તમારા કામનું / Amazonના પાર્સલમાં પિંક ડોટ શું છે? જાણો નવી સિક્યોરિટી સિસ્ટમ

આજના સમયમાં ઓનલાઈન શોપિંગ લોકોના જીવનનો મહત્વનો ભાગ બની ગયું છે. મોબાઇલ ફોનથી લઈને દવાઓ અને ઘરગથ્થુ વસ્તુઓ સુધીની ખરીદી હવે લોકો ઓનલાઈન કરે છે. જોકે, ઓનલાઈન ખરીદીમાં ક્યારેક છેતરપિંડીના બનાવો પણ સામે આવે છે. ઘણા ગ્રાહકો ફરિયાદ કરે છે કે મોંઘી વસ્તુ ઓર્ડર કર્યા બાદ પાર્સલમાંથી બીજી કોઈ વસ્તુ નીકળે છે. આવી સમસ્યાઓ અટકાવવા માટે Amazonએ નવી સુરક્ષા વ્યવસ્થા શરૂ કરી છે.

શું છે પિંક ડોટ સિસ્ટમ?

Amazon કેટલાક પાર્સલ પર ખાસ પ્રકારની સુરક્ષા સીલ લગાવી રહ્યું છે. આ સીલ પર નાનો ડોટ આપવામાં આવે છે. સામાન્ય સ્થિતિમાં આ ડોટ સફેદ રંગનો હોય છે. જો કોઈ વ્યક્તિ પાર્સલ ખોલવાનો અથવા ફરીથી પેક કરવાનો પ્રયાસ કરે તો આ ડોટનો રંગ બદલાઈને પિંક અથવા લાલ થઈ જાય છે.આ રીતે ગ્રાહકને પાર્સલ સાથે કોઈ ચેડાં થયા છે કે નહીં તેની જાણ થઈ શકે છે.

પાર્સલ સાથે છેતરપિંડી કેવી રીતે થાય છે?

કેટલાક કિસ્સાઓમાં ઠગો પાર્સલની સીલને ગરમ કરીને સાવધાનીપૂર્વક ખોલી નાખે છે. ત્યારબાદ અંદર રહેલી મૂળ વસ્તુ કાઢીને તેની જગ્યાએ સસ્તી અથવા નકલી વસ્તુ મૂકી દે છે. પછી પાર્સલને ફરીથી બંધ કરી દેવામાં આવે છે. બહારથી જોતા પાર્સલ સામાન્ય લાગે છે, પરંતુ અંદરનો માલ બદલાઈ ચૂકેલો હોય છે. Amazonની નવી સિસ્ટમ આવા કિસ્સાઓ ઝડપવા માટે મદદરૂપ બની શકે છે.

પિંક અથવા લાલ ડોટ દેખાય તો શું કરવું?

જો ડિલિવરી સમયે પાર્સલ પરનો ડોટ સફેદ હોય તો સામાન્ય રીતે પાર્સલ સુરક્ષિત હોવાનું માનવામાં આવે છે. પરંતુ જો ડોટનો રંગ પિંક અથવા લાલ થઈ ગયો હોય તો સાવચેત રહેવાની જરૂર છે.

• પાર્સલનો ફોટો ક્લીક કરી લો
• ડિલિવરી બોયની હાજરીમાં પેકેજ તપાસો
• તરત Amazon કસ્ટમર સપોર્ટનો સંપર્ક કરો
• જરૂર પડે તો પાર્સલ સ્વીકારવાનું ટાળો

આ પણ વાંચોઃ AC 16-17°C પર રાખતા પહેલાં જાણો તેના ગંભીર સાઇડ ઇફેક્ટ્સ

કયા પ્રોડક્ટ્સ પર આ સુવિધા આપવામાં આવી રહી છે?

હાલમાં Amazon આ સુરક્ષા ટેકનોલોજીનો ઉપયોગ મુખ્યત્વે દવાઓ, બ્યુટી પ્રોડક્ટ્સ અને અન્ય સંવેદનશીલ વસ્તુઓના પાર્સલમાં કરી રહ્યું છે. ભવિષ્યમાં કંપની અન્ય કેટેગરીના પ્રોડક્ટ્સમાં પણ આ સિસ્ટમ લાગુ કરી શકે છે જેથી ગ્રાહકોને વધુ સુરક્ષિત ડિલિવરીનો અનુભવ મળી શકે.

ડિલિવરી લેતી વખતે આ બાબતોનું ખાસ ધ્યાન રાખો

કોઈ પણ મોંઘી વસ્તુ અથવા મહત્વપૂર્ણ ઓર્ડર મળે ત્યારે ઉતાવળમાં પાર્સલ સ્વીકારી ન લો. પાર્સલની સીલ, ટેપ અને ડોટની સ્થિતિ સારી રીતે તપાસો. જો પાર્સલ પહેલેથી ખુલેલું લાગે, પેકિંગમાં ગડબડ જણાય અથવા ડોટનો રંગ બદલાયેલો હોય તો તરત કંપનીને જાણ કરો. માત્ર થોડા સેકન્ડની સાવચેતી તમને મોટી છેતરપિંડીથી બચાવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ