ગુજરાત / 'નવઘણ સરવૈયાને HCના ચુકાદા પર નોકરી આપી'નવઘણ સરવૈયાને ખોટા સર્ટિફિકેટ પર AMCની સ્પષ્ટતા

અમદાવાદ મ્યુનિસિપલ કોર્પોરેશન (AMC) માં સરકારી નોકરી મેળવવા માટે ખોટા અને નકલી દસ્તાવેજોનો આશરો લેવાયો હોવાનો એક અત્યંત ચોંકાવનારો કિસ્સો સામે આવ્યો છે. મ્યુનિસિપલ કોર્પોરેશનમાં ફરજ બજાવતા એક જુનિયર ક્લાર્કે જાતિના ખોટા સર્ટિફિકેટ (Caste Certificate)ના આધારે નોકરી મેળવી લીધી હોવાનો ગંભીર આરોપ લાગતા વહીવટી આલમમાં ભારે ચકચાર મચી ગઈ છે.

આ મામલે સત્તાવાર ખુલાસો

આ આક્ષેપો સામે આવ્યા બાદ અમદાવાદ મ્યુનિસિપલ કોર્પોરેશન પ્રશાસન દ્વારા આ મામલે સત્તાવાર ખુલાસો કરવામાં આવ્યો છે અને સમગ્ર વિવાદ પર તંત્રનું વલણ સ્પષ્ટ કરવામાં આવ્યું છે. આ કેસની વિગતવાર વાત કરીએ તો, ગીર નેસડાના વતની એવા જુનિયર ક્લાર્ક નવઘણ સરવૈયા પર ખોટા જાતિ સર્ટિફિકેટના આધારે એસ.ટી. (ST - Scheduled Tribe) અનામત કેટેગરીની નોકરી મેળવી હોવાનો સીધો આરોપ લાગ્યો છે.

AMCના ઉચ્ચ અધિકારીઓએ ખુલાસો

સોશિયલ મીડિયા અને વહીવટી સ્તરે આ ગંભીર આક્ષેપ થયા બાદ AMC ના ઉચ્ચ અધિકારીઓએ ખુલાસો કરતા જણાવ્યું છે કે, ઉમેદવારોના ડોક્યુમેન્ટ વેરિફિકેશન (Document Verification)ની પ્રક્રિયા દરમિયાન નામદાર હાઇકોર્ટના એક મહત્વપૂર્ણ જજમેન્ટને આધારે આ પ્રકારની કામચલાઉ નોકરી આપવામાં આવી છે. તંત્રના જણાવ્યા અનુસાર, ઉમેદવારને હાલમાં માત્ર 9 મહિનાનો કામચલાઉ ઓર્ડર કરીને નોકરી પર રાખવામાં આવ્યા છે. જ્યાં સુધી સક્ષમ સત્તામંડળ દ્વારા જાતિના મૂળ સર્ટિફિકેટની યોગ્ય ખરાઇ (Verification) ન થાય, ત્યાં સુધી આ નોકરી સંપૂર્ણપણે પ્રોવિઝનલ એટલે કે કામચલાઉ રહેશે.

આ પણ વાંચો : મોરબીના જેતપરમાં વીજપોલની કામગીરીના વિરોધમાં વીજ કંપની સામે ખેડૂતોનું પ્રદર્શન,પોલીસે કર્યો લાઠીચાર્જ

અમદાવાદ મ્યુનિસિપલ કોર્પોરેશને વધુમાં સ્પષ્ટતા કરી છે કે આ મામલે વિજિલન્સ વિભાગ દ્વારા તપાસ ચાલી રહી છે. વિજિલન્સ તપાસના આખરી રિપોર્ટ આવ્યા બાદ જ સર્ટિફિકેટની અસલિયત અને ખરાઇ બાબતે આગળની કાયદેસરની કડક કાર્યવાહી કરવામાં આવશે. જો તપાસમાં જુનિયર કલાર્ક નવઘણ સરવૈયાનું એસ.ટી. (ST) નું સર્ટિફિકેટ ખોટું કે બનાવટી સાબિત થશે, તો તેમને તાત્કાલિક અસરથી નોકરીમાંથી બરતરફ કરવામાં આવશે અને તેમની સામે ફોજદારી ગુનો પણ દાખલ થઈ શકે છે. હાલમાં આ મુદ્દો સરકારી ભરતીઓમાં થતી અનામતના દુરુપયોગને લઈને ભારે ચર્ચાનો વિષય બન્યો છે અને સંગઠનો પણ આ મામલે તટસ્થ તપાસની માંગ કરી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ