હાઉસમાં એક કાર્યક્રમમાં બોલતા બિડેને સૌથી પહેલા તેમની જાપાન મુલાકાત વિશે વાત કરી હતી. આ પછી તેમણે કહ્યું કે, રાષ્ટ્રપતિ તરીકે એક સાથે અનેક મુદ્દાઓ જોવાના હોય છે. મને વિશ્વાસ છે કે, અમે ડિફોલ્ટથી બચીશું અને વિશ્વ પ્રત્યે અમેરિકાની જવાબદારીઓ નિભાવીશું. તેણે વધુમાં જણાવ્યું કે, તે પોતાનો પ્રવાસ ટૂંકો કરી રહ્યો છે. તે ઓસ્ટ્રેલિયા અને પાપુઆ ન્યુ ગિની નથી જઈ રહ્યો, જેથી તે દેશમાં પરત ફરીને નેતાઓ સાથે વાત કરી શકે.
સિડનીમાં PM મોદી સાથે મુલાકાત થશે
ઓસ્ટ્રેલિયાના વડા પ્રધાન એન્થોની અલ્બેનિસે બુધવારે કહ્યું હતું કે, યુએસ પ્રમુખ જો બિડેન વિના સિડનીમાં ક્વોડ મીટિંગ શક્ય નથી. તેમણે કહ્યું કે, આ અઠવાડિયે ક્વોડ (Quad Summit) ને બદલે ઓસ્ટ્રેલિયા, અમેરિકા, ભારત અને જાપાનના નેતાઓ જી-7 બેઠકમાં મળશે.
શું કહ્યું ઓસ્ટ્રેલિયાના PMએ ?
ઓસ્ટ્રેલિયાના PMએ કહ્યું, આવતા અઠવાડિયે સિડનીમાં યોજાનારી ક્વોડ લીડર્સની કોઈ બેઠક નહીં થાય. જોકે અમે જાપાનમાં Quad નેતાઓ સાથે ચોક્કસપણે ચર્ચા કરીશું. તેમણે એમ પણ કહ્યું કે, સિડનીમાં ભારતના વડાપ્રધાન નરેન્દ્ર મોદી સાથે ચોક્કસપણે દ્વિપક્ષીય વાતચીત થશે. જાપાનના વડાપ્રધાન ફ્યુમિયો કિશિદા સિડની આવશે કે નહીં તે અંગે અલ્બેનીઝે જણાવ્યું નથી.
