નેશનલ / કાશ્મીરમાં તુર્કી અને ચીની બનાવટની પિસ્તોલ મળી, તપાસમાં અનેક ચોંકાવનારા ખુલાસા

Jammu Kashmir: જમ્મુ અને કાશ્મીરના બારામુલામાં પોલીસ અને સેનાએ સંયુક્ત કાર્યવાહીમાં ગેરકાયદે હથિયારોની દાણચોરીના નેટવર્કનો પર્દાફાશ કર્યો છે. એક શંકાસ્પદ વ્યક્તિ પાસેથી તુર્કી બનાવટની પિસ્તોલ મળી આવ્યા બાદ વધુ તપાસમાં ચાઇનીઝ બનાવટની પિસ્તોલ, મેગેઝિન અને જીવંત કારતૂસ મળી આવ્યા છે.

પોલીસ અને સેનાની 52 રાષ્ટ્રીય રાઇફલ્સે જમ્મુ અને કાશ્મીરના બારામુલા જિલ્લામાં સંયુક્ત કાર્યવાહી હાથ ધરી હતી અને ગેરકાયદેસર હથિયારોની દાણચોરીના નેટવર્કનો પર્દાફાશ કર્યો હતો. વિદેશી બનાવટની પિસ્તોલ, મેગેઝિન અને જીવંત કારતૂસ મળી આવ્યા હતા. પોલીસ માને છે કે આ કેસ મોટા ગેરકાયદે હથિયારોની દાણચોરીના નેટવર્ક સાથે જોડાયેલો હોઈ શકે છે. આ કેસમાં ધરપકડ કરાયેલા શંકાસ્પદોની પૂછપરછના આધારે પોલીસ આ મામલો ઉકેલવાનો પ્રયાસ કરી રહી છે.

વાહન ચેકિંગ દરમિયાન શંકાસ્પદ વ્યક્તિની ધરપકડ

પોલીસના જણાવ્યા અનુસાર 7 જૂન 2026 ના બારામુલા પોલીસ અને 52 રાષ્ટ્રીય રાઇફલ્સે કનિસ્પોરાના ચાંદસુમામાં એફસીઆઇ વેરહાઉસ પાસે એક મોબાઇલ વાહન ચેકપોઇન્ટ સ્થાપી હતી. દરમિયાન શ્રીનગરથી બારામુલ્લા જતી સફેદ મારુતિ બ્રેઝા કારને ચેકિંગ માટે રોકવામાં આવી હતી. તપાસ દરમિયાન મુસાફરના બેગમાંથી તુર્કીમાં બનેલી CANIK TP9SF METE (9x19 mm) પિસ્તોલ મળી આવી હતી. મુસાફરની ઓળખ ઉરીના કમલકોટનો રહેવાસી વકીલ અહમદ થીકરી તરીકે થઇ છે.મુસાફર હથિયાર માટે માન્ય લાઇસન્સ કે કાયદેસર પરમિટ રજૂ કરી શક્યો ન હતો.

ડ્રાઇવરે હથિયારની જાણકારીનો ઇનકાર કર્યો

કારના ડ્રાઇવરે દાવો કર્યો હતો કે તે ફક્ત મુસાફરોને લઈ જઈ રહ્યો હતો અને તેને હથિયારની કોઈ જાણકારી નહોતી. આ ઘટના બાદ બારામુલા પોલીસે 7 જૂનના સ્થાનિક પોલીસ સ્ટેશનમાં આર્મ્સ એક્ટની કલમ 7/25 હેઠળ FIR નોંધી હતી. મળેલી કરાયેલ પિસ્તોલ જપ્ત કરવામાં આવી હતી, અને હથિયારના સ્ત્રોત અને તેના સંભવિત ઉપયોગની તપાસ શરૂ કરવામાં આવી હતી. તપાસ દરમિયાન ધરપકડ કરાયેલા આરોપીઓની પૂછપરછમાંથી મહત્વપૂર્ણ માહિતી મળી હતી. તેના આધારે 8 જૂન, 2026 ના પોલીસે ઉરીના કમલકોટ વિસ્તારના કાલસી હરદુ વિસ્તારમાં બીજી સર્ચ ઓપરેશન હાથ ધર્યું હતું.

આ પણ વાંચોઃ નેશનલ / સરકારે લઈ લીધું આ પગલું નહીંતર પેટ્રોલ-ડીઝલ હજુ વધુ મોંઘા થઈ ગયા હોત

એક્ઝિક્યુટિવ મેજિસ્ટ્રેટ, સ્થાનિક લામ્બરદાર અને ચોકીદારની હાજરીમાં હાથ ધરવામાં આવેલા સર્ચ ઓપરેશન દરમિયાન સુરક્ષા દળોએ એક ચાઇનીઝ બનાવટની પિસ્તોલ, બે મેગેઝિન અને 13 જીવંત કારતૂસ જપ્ત કર્યા. પોલીસ અધિકારીઓ કહે છે કે આ બીજી રિકવરી આ કેસમાં એક મહત્વપૂર્ણ સફળતા છે. તે ગેરકાયદેસર શસ્ત્રોની ખરીદી, સંગ્રહ અને હિલચાલમાં સામેલ એક મોટા નેટવર્કની સંડોવણી હોઇ શકે છે. તપાસ એજન્સીઓ હવે આ શસ્ત્રો ક્યાંથી આવ્યા, શા માટે સંગ્રહિત કરવામાં આવ્યા અને આ નેટવર્કમાં બીજું કોણ સામેલ છે તેની તપાસ કરી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ