વાતાવરણ / રોહિણી નક્ષત્રમાં ઉતરતા ગુજરાતમાં 15 જૂનથી ચોમાસું જામશે, વાવાઝોડું આવવાની પણ શક્યતા, જાણો હવામાનની આગાહી

• ગુજરાતમાં 15 જૂનથી વરસાદનું આગમન
• 28-29 જૂન સુધીમાં જામશે ચોમાસું
• ગાજવીજ સાથે વરસાદ થવાની શક્યતા

ઉનાળો હાલ આકરું રૂપ ધારણ કરી રહ્યો છે. તો બીજી બાજુ ચોમાસુ કેવું રહેશે? અને ક્યારથી ચોમાસાનું આગમન થશે? તે મામલે જાણવા લોકો અધિરા બનતા જઇ રહ્યા છે. આવી સ્થિતિ વચ્ચે ગુજરાતમાં આગમી 15 જૂનથી ચોમાસું જામે તેવી શક્યતા જોવા મળી રહી છે. હવામાન વિભાગના મતે દક્ષિણ ભારતમાં 1થી 3 જૂન સુધીમાં ચોમાસાનું આગમન થઈ શકે છે. ઉત્તર ભારતમાં આંધી અને ગાજવીજ સાથે વરસાદ થવાની પણ શક્યતા છે. રોહિણી નક્ષત્રમાં ઉતરતા વરસાદ થશે તો ચોમાસાની ગતિવિધિ નિયમિત થશે તેવી પણ આગાહી કરવામાં આવી છે. જૂનની શરૂઆતમાં અરબ સાગરમાં હવાનું હળવું દબાણ સર્જાઈ શકે છે. તો હવાના દબાણના કારણે વાવાઝોડું આવવાની પણ શક્યતા જોવા મળી રહી છે.

'8 અને 9 જૂનની આસપાસ દરિયો તોફાની બની શકે છે'
બીજી બાજુ હવામાન નિષ્ણાત અંબાલાલ પટેલે  22, 23, 24 જૂનની આસપાસ ગુજરાતમાં વરસાદ પડી  શકે છે અને 4, 5, 6 જૂનના રોજ ગુજરાતમાં છુટાછવાયો વરસાદ પડી શકે તવી આગાહી કરી છે, વધુમાં. ગુજરાતમાં ચોમાસું સામાન્ય રહેવાની સંભાવના પણ વ્યકત કરી છે. 

22મી જૂન આસપાસ વિધિવત ચોમાસાનો ગુજરાતમાં પ્રારંભ થશે 
અંબાલાલ પટેલે જણાવ્યું હતું કે,  ગુજરાતમાં 15 થી30 જૂન વચ્ચે ચોમાસુ શરૂ થશે. તેમજ 22મી જૂન આસપાસ વિધિવત ચોમાસાનો ગુજરાતમાં પ્રારંભ થશે. આ વર્ષે ચોમાસાની શરૂઆત અને અંત સારો રહેશે. ચોમાસાના મધ્ય ભાગમાં થોડી ગડબડ થઈ શકે છે. ત્યારે હાલ તો ઝાકળી વાદળો જોવા મળી રહ્યા છે તે ચોમાસુ સમયસર થશે તેની નિશાની છે. તેમજ મે મહિનાના અંતમાં સૌરાષ્ટ્ર અને ઉત્તર ગુજરાતમાં વરસાદી ઝાપટાં થશે.