ફાગણ ફોરમતો આયો ! / હોળી-ધૂળેટીના પર્વને લઈને એસટી વિભાગનો મહત્વનો નિર્ણય,વતનમાં જતા પ્રવાસીઓને લાભ

• રાજકોટ-દાહોદ-ગોધરા સુધી વધારાની એસટી 
• હોળી-ધૂળેટીના પર્વ માટે વિભાગનું ખાસ આયોજન 
• બે વર્ષ પછી કોઈ પણ પ્રતિબંધ વગર પહેલો રંગોત્સવ 

બે વર્ષ જેટલા લાંબા અંતરાલ પછી ગુજરાતના નાગરિકોને કોઈ પણ પાબંદી વગર પહેલી વાર હોળી-ધૂળેટીના રંગોત્સવની મજા માનવાનો અવસર મળ્યો છે. દેશ્ભારમાં  કોરોના હવે ડૂકી ગયો છે તેમ કહીએ તો અતિશયોક્તિ નથી ત્યારે, ગુજરાતમાંથી પણ કોરોનાએ રીતસર ઉચાળા ભરી લીધા છે. એટલે સૌરાષ્ટ્રથી માંડીને છેક તળ આદિવાસી વિસ્તારનાં દાહોદ-ઝાલોદ જેવા પારંપરિક હોળી ઉજવાતા વિસ્તારો માટે રાજ્યના એસટી વિભાગે પણ ખાસ વ્યવસ્થા કરી છે. 

એસટીની ખાસ વ્યવસ્થા 

હોળી-ધૂળેટીના પર્વોને રાજ્યની જનતા મન ભરીને માણી શકે તે હેતુસર રાજકોટ એસ.ટી. દ્વારા વધારાની 300 બસ દોડાવાશે. રાજકોટ એસટી ડેપોએ સતત એક અઠવાડીયા સુધી આ આયોજન કરતા 8 થી 16 માર્ચ દરમિયાન વધારાની બસ દોડશે. જેમાં રાજકોટથી દાહોદ-ગોધરા માટે 200 જેટલી બસ મુકાશે. તહેવારો દરમિયાન નાગરીકો પોતાના વતનમાં જઈ શકે અને આરામ દાયક મુસાફરી રહે તે માટે વધારાની બસ દોડાવવાનો એસટી વિભાગનો આ પ્રયાસ સરાહનીય છે. 

પ્રસિદ્ધ  'ભગૌરિયા' પ્રથા

આદિવાસી વિસ્તારોમાં ખાસ કરીને ગુજરાત અને અન્ય રાજ્યોમાં  હોળીનો ઉત્સવ આદિવાસીઓમાં 'ભગૌરિયા' પ્રથા માટે જાણીતો છે. ભગૌરિયા એટલે કે ભગાડીને લઈ જવું. પ્રાચીન કાળથી રાજા-મહારાજાના સમયમાં સ્વયંવર પ્રથા હતી. તેની જેવી જ આ આદિવાસી પ્રથા છે. સ્વયંવર અને ભગૌરિયા પ્રથામાં મુખ્ય ફરક એ છે કે, સ્વયંવર પ્રથા રાજમહેલમાં યોજાતી હતી. જ્યારે ભગૌરિયા બાંસવાડા, ઉદયપુર (રાજસ્થાન), ડુંગરપુર, પંચમહાલ (ગુજરાત) અને ધાર, ઝાંબુઆ, રતલામ, નિમાડ (મધ્યપ્રદેશ)ના વનપ્રદેશોમાં  હોળી પુર્વે ભરાતી બજારમાં ખુલ્લેઆમ થાય છે.